މުމްބައި، އިންޑިއާ (އޭޕްރީލް 13) - މިހާރު ކުރިއަށްދާ ދުނިޔޭގެ އެންމެ ވަރުގަދަ ފްރެންޗައިސް ކްރިކެޓް ލީގު، އިންޑިއަން ޕްރިމިއާ ލީގު (އައިޕީއެލް)ގެ އެންމެ ފަހުގެ ޗެމްޕިއަން، ރޯޔަލް ޗެލެންޖާސް ބެންގަލޫރު (އާރްސީބީ) އިން 18 ލަނޑުން މުމްބައި އިންޑިއަންސް (އެމްއައި) ބަލިކޮށް އަލުން ފޯމަކަށް އެޅިއްޖެ އެވެ.
އާރްސީބީން ވަނީ ފުރަތަމަ ދެ މެޗުން ސަންރައިޒާސް ހައިދަރުއާބާދާއި ޗެންނާއި ސުޕަ ކިންގްސް (ސީއެސްކޭ) ބަަލިކޮށްފަ އެވެ. އެކަމަކު އެންމެ ފަހުން ކުޅުނު މެޗުން ވަނީ ރާޖަސްތާން ރޯޔަލްސް އަތުން ހަ ވިކެޓުން ބަލިވެފަ އެވެ. އޭގެ ފަހުން، ކުޅުނު މެޗަކީ ރޭ މުމްބައި އިންޑިއަންސްއާ ވާދަކުރި މެެޗެވެ. އެ މެޗުން، ބެންގަލޫރު މޮޅުވިއިރު، މުމްބައި މި ވަނީ މި ފަހަރުގެ މުބާރާތުގައި ކުޅުނު ހަތަރު މެޗުގެ ތެރެއިން ތިން މެޗުން ބަލިވެފަ އެވެ.
މުމްބައިގެ މަޝްހޫރު ވަންކެޑޭ ސްޓޭޑިއަމްގައި ރޭ ކުޅުނު މެޗުގައި ޓޮސް ދިމާވުމުން މުމްބައި އިން ނިންމީ ފީލްޑް ކުރުމަށެވެ. ބެންގަލޫރުން ކުޅެން އަރައި، 20 އޯވަރުގެ ތެރޭގައި ހަތަރު ކުޅުންތެރިން ނުބައިވެެގެން ވަނީ 240 ލަނޑު ހަދައިފަ އެވެ. ބެންގަލޫރުގެ ފިލް ސޯލްޓް 36 ބޯޅައިން 78 ލަނޑަށް ނުބައިވިއިރު، ވިރާތު ކޯލީ ވަނީ 38 ބޯޅައިން 50 ލަނޑު ހަދައިފަ އެވެ. ބެންގަލޫރުގެ ކެޕްޓަން، ރަޖަތު ޕަތީދާރު ވަނީ 20 ބޯޅައިން 53 ލަނޑު ހަދައިފަ އެވެ.
ޖަވާބުގައި ކުޅެން އަރައި، 20 އޯވަރުގެ ތެރޭގައި ފަސް ކުޅުންތެރިން ނުބައިވިއިރު، މުމްބައި އަށް ހެދުނީ 222 ލަނޑެވެ. އެ ޓީމުން އެންމެ ރަނގަޅަށް ކުޅުނު ގުޔާނާގެ ޝެފާން ރުތަފޯޑް ވަނީ 31 ބޯޅައިން 71 ލަނޑު ހަދައިފަ އެވެ. އަދި، ހާޑިކް ޕާންޑްޔާ، 22 ބޯޅައިން 40 ލަނޑު ހެދިއިރު، ސޫރްޔަކުމާރު ޔާދަވް ވަނީ 22 ބޯޅައިން 33 ލަނޑު ހަދައިފަ އެވެ.
ބެންގަލޫރުގެ ސުޔަޝް ޝަރްމާ ވަނީ މި އިނިންގްސްގައި، ހަތަރު އޯވަރަށް ދެ ވިކެޓް ނަގައިފަ އެވެ.
އައިޕީއެލްގެ މި ވަގުތުގެ ތާވަލަށް ބަލާއިރު، އެއް ވަނައިގައި އޮތް ރާޖަސްތާން ރޯޔަލްސް ވަނީ ހަތަރު މެޗުން މޮޅުވެ، އަށް ޕޮއިންޓް ހޯދައިފަ އެވެ. ދެ ވަނައިގައި އޮތް ޕަންޖާބް ކިންސް އަށް ހަތަރު މެޗުން ހަތް ޕޮއިންޓް ލިބިފައިވާއިރު، ތިން ވަނައިގައި އޮތް ބެންގަލޫރުން ވަނީ ހަތަރު މެޗުން ހަ ޕޮއިންޓް ހޯދައިފަ އެވެ.
ޖުމްލަ އެކު، 10 ޓީމު ވާދަކުރާ އައިޕީއެލް ތާވަލުގެ އެންމެ ފުލުގައި އޮތް ތިން ޓީމަކީ މުބާރާތުގެ އެންމެ ކާމިޔާބު ޓީމުތަކެވެ. އެ ގޮތުން، އެންމެ ފުލުގައި އޮތީ ތިން ފަހަރު ތަށި ހޯދި ކަލްކަތާ ނައިޓް ރައިޑާސް (ކޭކޭއާރް) އެވެ. ނުވަ ވަނައިގައި އޮތް ޗެއްނާއި އާއި އަށް ވަަނައިގައި އޮތް މުމްބައި އިން ވަނީ ކޮންމެ ޓީމެއް ފަސް ފަހަރު ތަށި ހޯދައިފަ އެވެ.
