ރިފޯމް ޔޫކޭގެ ލީޑަރު ނައިޖަލް ފަރާޖް އިނގިރޭސިވިލާތުގެ ގާނޫނު ހަދާ މަޖިލީހުގެ މެންބަރަކަށް އިންތިހާބުވުމުގެ ކުރިން އެ ޕާޓީގެ ބޮޑު އެހީތެރިއެއް ކަމަށްވާ ކްރިސްޓޮފަރ ހާބޯންގެ އަތުން ފަސް މިލިއަން ޕައުންޑް ހަދިޔާގެ ގޮތުގައި ހޯއްދަވާފައިވާކަން ހާމަވެއްޖެ އެވެ. މި ފައިސާއަކީ އޭނާގެ މުޅި އުމުރަށް ބޭނުންވާ ސަލާމަތާއި ރައްކާތެރިކަން ކަށަވަރުކުރުމަށްޓަކައި އަމިއްލަ ސެކިއުރިޓީއަށް ހަރަދުކުރުމަށް ދިން ފައިސާއެއް ކަމަށް ފަރާޖް ވަނީ ވިދާޅުވެފަ އެވެ.
ދަ ޓެލެގްރާފް ނޫހަށް ދެއްވި އިންޓަވިއުއެއްގައި ފަރާޖް ވިދާޅުވީ މިދިޔަ އަހަރު އޭނާ ދިރިއުޅޭ ގެއަށް އަލިފާން ބޮމުގެ ހަމަލާއެއް ދީފައިވާ ކަމަށެވެ. އަދި އޭނާގެ ސަލާމަތާ މެދު ހާބޯން ކަންބޮޑުވުން ފާޅުކުރަން ފެށީ 2019 ވަނަ އަހަރު ކެމްޕޭން ހަރަކާތެއްގެ ތެރެއިން އޭނާގެ ގަޔަށް މިލްކްޝޭކް ޖެހި ހާދިސާއަށް ފަހު ކަމަށްވެސް ފަރާޖް ފާހަގަކުރެއްވި އެވެ. ދައުލަތުގެ ފަރާތުން ސަލާމަތީ ކަންކަން ހަމަޖައްސައިދިނުމަށް އެދި ކުރި މަސައްކަތް ނާކާމިޔާބުވެފައިވާތީ، އަމިއްލަ ރައްކާތެރިކަން ހޯދުމަކީ މަޖުބޫރު ކަމެއް ކަމަށް އޭނާ ވިދާޅުވި އެވެ.
ނަމަވެސް މި ފައިސާގެ މައުލޫމާތު މަޖިލީހުގެ މެންބަރުންގެ މާލީ ބަޔާނުގައި ހިމަނާފައި ނުވާތީ، ލޭބަރ ޕާޓީއާއި ކޮންޒަވޭޓިވް ޕާޓީން ވަނީ ފަރާޖަށް ވަރަށް ބޮޑަށް ފާޑުކިޔާފަ އެވެ. ކޮންޒަވޭޓިވް ޕާޓީން ބުނާ ގޮތުގައި ފަރާޖް ވަނީ މަޖިލީހުގެ ގަވާއިދުތަކާ ހިލާފުވެފަ އެވެ. އެ ޕާޓީން މިހާރު ވަނީ މި މައްސަލަ ޕާލަމެންޓަރީ ސްޓޭންޑަޑްސް ކޮމިޝަނަރަށް ހުށަހަޅާފަ އެވެ. މަޖިލީހުގެ ސުލޫކީ މިންގަނޑު ބުނާގޮތުން އާ މެންބަރުން އިންތިހާބުވުމުގެ 12 މަސް ކުރިން ލިބިފައިވާ ހުރިހާ މާލީ މަންފާތަކެއްގެ މައުލޫމާތު ހާމަކުރަން ޖެހެ އެވެ.
ލޭބަރ ޕާޓީގެ ޗެއަރ އެނާ ޓާލީ ވިދާޅުވީ ފަރާޖް އަނެއްކާވެސް ގަވާއިދުތަކާ ހިލާފުވެފައިވާ ކަމަށާއި، ބިލިއަނަރެއްގެ އަތުން ލިބުނު ފައިސާ ސިއްރުކޮށްފައިވާ ކަމަށެވެ. ކޮންޒަވޭޓިވް ޕާޓީގެ ޗެއަރ ކެވިން ހޮލިންރޭކް ވިދާޅުވީ މިއީ ވަރަށް ކަންބޮޑުވާ ކަމެއް ކަމަށާއި، ރިފޯމް ޕާޓީން ގަވާއިދުތަކަށް ބޯލަނބަން ނުޖެހޭ ކަމަށް ގަބޫލުކުރަނީ ކީއްވެގެންތޯ ސުވާލު އުފެދޭ ކަމަށެވެ.
މި ތުހުމަތުތަކަށް ރައްދު ދެމުން ރިފޯމް ޕާޓީގެ ތަރުޖަމާނަކު ވިދާޅުވީ، އެ ފައިސާއަކީ އޭނާ މަޖިލީހަށް އިންތިހާބުވުމުގެ ކުރިން ލިބިފައިވާ އަމިއްލަ ހަދިޔާއެއް ކަމަށާއި، އެހެންކަމުން އެއީ ހާމަކުރަންޖެހޭ އެއްޗެއް ނޫން ކަމަށެވެ. އަދި ކޮންޒަވޭޓިވް ސަރުކާރުން ފަރާޖަށް ސަލާމަތީ ރައްކާތެރިކަން ފޯރުކޮށްދިނުމަށް ދެކޮޅު ހެދުމަކީ އޭނާގެ ފުރާނައަށް ނުރައްކާވި ކަމެއް ކަމަށްވެސް ތަރުޖަމާނު ތުހުމަތު ކުރެއްވި އެވެ.
ތައިލެންޑުގައި ދިރިއުޅޭ އިނގިރޭސި ކްރިޕްޓޯކަރަންސީ އިންވެސްޓަރެއް ކަމަށްވާ ހާބޯން އަކީ ރިފޯމް ޕާޓީއަށް އެންމެ ބޮޑަށް އެހީތެރިވާ ފަރާތެވެ. އޭނާ ވަނީ މިދިޔަ އަހަރު އެކަނިވެސް އެ ޕާޓީއަށް ނުވަ މިލިއަން ޕައުންޑް ހަދިޔާކޮށްފަ އެވެ. މިއީ އިނގިރޭސި ސިޔާސީ ޕާޓީއަކަށް އަމިއްލަ ފަރުދަކު ދިން އެންމެ ބޮޑު އެހީ އެވެ. ޖުމްލަ ގޮތެއްގައި 2025 ވަނަ އަހަރުގެ ނިޔަލަށް އޭނާ ވަނީ 12 މިލިއަން ޕައުންޑް އެ ޕާޓީއަށް ދީފަ އެވެ.
