ގދ. ނަޑެއްލާގައި ފުލުހުން ކުރިއަށްގެންދާ ޑްރަގް އޮޕަރޭޝަނެއްގައި އެ ރަށުގައި ހުންނަ ޕީޕަލްސް ނެޝަނަލް ކޮންގްރެސް (ޕީއެންސީ) ހަރުގެ މިއަދު ރެއިޑުކޮށްފި އެވެ.
އަދަދު އަށް އެކި މަސްދަރުތަކުން ކަށަވަރު ކުރެވިފައިވާ ގޮތުގައި ނަޑެއްލާގައި ހުންނަ ޕީއެންސީ ހަރުގެ ރެއިޑުކުރީ އެތަނުގައި މަސްތުވާތަކެތި ހުރި ކަމަށް ތުހުމަތުކުރެވިގެންނެވެ.
އެގޮތުން ހަރުގެ ހިމެނޭ ސަރަހައްދު ވަށައިގެން ކޯޑަން ކުރުމަށްފަހު އެތަން ފުލުހުން ބަލައި ފާސްކޮށްފައިވެ އެވެ. ނަމަވެސް ހަރުގެ ތެރެއިން މަސްތުވާތަކެތި ފެނުނު ކަމެއް މިހާތަނަށް ކަށަވަރު ކުރެވިއެއް ނުވެ އެވެ.
މައުލޫމާތު ލިބިފައިވާ ގޮތުގައި ފުލުހުން މި ޑްރަގް އޮޕަރޭޝަން ފެށީ ނަޑެއްލާއަށް ދަތުރުކުރި ޖަޒީރާ ނަމަކަށް ކިޔާ ބޯޓަކުން މަސްތުވާތަކެތި ހުރި ފޮށިގަނޑެއް ބަނދަރު ސަރަހައްދުން އަތުލައިގަތުމަށްފަހު އެވެ.
މަސްތުވާތަކެއްޗާއެކު ފުލުހުން ހައްޔަރުކުރީ ސިޔާސީ މަގާމެއްގައި ހުރި މީހެއް ކަމަށް މައުލޫމާތު ލިބެ އެވެ. އެކަމަކު އެކަންވެސް ފުލުހުން މައުލޫމާތު ހާމަނުކުރާތީ ކަށަވަރެއް ނުވެ އެވެ.
މިކަމާ ގުޅިގެން ފުލުހުން މިހާތަނަށް އެއްވެސް އެއްޗެއް ބުނެފައެއް ނުވެ އެވެ.
