އަރަބި ކަނޑުގައި ދަތުރުކުރަމުންދަނިކޮށް މައްސަލައެއް ދިމާވެ ހާލުގައި ޖެހުނު އިންޑިއާގެ އުޅަނދެއްގައި ތިބި ހަތް ފަޅުވެރިން ޕާކިސްތާނުގެ ނޭވީން ސަލާމަތްކޮށްފިއެވެ.
މި ހާދިސާގައި ސަލާމަތްކުރި މީހުންގެ ތެރޭގައި ހިމެނެނީ އިންޑިއާގެ ހަ މީހަކާއި އިންޑޮނީޝިއާގެ ރައްޔިތެކެވެ.
ޕާކިސްތާނުގެ ކަނޑުގެ ސިފައިން ނެރުނު ބަޔާނެއްގައި ބުނެފައިވަނީ، އޮމާނުން ފުރައިގެން އިންޑިއާއަށް ދަތުރުކުރަމުންދިޔަ "އެމްވީ ގޯތަމް" ނަމަކަށް ކިޔާ އުޅަނދަށް ދިމާވި މައްސަލައަކާ ގުޅިގެން އެހީތެރިކަމަށް އެދި މުމްބާއީގެ މެރިޓައިމް ރެސްކިއު ކޯޑިނޭޝަން ސެންޓަރުން ފޮނުވި ސިގްނަލަކަށް ޕާކިސްތާނުން ވަގުތުން އިޖާބަދީފައިވާ ކަމަށެވެ.
މި އޮޕަރޭޝަނުގައި ޕާކިސްތާނު މެރިޓައިމް ސެކިއުރިޓީ އެޖެންސީގެ "ކަޝްމީރު" ނަމަކަށް ކިޔާ މަނަވަރު ވަނީ ވަގުތުން އެ ސަރަހައްދަށް ފޮނުވާފައެވެ. ޕާކިސްތާނު ނޭވީން ބުނި ގޮތުގައި އެ މަނަވަރުން ވަނީ ހާލުގައި ޖެހުނު ފަޅުވެރިންނަށް ބޭނުންވާ ކާބޯތަކެއްޗާއި، ބޭސްފަރުވާގެ އެހީތެރިކަމުގެ އިތުރުން އެހެނިހެން ޒަރޫރީ ސާމާނު ފޯރުކޮށްދީފައެވެ. އަދި އުޅަނދުގެ މުހިންމު ނިޒާމުތައް އަލުން އިއާދަކުރުމަށްޓަކައި ބޭނުންވާ ފަންނީ އެހީތެރިކަންވެސް ވަނީ ފޯރުކޮށްދީފައެވެ.
މި އޮޕަރޭޝަނަކީ ކަނޑުމަތީގައި އިންސާނީ ފުރާނަ ސަލާމަތްކުރުމަށާއި، އެއްވެސް ގައުމަކަށް ބެލުމެއް ނެތް އިންސާނީ އެހީތެރިކަން ފޯރުކޮށްދިނުމަށް ޕާކިސްތާނުން ދޭ އަހަންމިއްޔަތު ހާމަކޮށްދޭ ކަމެއް ކަމަށް އެ ގައުމުގެ އަސްކަރިއްޔާއިން ބުނެއެވެ.
