އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ އެންމެ އިސް މަގާމު ކަމަށްވާ ޗެއާޕާސަން ކަމަށް ވާދަކުރައްވަނީ އެ ޕާޓީ އަލުން ރާވާލުމަށް ކަމަށް ގަލޮޅު ދެކުނު ދާއިރާގެ މެންބަރު މީކާއިލް ނަސީމް ވިދާޅުވެއްޖެ އެވެ.
އަންނަ ޖޫން 12، ގައި އޮންނަ އެމްޑީޕީގެ ޗެއާޕާސަން އިންތިހާބުގެ ކެމްޕޭން ފޯރި ގަދަވެފައިވާއިރު ރޭ މީކާއިލް ވަނީ ކެެެމްޕޭން ޖަލްސާއެެއް ބާއްވާފަ އެވެ. އެ ޖަލްސާގައި މީކާއިލް ވަނީ އޭނާ އެންމެ ފަހުން އަރިއަތޮޅަށް ކުރެއްވި ކެމްޕޭން ދަތުރުގައި އެ ޕާޓީގެ ބައެއް މެންބަރުން ކަންބޮޑުވުންތަކެއް ހިއްސާކުރެއްވި ކަމަށް ވިދާޅުވެފަ އެވެ.
“ލީކުވަމުންނޭ ދަނީ. އަޅުގަނޑު އިންތިހާބަށް ނުކުމެ މި ހުރީ މި ލީކުތައް ބައްދާލަން. އިންތިހާބަށް ނުކުމެ މި ހުރީ މި ޕާޓީގެ އާންމު މެންބަރުން އަޑުއައްސަވާ، މި ޕާޓީ ރާވާލަންވެގެން، ރާވާލާނަން، ރާވާލާނަން 2028 އަށް މި ޕާޓީ ރާވާލަދޭނަން،” މީކާއިލް ވިދާޅުވި އެވެ.
ޗެއާޕާސަން އިންތިހާބުގެ ޓައިމްލައިން ބާތިލުކުރުމަށް ސިވިލް ކޯޓަށް މައްސަލައެއް ވެއްދުމުން މީކާއިލް ވަނީ ފާޑު ވިދާޅުވެފަ އެވެ. އެ މައްސަލަ ވެއްދީ ކުރީގެ ރައީސް މުހައްމަދު ނަޝީދުގެ ފަރާތުން ކަމަށް މީކާއިލްގެ ކެމްޕުން ތުހުމަތު ކުރެ އެވެ. ނަމަވެސް، ނަޝީދުގެ ކޭމްޕުން ވަނީ އެކަން ދޮގުކޮށްފަ އެވެ.
”އަޅުގަނޑުމެންގެ މަސްލަހަތު ނަގާލައި ކޯޓަށް ދާނެ މީހަކަށް އަޅުގަނޑު ނުވާނަން. އަޅުގަނޑަށް އިތުބާރު ކުރައްވާ އިންތިހާބު ކާމިޔާބުކުރާނީ ވެސް އާންމު މެންބަރުުންގެ އިތުބާރާއެކު،” މީކާއިލް ވިދާޅުވި އެވެ.
އެމްޑީޕީގެ އާންމު މެންބަރުންނަށް އޮޅުވާލައި އެ މީހުންގެ ޖަޒުބާތުގެ ފައިދާ ނަގާނެ މީހަކަށް ނުވާނެ ކަމަށް މީކާއިލް ވިދާޅުވި އެވެ.
“އަޅުގަނޑެއް ނުދެކެން މި އިންތިހާބަކީ ހަމައެކަނި މަގާމެއް ހޯދުމަށް އޮތް އިންތިހާބެއް ކަމަކަށް. އަދި އިންތިހާބު ކާމިޔާބު ކުރަން ބޭނުންވަނީ އެމްޑީޕީގެ އާންމު މެންބަރުން 16 އަހަރު ވަންދެން އަޅުގަނޑު އެ ބަޔަކާއެކު ކެނޑިނޭޭޅި މަސައްކަތް ކުރި އާންމު މެންބަރުންގެ ވޯޓާއެކު،” މީކާއިލް ވިދާޅުވި އެވެ.
މި އިންތިހާބުގައި އެންމެ ބޮޑު ވާދަވެރިކަމެއް ފެެންނަނީ ނަޝީދު އާއި މީކާއިލްގެ ފަރާތުންނެވެ. އެ ދެ ބޭފުޅުން ވެސް ގެންދަވަނީ ބާރު ސްޕީޑުގައި ކެމްޕޭން ކުރައްވަމުންނެވެ.
އެމްޑީޕީގެ އަސާސީ ގަވާއިދުގައިވާ ގޮތުން ޗެއާޕާސަން އަކީ ޕާޓީގެ އެތެރޭގެ ކަންކަން ރާވާ އިންތިޒާމުކޮށް ބަލަހައްޓާ އެންމެ އިސް ފަރާތެވެ. ޗެއާޕާސަންގެ ދައުރަކީ ފަސް އަހަރު ދުވަހު އެވެ.
ޗެއާޕާސަންގެ މަސްއޫލިއްޔަތުތަކުގެ ތެރޭގައި ޕާޓީގެ ފަރާތުން ސަރުކާރާއި އެހެނިހެން ސިޔާސީ ފަރާތްތަކާއި މުއާމަލާތް ކުރުމާއި، އެތެރޭގެ އިންތިހާބުތައް ރާވާ އިންތިޒާމު ކުރުމާއި، ކޮންގުރެސް އާއި ގައުމީ މަޖިލީހާއި ގައުމީ ހިންގާ ކޮމިޓީގެ ރިޔާސަތު ބެލެހެއްޓުމާއި، ޕާޓީގެ އިދާރީ ކަންކަމުގެ މަސްއޫލިއްޔަތު އުފުލުން ހިމެނެ އެވެ.
