އެމެރިކާ އުފެދުނުތާ 250 އަހަރު ފުރުން ފާހަގަކުރުމަށް ބާއްވާ މިއުޒިކް ކޮންސެޓަކީ ވައިޓް ހައުސްއާ ގުޅުން އޮތް ހަރަކާތެއް ކަމަށް ބުނެ ގިނަ ފަންނާނުންތަކެއް ކޮންސެޓްގައި ބައިވެރިނުވާން ނިންމުމުން ރައީސް ޑޮނަލްޑް ޓްރަމްޕް ހިތްހަމަނުޖެހިއްޖެ އެވެ.
ޓްރަމްޕްގެ އަމިއްލަ ސޯޝަލް މީޑިއާ ޕްލެޓްފޯމް "ޓްރުތް ސޯޝަލް" ގައި އެމަނިކުފާނު ކުރެއްވި ޕޯސްޓެއްގައި، އެ ހަރަކާތް "ކެންސަލް ކުރާށޭ" ވިދާޅުވެ، އެ ޝޯތަކުގައި ބައިވެރިވާން ތިބި ފަންނާނުންނަކީ އަގުބޮޑު އަދި "ފޫހި" ބައެއްގެ ގޮތުގައި ވަނީ ސިފަކުރައްވާފަ އެވެ.
މިދިޔަ ބުދަ ދުވަހު އިއުލާންކުރި ނުވަ ފަންނާނުންގެ ތެރެއިން އާދީއްތަ ދުވަހާ ހަމައަށް ޝޯގައި ބައިވެރިވާން ބާކީ ތިބީ މަދު ބައެކެވެ. މާޓީނާ މެކްބްރައިޑް، ދަ ކޮމޮޑޯސް، ޔަންގް އެމްސީ އަދި ބްރެޓް މައިކަލްސް ވަނީ މި ހަރަކާތުން ވަކިވެފަ އެވެ.
ޖޫން 26 ގައި ބާއްވާ ޝޯގައި ވެނީލާ އައިސް އަދި މިލީ ވަނީލީ ބައިވެރިވުމަށް ހަމަޖެހިފައިވާއިރު، ޖުލައި 2 ގައި ފްލޯ ރައިޑާގެ ހުށަހެޅުންތައް ފެންނާނެ އެވެ. ޓްރަމްޕް ވިދާޅުވީ މި ހަރަކާތުގެ ބަދަލުގައި "މޭކް އެމެރިކާ ގްރޭޓް އަގެއިން" (މާގާ) ރެލީއެއް ބޭއްވުމަށް މިހާރު ވިސްނަވަމުން ގެންދަވާ ކަމަށެވެ.
"ގްރޭޓް އެމެރިކަން ސްޓޭޓް ފެއާ" ކޮންސެޓް ސިލްސިލާ އިންތިޒާމުކުރާ "ފްރީޑަމް 250" ގްރޫޕަކީ މިދިޔަ އަހަރު ޓްރަމްޕްގެ ސަރުކާރުން އުފެއްދި ޖަމިއްޔާއެކެވެ. އަދި އެތަނުގެ ސީއީއޯ އަކީ ވެސް ޓްރަމްޕް އައްޔަންކުރެއްވި ބޭފުޅެކެވެ. ނަމަވެސް އެ ޖަމިއްޔާއިން ބުނަނީ އެއީ ވަކި ސިޔާސީ ފިކުރަކަށް ތާއީދުކުރާ ހަރަކާތެއް ނޫން ކަމަށެވެ.
ފްރީޑަމް 250 އިން ހޮނިހިރު ދުވަހު އިއުލާންކުރި ގޮތުގައި، މި ކޮންސެޓް ހުޅުވުމުގެ ރަސްމިއްޔާތުގައި އެންމެ އިސްކޮށް ބައިވެރިވެވަޑައިގަންނަވާނީ ޓްރަމްޕެވެ.
އެމެރިކާގެ 250 ވަނަ އަހަރީ ދުވަހުގެ ހަރަކާތްތައް ރާވައި ބެލެހެއްޓުމަށްޓަކައި "އެމެރިކާ 250" ގެ ނަމުގައި ކޮންގްރެސް އިން މީގެ ދިހަ އަހަރު ކުރިން އިދާރާއެއް އުފައްދާފައިވެ އެވެ.
އެ އިދާރާ ހިންގަނީ ޑިމޮކްރެޓުންނާއި ރިޕަބްލިކަން ޕާޓީގެ މެންބަރުން ހިމެނޭ ބޯޑަކުންނެވެ. އެ އިދާރާގެ އަމިއްލަ ހަރަކާތްތަކުގެ ތެރޭގައި ނިއު ޔޯކް ސިޓީ، ފިލަޑެލްފިއާ އަދި ކެލިފޯނިއާގައި ބާއްވާ ޖުލައި 4 ގެ އުފާފާޅުކުރުންތަކާއި، އެމެރިކާގެ އެކި ކަންކޮޅުތަކުގައި ބާއްވާ މަގުމަތީގެ ހަރަކާތްތައް ހިމެނެ އެވެ.
