ކަލްކަތާ، އިންޑިއާ (މެއި 6) - އިންޑިއާގެ މައި ފުޓްބޯޅަ ލީގު، އިންޑިއަން ސުޕަ ލީގު (އައިއެސްއެލް)ގެ އީސްޓް ބެންގޯލް އަށް އިރުޝާދު ދެމުން އަންނަ ރާއްޖޭގެ ނިއު ރޭޑިއަންޓް ސްޕޯޓްސް ކްލަބްގެ ކުރިގެ ކޯޗު، އޮސްކާ ބްރުޒޮން، އީސްޓް ބެންގޯލްގައި، އިނގިރޭސި ކުރީގެ ފޯވާޑް، ރޮބީ ފައުލާ ހަދާފައިވާ ރެކޯޑަކާ ހަމަކޮށްފި އެވެ.
އިންޑިއަން ސުޕަ ލީގުގެ މި ފަހަރުގެ ސީޒަނުގެ އެއް ވަނައިގައި ކަލްކަތާ އަށް ނިސްބަތްވާ އީސްޓް ބެންގޯލް އޮތީ 10 މެޗުން 21 ޕޮއިންޓް ހޯދައިގެންނެވެ. ދެ ވަނައިގައި އޮތް ޖަމްޝޭދުޕުރު އަށް ވަނީ 11 މެޗުން 21 ޕޮއިންޓް ލިބިފަ އެވެ.
ސްޕެއިނުގެ ކޯޗު އޮސްކާ، 2024 ވަނަ އަހަރުގެ އޮކްޓޫބަރު މަހު، އީސްޓް ބެންގޯލްގެ ކޯޗުކަމާ ހަވާލުވެ އަންނަނީ ކާމިޔާބު މަސައްކަތްތަކެއް ކުރަމުންނެވެ. ރާއްޖޭގެ ނިއު ރޭޑިއަންޓާއި ބަންގްލަދޭޝްގެ ބަޝުންދަރާ ކިންގްސްއާ އެކު އެ ދެ ގައުމުގައި ގިނަ ކާމިޔާބީތަކެއް ހޯދި އޮސްކާ މި ވަނީ، އީސްޓް ބެންގޯލްގައި ޖެހިޖެހިގެން ހަތް މެޗުން ބަލިނުވެ ހަމަކޮށް، 2020 ވަަނަ އަހަރު އީސްޓް ބެންގޯލްގަައި ލިވަޕޫލްގެ ކުރީގެ ފޯވާޑް ފައުލާ ހާސިލްކުރި ރެކޯޑަކާ އެއްވަރުކޮށްފަ އެވެ.
އެ ގޮތުން، އޮސްކާ ވަނީ ހަތަރު މެޗުން މޮޅުވެ، ތިން މެޗު އެއްވަރުކޮށްފަ އެވެ. އަދި، ފައުލާ ވަނީ ދެ މެޗުން މޮޅުވިއިރު، ފަސް މެޗުން އެއްވަރުކޮށްފަ އެވެ.
މި ފަހަރު ލީގުގައި އީސްޓް ބެންގޯލް ހަމައެކަނި ބަލިވީ ތިން ވަނަ މެޗުގައި 2-1 އިން ޖަމްޝޭދްޕުރު އަތުންނެވެ. އޭގެ ފަހުން ކުުޅުނު ހަތް މެޗުން ވެސް، އީސްޓް ބެންގޯލް ބަލިވެފައިނުވެ އެވެ.
އޮސްކާ، އިންޑިއާ ފުޓްބޯޅަ އަށް އެނބުރި އައީ ނުވަ އަހަރު ކޮށްފަ އެވެ. އެ ގޮތުން، މީގެ ކުރިން އޭނާ ވަނީ ނިކޮލަސް އަނެލްކާގެ އެސިސްޓަންޓް ކޯޗެއްގެ ގޮތުގައި މުމްބާއި ސިޓީގައި މަސައްކަތްކޮށްފަ އެވެ. ނިއު އަށް ހަތަރު ތަށި ހޯދައިދިން އޮސްކާ ވަނީ ބަޝުންދަރާއާ އެކު، ހަތް ޓްރޮފީ އުފުލާލައިފަ އެވެ.
