އިންޑިއާގެ އިރުމަތީ ސްޓޭޓެއް ކަމަށްވާ ވެސްޓް ބެންގޯލްގައި މި ހަފުތާގައި ބޭއްވި އިންތިހާބަށް ފަހު ހިނގި ހަމަނުޖެހުންތަކުގައި މަދުވެގެން ތިން މީހުން މަރުވެ، އެތައް ސަތޭކަ ބަޔަކު ހައްޔަރުކޮށްފި އެވެ.
މަރުވި މީހުންގެ ތެރޭގައި ބޮޑުވަޒީރު ނަރެންދުރަ މޯދީގެ ބާރަތިޔާ ޖަނަތާ ޕާޓީ (ބީޖޭޕީ) ގެ އިސް ލީޑަރެއްގެ އެހީތެރިއަކު ވެސް ހިމެނެ އެވެ.
ދެހާސް އެގާރަ ވަނަ އަހަރުން ފެށިގެން ވެސްޓް ބެންގޯލްގެ ވެރިކަން ކުރައްވަމުން ގެންދަވާ ޗީފް މިނިސްޓަރު މަމަތާ ބެނާޖީގެ ތުރިނަމޫލް ކޮންގްރެސް (ޓީއެމްސީ) ބަލިކޮށް، މި ފަހަރުގެ އިންތިހާބު ކާމިޔާބުކުރީ މޯދީގެ ބީޖޭޕީންނެވެ.
އިންތިހާބުން ބަލިވި ނަމަވެސް، މަގާމުން އިސްތިއުފާ ދެއްވުމަށް މަމަތާ ބެނާޖީ ވަނީ އިންކާރު ކުރައްވާފަ އެވެ. އޭނާ ވިދާޅުވީ އިންތިހާބުން "ބަލިނުވާ" ކަމަށާއި، ބީޖޭޕީން އިންތިހާބު ކާމިޔާބުކުރީ އެ ގައުމުގެ އިލެކްޝަން ކޮމިޝަނާ ގުޅިގެން މަކަރު ހަދައިގެން ކަމަށެވެ.
ވެސްޓް ބެންގޯލްގެ އެކި ސަރަހައްދުތަކުގައި ހިނގި ހަމަނުޖެހުންތަކާ ގުޅިގެން 200 އަށްވުރެ ގިނަ ޖިނާއީ މައްސަލަ ރަޖިސްޓްރީކޮށް، 433 މީހަކު ހައްޔަރުކޮށްފައިވާ ކަމަށް އެ ސްޓޭޓްގެ ފުލުހުންގެ ވެރިޔާ ސިދް ނާތު ގުޕްތާ ބުދަ ދުވަހު ނޫސްވެރިންނަށް މައުލޫމާތު ދެއްވަމުން ވިދާޅުވި އެވެ.
ބީޖޭޕީން ތުހުމަތުކުރާ ގޮތުގައި ޓީއެމްސީން ދަނީ ރޭވުންތެރިކަމާއެކު ވަކި ބަޔަކަށް އަމާޒުކޮށްގެން މީހުން މެރުމުގެ އަމަލުތައް ހިންގަމުންނެވެ.
ނަމަވެސް ޓީއެމްސީން ވަނީ އެ ހަމަނުޖެހުންތައް ކުށްވެރިކޮށްފަ އެވެ. އެ ޕާޓީން ބުނާ ގޮތުގައި އެ އަމަލުތަކަކީ "ބީޖޭޕީގެ މަދަދުލިބޭ ގާނޫނާ ހިލާފު އަމަލުތައް ހިންގާ ބަޔަކު" ކުރަމުންދާ ކަންތައްތަކެކެވެ.
ވެސްޓް ބެންގޯލްއަކީ އިންތިހާބުތަކަށް ފަހު މިފަދަ ހަމަނުޖެހުންތައް ހިނގުމުގެ ތާރީހެއް އޮތް ސްޓޭޓެކެވެ. އެގޮތުން 2021 ވަނަ އަހަރު ބޭއްވި އިންތިހާ ބުގެ ނަތީޖާ އިއުލާން ކުރުމަށްފަހު ސިޔާސީ ޕާޓީތަކުގެ މެދުގައި ހިނގި މިފަދަ ކުރިމަތިލުންތަކެއްގައި ވެސް 12 ވަރަކަށް މީހުން މަރުވެފައިވެ އެވެ.
