ރާއްޖެއަށް މުދާ އެތެރެކުރާ ބަނދަރުތައް ބަލަހައްޓާ މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ޑިރެކްޓަރުންގެ ބޯޑުގެ އެގްޒެކްޓިވް މެންބަރުކަމުގެ މަގާމުން އިބްރާހިމް ޒިޔަތު ވަކިކޮށް، އެ މަގާމަށް މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) ގެ ޑެޕިއުޓީ މެނޭޖިން ޑިރެކްޓަރުގެ މަގާމުން އިސްތިއުފާދެއްވި މުހައްމަދު ލައްމާން މިއަދު އައްޔަނުކޮށްފި އެވެ.
ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ބުނީ ލައްމާން އައްޔަންކުރީ އެމްޕީއެލްގެ ޑިރެކްޓަރުންގެ ބޯޑުގެ އެގްޒެކްޓިވް މެންބަރުގެ މަގާމަށް މިއަދުން ފެށިގެން ކަމަށެވެ.
އެމްޕީއެލްގެ ޑިރެކްޓަރުންގެ ބޯޑުގައި ޒިޔަތު ފުރުއްވަމުން ގެންދެވި މަގާމަށް ލައްމާން އައްޔަންކުރެއްވި ނަމަވެސް، ޒިޔަތު ދަނީ އަދިވެސް އެމްޕީއެލްގެ ޑެޕިއުޓީ ސީއީއޯގެ މަގާމު ފުރުއްވަމުންނެވެ. އެ މަގާމުން އޭނާ ވަކިކުރެވޭނީ އެމްޕީއެލްގެ ޑިރެކްޓަރުންގެ ބޯޑަށެވެ.
އެމްއޭސީއެލްގެ ޑީއެމްޑީގެ މަގާމުން ލައްމާން އިސްތިއުފާ ދެއްވީ އޭނާގެ މައްޗަށް ކޮރަޕްޝަންގެ ގިނަ ތުހުމަތުތަކެއް އަމާޒުވެފައި ވަނިކޮށެވެ. ނަމަވެސް އެ ތުހުމަތުތައް އޭނާ ވަނީ މިއަދު ދޮގުކުރައްވާފަ އެވެ.
ފެނަކަ ކޯޕަރެޝަންގެ އެމްޑީގެ މަގާމު ކުރިން ފުރުއްވާފައިވާ ލައްމާން ވަނީ މިފްކޯގެ ޗީފް ހިއުމަން ރިސޯސް އޮފިސަރުގެ މަގާމާއި، ޗީފް ޕްރޮކިއުމަންޓް އޮފިސަރުގެ މަގާމު ފުރުއްވާފަ އެވެ. އޭނާ ވަނީ ޔުނިވާސިޓީ އޮފް ކޮލަމްބޯއިން މާސްޓާ އޮފް ބިޒްނަސް އެޑްމިނިސްޓްރޭޝަން ހާސިލުކުރައްވާފައިވާފަ އެވެ.
