މުމްބާއީ، އިންޑިއާ (ނޮވެމްބަރު 13) - އަންނަ ސީޒަންގެ އިންޑިއަން ސުޕަ ލީގު (އައިއެސްއެލް) އިން ފެށިގެން ވީޑިއޯ އެސިސްޓަންޓް ރެފްރީ (ވީއޭއާރް) ބޭނުންކުރަން ފެށުމުގެ މަސައްކަތް އޯލް އިންޑިއާ ފުޓްބޯލް ފެޑެރޭޝަން (އޭއައިއެފްއެފް) އިން އަނެއްކާ ވެސް ފަށައިފި އެވެ.
އައިއެސްއެލްގެ މިހާރު ކުރިއަށްދާ ސީޒަނުން ފެށިގެން ވީއޭއާރް ބޭނުންކުރެވޭތޯ އޭއައިއެފްއެފް އިން ކުރި މަސައްކަތުގައި އަލި މަގެއް ނުފެނުނެވެ. ރިޕޯޓްތައް ބުނާގޮތުން، އޭއައިއެފްއެފް އިން ބޭނުންވާ ސިސްޓަމް ގެނެވޭ ވަރަށް ބަޖެޓް ހަމަޖެހިފައި ނެތެވެ.
އޭއައިއެފްއެފްގެ އިސް އޮފިޝަލް، ޓްރެވާ ކެޓްލް ވިދާޅުވީ، އިންޑިއަން ސުޕަ ލީގުގެ ކްލަބްތަކުން ރެފްރީންގެ ޝަކުވާކުރުމުގައި އަމަލުކުރަމުން އަންނަ ގޮތާ މެދު އޭނާ ވެސް ވިސްނަމުން އަންނަ ކަމަށެވެ. އަދި މި ކަމަށް ހައްލެއް ގެނެވޭނެ .އެންމެ ރަނގަޅު މަގަކީ ވީއޭއާރް ބޭނުންކުރަން ފެށުން ކަމަށް ވެސް ކެޓްލް ދެކެ އެވެ.
"މި ވަގުތު ކީ މެޗް އިންސިޑެންޓް (ކޭއެމްއައި) ގެ ކަންކަން ނިންމުމުގައި ރެފްރީންގެ ނިންމުންތައް އެ ހުރީ ގާތްގަނޑަކަށް 97 ޕަސެންޓްގައި، ދެން، އަންނަ ސީޒަނުން ފެށިގެން އަހަރެމެން މަސައްކަތް ކުރަމުން މި އަންނަ ވީއޭއާރް ފެށިއްޖިއްޔާ މި އަށް ވުރެ ހުރިހާ ކަމެއް ރަނގަޅުވެގެންދާނެ،" ކެޓްލް ވިދާޅުވި އެވެ.
އިންޑިއަން ސުޕަ ލީގުގެ އެކިއެކި ސީޒަންތަކުގައި ގިނަ ކުޅުންތެރިންތަކަކާއި ކޯޗުންނާއި މީޑިއާ އިން ވެސް ރެފްރީންގެ މައްސަލައިގައި ވަނީ ފާޑުކިޔައިފަ އެވެ. އެކަން ސީޒަނަކަށް ފަހު ސީޒަނެއް އަންނަނީ އިތުރުވަމުންނެވެ.
ބެލްޖިއަމްގައި މިހާރު ބޭނުންކުރަމުން އަންނަ ވީއޭއާރް-ލައިޓް ސިސްޓަމް އަކީ އިންޑިއާގައި ވެސް ބޭނުންކުރެވިދާނެ މޮޑެލެއް ކަމަށާއި އެކަން ކުރެވޭތޯ މަސައްކަތް ކުރަމުން އަންނަ ކަމަށް އިންޑިއާގެ ފުޓްބޯޅަ ރައީސް، ކަލްޔާން ޗޯބޭ ވަނީ ވިދާޅުވެފަ އެވެ.
