މަސައްކަތުގެ މާހައުލުގައި ހިންގާ ޖިންސީ ކޮރަޕްޝަންތަކާ ދެކޮޅަށް ތެދުވަން ޓްރާންސްޕޭރަންސީ މޯލްޑިވްސް އިން މިއަދު ގޮވާލައިފި އެވެ.
މެއި 1، ގައި ފާހަގަ ކުރާ ބައިނަލްއަގުވާމީ މަސައްކަތްތެރިންގެ ދުވަހުގެ މުނާސަބަތުގައި ކުރި ޕޯސްޓެއްގައި އެ ޖަމިއްޔާއިން ބުނީ ފައިސާ އާއި މާލީ މަންފާގެ ބަދަލުގައި ޖިންސީ އަމަލު ހިމެނޭ ކޮރަޕްޝަނަކީ ވެސް ހިނގަމުންދާ، އާންމު ކަމެއް ކަމަށެވެ.
"ޖިންސީ ކޮރަޕްޝަނަކީ ބާރުވެރި މަގާމެއްގައި ހުރި މީހަކު، ޖިންސީ ކަމަކަށް އެދުން ނުވަތަ [މުވައްޒަފަކާމެދު] އެފަދަ އަމަލެއް ހިންގުން. މިފަދަ ކޮރަޕްޝަންތަކުގައި ފައިސާގެ ބަދަލުގައި ބަދަލު ކުރެވޭ އެއްޗަކީ ޖިންސީ އަމަލު،" ޓްރާންޕޭރަންސީ އިން ބުނެފައިވެ އެވެ.
ބާރުވެރި މަގާމެއްގައި ހުރި މީހަކު އޭނާގެ ބާރު ނަހަމަ ގޮތުގައި ބޭނުން ކުރުމާއި ކަމެއް ކޮށްދިނުމުގެ ބަދަލުގައި އިތުރު މަންފާއަކަށް އެދުމާއި ބާރުވެރި މަގާމުގައި ހުރި މީހާ ބޭނުންވާ ކަމަކީ ޖިންސީ އެދުމަކަށްވުމަކީ އެފަދަ ކޮރަޕްޝަންތަކުގެ ބައެއް ސިފަތައް ކަމަށް ޓްރާންސްޕޭރަންސީ އިން ބުނެ އެވެ.
ޖިންސީ ކޮރަޕްޝަނަށް ސަމާލުވުމަށް ގޮވާލައި، ޓްރާންޕޭރަންސީ އިން ބުނީ، އެފަދަ ކޮރަޕްޝަންތަކަކީ މަސައްކަތުގެ ވަކި މާހައުލެއްގައި އެކަނި ހިނގާ ކަމެއް ނޫން ކަމަށެވެ.
"ޖިންސީ ކޮރަޕްޝަނަކީ މަސައްކަތުގެ ވަކި ހާއްސަ މާހައުލެއްގައި އެކަނި ހިނގާ ކަމެއް ނޫން. ނަޒާހާތްތެރި ނޫން މީހަކު ބާރުވެރި މަގާމެއްގައި ހުރެއްޖެ ނަމަ ކޮންމެ ފަދަ ތަނެއްގައި ވެސް މިފަދަ ކަންކަން ހިނގާފާނެ. އެފަދަ މީހުން ބަލާނީ އޭނާއަށް ބަރޯސާވާ އަދި ނާޒުކު ހާލަތްތަކުގައި ތިބި މުވައްޒަފުން ޖިންސީ ގޮތުން އެކްސްޕްލޮއިޓް ކުރަން،" އެ ޖަމިއްޔާއިން ބުންޏެވެ.
ޖިންސީ ކޮރަޕްޝަނަކީ، އެފަދަ ކަންކަމާ ދެކޮޅަށް އަޑު އުފުލައި އަދި މަސައްކަތް ނުކޮށްފި ނަމަ ފުޅާވެ ފެތުރެމުންދާ މުޑުދާރު އަމަލެއް ކަމަށް ޓްރާންސްޕޭރަންސީ އިން ބުނެ އެވެ. ޖިންސީ ކޮރަޕްޝަން ރާއްޖޭގައި އަށަގަނެފައިވާ މިންވަރު ހޯދަން ދިރާސާއެއް ކުރަން ވެސް އެ ޖަމިއްޔާއިން ވަނީ ނިންމައިފަ އެވެ.
