ކްލަބް މޯލްޑިވްސްގެ ފުޓްސަލް ސީޒަންގެ ފުރަތަަމަ މުބާރާތް، ކިންގްސް ކަޕް މި މަހު 22 ވަނަ ދުވަހު ފަށަން ނިންމާފައިވާ ކަމަށް ކްލަބް މޯލްޑިވްސް އިން ބުނެފި އެެވެ.
ކްލަބް މޯލްޑިވްސް އިން މި އަހަރު ޖުމްލަ އެކު، ހަތް މުބާރާތެއް ބޭއްވުމަށް ވަނީ ނިންމައިފަ އެވެ. އެ ގޮތުން، މުޅިން އަަލަށް އާ ފޯމެޓަކަށް ގިނަ ޓީމުތައް ބައިވެރިކޮށްގެން، މިދިޔަ އަހަރު ފުޅާކޮށް ބޭއްވި ކިންގްސް ކަޕް މި އަހަރު ކުރިއަށްދަނީ، ބައިވެރިވާ ޓީމުތަކުގެ އަދަދު 12 އަށް އިތުރުކޮށްގެންނެވެ.
މީގެ އެއް އަހަރު ކުރިން، ކްލަބް މޯލްޑިވްސް އިން ކިންގްސް ކަޕް ފެށީ އެއް މެޗު ކުޅެފައި ޗެމްޕިއަން ކަނޑައެޅޭ ގޮތަށެވެ. އެ އަހަރު ކްލަބް މޯލްޑިވްސް އިން ކިންގްސް ކަޕް ބޭއްވީ ރިސޯޓް ޗެމްޕިއަން، ޖޯލި މޯލްޑިވްސް އާއި އޭގެ ކުރިން އަހަރުގެ ކްލަބް މޯލްޑިވްސް ކަޕް ޗެމްޕިއަން، ކްލަބް ވެމްކޯގެ މެދުގައި ކުޅުނު މެޗަކުންނެވެ. ވެމްކޯ އެ މެޗުން މޮޅުވިއިރު، މިދިޔަ ފަހަރުގެ ކިންގްސް ކަޕްގައި ރާއްޖޭގެ އަށް ޗެމްޕިއަނެއް ކުޅުނު ކިންގްސް ކަޕް ތަށި ހޯދީ ރޯޑް ރެކްރިއޭޝަން ކްލަބް (އާރްއާރްސީ) އިންނެވެ.
ކްލަބް މޯލްޑިވްސް އިން މައުލޫމާތު ދިން ގޮތުގައި، މި ފަހަރުގެ މުބާރާތުގައި ކުޅޭނީ މިދިޔަ އަހަރުގެ ޗެމްޕިއަން، އާރްއާރްސީގެ އިތުރުން، ރަނަރަޕް، އެސްޓީއޯ ރެކްރިއޭޝަން ކްލަބާއި ރ. މީދޫގައި ކުރިއަށްދިޔަ ރާބަދި ޗެލެންޖުގެ ޗެމްޕިއަން، ކޮރަ ކޮރަ މޯލްޑިވްސް، ރިސޯޓް ލީގުގެ ޗެމްޕިއަން، ކޮންރަޑް، ކްލަބް މޯލްޑިވްސް ސެކްޓާ ލީގުގެ ރަނަރަޕް، ހޯކްސް، ކްލަބް މޯލްޑިވްސް ކްލަސިކްގެ ޗެމްޕިއަން، ކ. ގުރައިދޫ އަށް ނިސްބަތްވާ ހޯމް ފޯ ޕީޕަލް ވިތު ސްޕެޝަލް ނީޑްސް - އެޗްޕީއެސްއެން (ހާއްސަ އެހީއަށް ބޭނުންވާ މީހުންގެ މަޒުކަޒު) އާއި ރަނަރަޕް ބިނާރާ، ހދ. ކުޅުދުއްފުށި ސިޓީގައި އޮފީސްތަކަށް ބާއްވާ ޒިގްޒެގް މުބާރާތުގެ ޗެމްޕިއަންކަން ހޯދި ކްލަބް އެމްޓީސީސީ، ތިލައުތުރު ފުޓްސަލް ޗެމްޕިއަން، ހއ. އުތީމު، ފުވައްމުލަކު ސިޓީ ކައުންސިލް މުބާރާތުގެ ޗެމްޕިއަން، ފިސްޑާ، ބ. އޭދަފުށީ ފުޓްސަލް ކަޕް ރަނަރަޕް، އެއިޓީ ފޯ އަދި، އޮފީސް ލީގުގެ މިދިޔަ ދެ އަހަރުގެ ޗެމްޕިއަން، ސްޓެލްކޯ ރެކްރިއޭޝަން ކްލަބް އެވެ.
ކްލަބް މޯލްޑިވްސް އިން ބުނީ، ކިންގްސް ކަޕް 22 ވަނަ ދުވަހު ފެށުމަށް ފަހު، އީދަށް ބްރޭކެއް ނަގާނެ ކަމަށެވެ.
ކްލަބް މޯލްޑިވްސް އިން ވަނީ އެހެން މުބާރާތްތައް ބާއްވާނެ ތާރީހުތަކަށް ވެސް ބަދަލު ގެނެސްފަ އެވެ. އަންހެން ޑިވިޝަނުގެ އެއިޓީން ތާޓީ އާއި އެއިޓީން ތާޓީ ކްލަސިކް މުބާރާތް ފަށާނީ އަންނަ މަހު 21 ގަ އެވެ. އަންނަ މަަހުގެ 5 ވަނަ ދުވަހު ފަށާނީ ކުޑަކުދިންގެ ފުޓްސަލް މުބާރާތް، ކިޑްސަލް އެވެ. މިއީ، މިދިޔަ އަހަރު ހާއްސަ މެޗަކުން ލޯންޗް ކުރި މުބާރާތެކެވެ.
އަމިއްލަ ކުންފުނިތަކަށް ހާއްސަ، ކްލަބް މޯލްޑިވްސްގެ ސެކްޓާ ލީގު ފަށަން ނިންމާފައި އޮތީ ޖުލައި 21 ވަނަ ދުވަހު އެވެ. އެ މުބާރާތުގައި މިހާތަނަށް 18 ޓީމެއް ބައިވެރިވެފައިވާއިރު، އިތުރު ޓީމުތަކަށް ބައިވެރިވާން ވަނީ ފުރުސަތު ހުޅުވާލައިފަ އެވެ.
