ފުލުހުންގެ ވިކްޓިމް ސަޕޯޓަށް މީހަކު ފޮނުވި މެސެޖުތަކެއް ހޯމް މިނިސްޓަރު އަލީ އިހުސާން ލައިވް ޓީވީގައި އާންމުކޮށްފައިވާ ދަނޑިވަޅެއްގައި، އާންމުންގެ ސިއްހީ މައުލޫމާތު ލީކުވާ މައްސަލައިގައި އދ. ގެ ސްޕެޝަލް ރެޕަޓުއާ އޮން ދަ ރައިޓް ޓު ހެލްތު، ޑރ. ތްލަލެންގް މޮފޮކެންގް ކަންބޮޑުވުން ފާޅުކުރައްވައިފި އެވެ.
ރާއްޖޭގައި ސިއްހީ ހައްގުތައް ލިބޭ މިންވަރު ދެނެގަތުމަށް ބޭނުންވާ މައުލޫމާތު އެއްކުރުމަށް ޑރ. މޮފޮކެންގް އެކި ސަރުކާރުގެ އިދާރާތަކާއި ބައްދަލުކުރެއްވުމަށްފަހު ނޫސްވެރިންނަށް މައުލޫމާތު ދެއްވަމުން ވިދާޅުވީ ރާއްޖޭގައި ނަފްސާނީ ދުޅަހެޔޮކަމުގެ މައްސަލަ އިތުރުވަމުންދާއިރު، އެ ދާއިރާއިން ދޭ ހިދުމަތަށް އޮންނަ އިތުބާރު ވެސް ދަމަހައްޓަން މަޖުބޫރުވެފައިވާ ކަމަށެވެ.
"މެންޓަލް ހެލްތަށް ހާއްސަ ހެލްޕްލައިނަކާއި ސޯޝަލް ސާވިސް ހޮޓްލައިނެއް ވަނީ ކަނޑައަޅާފައި. އެއީ އެހީ ބޭނުންވާ މީހުންނަށް ރަނގަޅު ނިޒާމެއް. އެކަމަކު ކުރެވޭ މުއާމަލާތުގެ މައުލޫމާތު ލީކުވުން ހުއްޓުވަންޖެހޭ. އޭރަށް އެ ނިޒާމަށް އޮންނަ އިތުބާރު ދަމަހައްޓައި، ނަތީޖާވެސް ނެރެވޭނީ،" އޭނާ ވިދާޅުވި އެވެ.
ރެޕަޓުއާ ވިދާޅުވީ ރާއްޖޭގައި މެންޓަލް ހެލްތުގެ ހެލްޕްލައިންތަކުގައި ކޯލްތަކަށް ޖަވާބުދާރީވުމަށް އެކަމަށް ހާއްސަ ތަމްރީން ލިބިފައިވާ މީހުން ތިބޭ މިންވަރު މަދު ކަމަށެވެ.
ކޯލްތަކަށް ޖަވާބުދާރީވުމަށް އިދާރީ މުވައްޒަފުންގެ އިތުރުން ސައިކޮލޮޖިސްޓުންނާއި ކައުންސިލަރުންނާއި ސޯޝަލް ވޯކަރުން އަދި ސައިކޭޓްރިސްޓުން ވެސް ޝާމިލުވާނެ ނިޒާމެއް ގާއިމުކުރުން މުހިންމު ކަމަށް ވެސް އޭނާ ފާހަގަކުރެއްވި އެވެ.
ރެޕަޓުއާ ވިދާޅުވީ ރާއްޖޭގެ ސިއްހީ ދާއިރާއަށް ޑިޖިޓައިޒޭޝަން މުހިންމު ނަމަވެސް، ޑިޖިޓަލް މާހައުލުގައި ހާމަކަން ބޮޑު ގޮތެއްގައި ކަންކަން ނުހިނގުމާއި، އިންސާނީ ހައްގުތަކަށް އުނިކަން ނާންނާނެ ފަދަ ރައްކާތެރިކަމުގެ އޮނިގަނޑެއް ނެތުމަކީ އޮތް ގޮންޖެހުމެއް ކަމަށެވެ.
"ޑިޖިޓައިޒޭޝަންގައި ދެފުށްފެންނަ ގޮތަށް އަމަލުތައް ނުބެހެއްޓުމާއި އިންސާނީ ހައްގުތައް ކަށަވަރުވާނެ ގޮތަށް ރައްކާތެރި އޮނިގަނޑެއް ނެތުމަކީ މައުލޫމާތު ލީކުވުމަށް އޮތް ހުރަހެއް،" އޭނާ ވިދާޅުވި އެވެ.
މިދިޔަ އެޕްރީލް 23، ގައި ނޫސްވެރިންނާ ބައްދަލުކުރައްވާ އިހުސާން ވަނީ ފުލުހުންގެ ވިކްޓިމް ސަޕޯޓާ ދެމެދު ކުރި މެސެޖުތައް އާންމުކޮށްފަ އެވެ. އެކަމާ ގުޅިގެން އާންމުންގެ ފާޑުކިޔުންތައް އިހުސާނަށް އަމާޒުވި އެވެ. އެކަމާ ގުޅިގެން މުހައްމަދު މުއިއްޒު ވަނީ އިހުސާން އެ މައުލޫމާތުތައް ހިއްސާކުރުން ދިފާއުވެސް ކުރައްވާފަ އެވެ.
ޒާތީ މައުލޫމާތު ރައްކާތެރިކުރުމުގެ ޑޭޓާ ޕްރޮޓެކްޝަން ބިލެއް މި ހިނގާ ރައްޔިތުންގެ މަޖިލީހުގެ ދައުރުގެ ތެރޭގައި ހުށަހަޅުއްވާނެ ކަމަށް ބަންޑާރަނައިބު އަހުމަދު އުޝާމް މިދިޔަ ބުދަ ދުވަހު ވިދާޅުވި އެވެ.
"މިއީ އާންމު ރައްޔިތުންގެ ޒާތީ މައުލޫމާތު ރައްކާތެރިކުރުމުގެ ގޮތުން ހާމަކަން ބޮޑު، ޖަވާބުދާރީ ކުރުވަނިވި ގޮތެއްގައި އެ މައުލޫމާތު އެއްކުރުމާއި، ޕްރޮސެސްކުރުމާއި، ބޭނުންކުރުމުގެ ނިޒާމެއް ގާއިމުކޮށް، ޒާތީ މައުލޫމާތު ނިސްބަތްވާ މީހުންގެ ހައްގުތަކާ މައުލޫމާތު އެއްކުރާ އަދި ޕްރޮސެސްކުރާ ފަރާތްތަކުގެ ޒިންމާތައް ކަނޑައަޅާ، އެ ފަރާތްތައް ރެގިއުލޭޓުކުރުމާ ބެހޭ އުސޫލުތައް ކަނޑައަޅާނެ ބިލެއް، ގާނޫނެއް،" އުޝާމް ވިދާޅުވި އެވެ.
