ހުއްދަ ނެތި ރާއްޖޭގެ ކަނޑުގެ ސަރަހައްދަށް ވަދެ، މާލެ ކައިރީގައި ދެ އުޅަނދެއް ބަނދަރުކޮށްގެން އޮންނަތާ ހަފުތާއަކަށް ވުރެ ގިނަ ދުވަސްވީއިރު ވެސް ބޯޑަރު ބަލަހައްޓާ އެއްވެސް މުއައްސަސާއަކަށް ހިލަމެއް ވެސް ނުވިކަން އެނގިއްޖެ އެވެ.
އިތުބާރުކުރެވޭ މަސްދަރުތަކުން އަދަދު ނޫހަށް މައުލޫމާތު ދިން ގޮތުގައި އެމްޓީ ކޭޖީ 1 އަދި އޭއެލް 1 ނަމަކަށް ކިޔާ މި ދެ އުޅަނދު ރާއްޖޭގެ ސަރަހައްދަށް ވަދެފައިވަނީ އޭޕްރީލް 26، ގަ އެވެ.
މި ދެ އުޅަނދު ރާއްޖެއަށް ވަދެފައިވަނީ ކަމާބެހޭ އެއްވެސް އިދާރާއަކަށް ކުރިން އެންގުމަކާ ނުލައެވެ. މިހާރު މާލޭ ސަރަހައްދުގައި ބަނދަރުކޮށްފައި އޮތް ދެ އުޅަނޑުގެ ތެރެއިން އޭއެލް 1 އަކީ އައިއެމްއޯ ނަންބަރެއް ނެތް އުޅަނދެކެވެ.
މި އުޅަނދުތައް އެންމެ ފަހުން ބަނދަރުކޮށްފައިވަނީ އޮމާންގެ ޝިނާސްގަ އެވެ. އަދި ދަތުރުކުރުމަށް ހަމަޖެހިފައި އޮތީ އިންޑިއާގެ ކަންޑްލާއަށެވެ. ދެ ބޯޓުގައި ވެސް އިންޑިއާ ކެޕްޓަނުން ތިބިއިރު، އެމްޓީ ކޭޖީ 1 ގައި ތިބީ ނުވަ ފަޅުވެރިންނެވެ. އަދި އޭއެލް 1 ގައި ތިބީ 11 ފަޅުވެރިން އެވެ.
އަދަދު ނޫހަށް މައުލޫމާތު ދިން މަސްދަރުން ބުނީ މި އުޅަނދުތަކާ ގުޅޭ މައުލޫމާތު އެނގުނީ ބަނދަރުކުރިތާ ހަފުތާއެއްގެ ފަހުން މެއި މަހުގެ 3، ވަނަ ދުވަހު އެވެ.
"މިއީ ވަރަށް ބޮޑު މައްސަލައެއް. ކްރިމިނަލް އިންވެސްޓިގޭޝަންއެއް ވެސް ގިންގަންޖެހޭ،" ސެކިއުރިޓީ ދާއިރާގައި މަސައްކަތް ކުރާ މީހަކު ބުންޏެވެ.
"ކޮބާ ޕެޓްރޯލްކުރުން، ކޮބާ އަގުބޮޑުކޮށް ގެނައި ޑްރޯންތައް."
މި ދެ ބޯޓުގެ މައްސަލަ ސަމާލުކަމަށް އައުމާއެކު، މެއި މަހުގެ 3 ވަނަ ދުވަހު ކަސްޓަމްސް އާއި އެމްއެންޑީއެފްގެ ޓީމަކުން އެ އުޅަނދުތަކަށް ގޮސް އަރައި ފާސްކުރި އެވެ.
މި ދެ އުޅަނދުގެ މައްސަލައާ ގުޅޭ މައުލޫމާތު ކަމާ ގުޅޭ އެއްވެސް އިދާރާއަކުން އަދި ހާމައެއް ނުކުރެ އެވެ.
