ރާއްޖޭގައި އެންމެ ގިނަ ދުވަސްވީ ފުޓްސަލް މުބާރާތްތައް ބާއްވަމުން އަންނަ ކްލަބް މޯލްޑިވްސް އިން ބާއްވާ މި އަހަރުގެ މުބާރާތްތައް އަންނަ މަހު ފަށަން ނިންމައި، ޖުމްލަ އެކު ހަތް މުބާރާތް ބާއްވާ ގޮތަށް ކަލަންޑަރު އާންމުކޮށްފި އެވެ.
އެ ގޮތުން، މިދިޔަ އަހަރެކޭ އެއްގޮތަށް މި ފަހަރުގެ ކްލަބް މޯލްޑިވްސްގެ ސީޒަން ފަށާނީ ވެސް ކިންގްސް ކަޕް އިންނެވެ. ކިންގްސް ކަޕް ފަށަން ކްލަބް މޯލްޑިވްސް އިން ނިންމާފައި އޮތީ މެއި 15 ވަނަ ދުވަހު އެވެ. އެ އަށް ފަހު، އަންނަ މަހުގެ 17 ވަނަ ދުވަހު، އަންހެން ޑިވިޝަނުގެ އެއިޓީން ތާޓީ ކްލަސިކް މުބާރާތް ފަށާނެ އެވެ.
އަންނަ މަަހުގެ 30 ވަނަ ދުވަހު ފަށާނީ ކުޑަކުދިންގެ ފުޓްސަލް މުބާރާތް، ކިޑްސަލް އެވެ. މިއީ، މިދިޔަ އަހަރު ހާއްސަ މެޗަކުން ލޯންޗް ކުރި މުބާރާތެކެވެ.
އަންނަ މަހު 31 ވަނަ ދުވަހު ފަށާނީ ކްލަބް މޯލްޑިވްސްގެ އަންހެން މުބާރާތް، އެއިޓީން ތާޓީ އެވެ. އެ އަށް ފަހު، ޖޫން 7 ވަނަ ދުވަހު، ކްލަބް މޯލްޑިވްސް ކްލަސިކް ފަށާ ގޮތަށް ވަނީ ނިންމައިފަ އެވެ.
ކްލަބް މޯލްޑިވްސްގެ އެންމެ ގިނަ ދުވަސްވީ މުބާރާތް ކްލަބް މޯލްޑިވްސް ކަޕް ފަށާނީ، ޖޫން 20 ވަނަ ދުވަހު އެވެ. އަދި، ކްލަބް މޯލްޑިވްސް ފުޓްސަލް ސީޒަންގެ ފަހު މުބާރާތް، އަމިއްލަ ކުންފުނިތަކަށް ހާއްސަ، ސެކްޓާ ލީގު ފަށަން ނިންމާފައި އޮތީ ޖުލައި 21 ވަނަ ދުވަހު އެވެ.
މިދިޔަ އަހަރު ކްލަބް މޯލްޑިވްސް ކަޕާއި ކިންގްސް ކަޕްގެ ޗެމްޕިއަންކަން ހޯދީ ރޯޑް ރެކްރިއޭޝަން ކްލަބް (އާރްއާރްސީ) އިންނެވެ. ސެކްޓާ ލީގުގެ ޗެމްޕިއަންކަން އެރީނާ ހޮޓެލްސް އިން ހޯދިއިރު، ކްލަބް މޯލްޑިވްސް ކްލަސިކް ޗެމްޕިއަނުންނަކީ، ކ. ގުރައިދޫ އަށް ނިސްބަތްވާ ހޯމް ފޯ ޕީޕަލް ވިތު ސްޕެޝަލް ނީޑްސް - އެޗްޕީއެސްއެން (ހާއްސަ އެހީއަށް ބޭނުންވާ މީހުންގެ މަޒުކަޒު) އެވެ. އެއިޓީން ތާޓީ މުބާރާތް ދިވެހި ސިފައިންގެ ކްލަބުން ހޯދިއިރު، އެއިޓީން ތާޓީ ކްލަސިކްގެ ޗެމްޕިއަނުންނަކީ، ޕްރިޒަން ކްލަބް އެވެ.
