ނިމިދިޔަ ރޯދަ މަހަށްފަހު ލިބުނު ފުރަތަމަ ކަރަންޓު ބިލު އާދަޔާ ހިލާފަށް ބޮޑުވި މައްސަލައިގައި ނ. ވެލިދޫ ފެނަކަ އޮފީސް ކައިރީ އާންމުން އިހުތިޖާޖުކުރަން ފަށައިފި އެވެ.
އެކި ޝުއޫރުތަައް ލިޔެފައިވާ ޕޯސްޓަރުތައް ހިފައިގެން ފެނަކަ އޮފީސް ކައިރީގައި މިއަދު އާންމުން ކުރަމުންދާ އިހުތިޖާޖުގައި ބުނަމުންދަނީ ކަރަންޓު ބިލުން "ރައްޔިތުން ނޮޅާލައިފި" ކަމަށެވެ.
އާންމުން ފެނަކަ އޮފީސް ކައިރިއަށް ދިޔައީ ކަރަންޓު ބިލު ބޮޑުވި ސަބަބު ދެނެގަނެ، ފެނަކައިގެ ޖަވާބެއް ހޯދުމަށް ކަމަށް އަދަދު އަށް މައުލޫމާތު ލިބެ އެވެ.
ރޯދަ މަހަށްފަހު ލިބުނު ކަރަންޓު ބިލު ބޮޑުވެފައިވާ ކަމަށް ބުނެ ވެލިދޫ ރައްޔިތުންގެ އިތުރުން ރާއްޖޭގެ އެހެން ރަށްތަކުގެ ރައްޔިތުން ވެސް ދަނީ ޝަކުވާ ކުރަމުންނެވެ. މިގޮތުން ބައެއް މީހުން ބުނަމުން ދަނީ ޔުޓިލިޓީ ކުންފުނިތައް ކަމުގައިވާ ފެނަކަ އާއި ސްޓެލްކޯއިން ބިލުތައް އޮޅުވާލާފައިވާ ކަމަށެވެ.
ކަރަންޓު ބިލާމެދު ޝަކުވާ ކުރަމުންދާ މީހުން ބުނަނީ ރޯދަ ޑިސްކައުންޓުގެ ގެއްލުން ފޫބައްދަން ސަރުކާރުން ގަސްތުގައި ބިލުތައް އޮޅުވާލީ ކަމަށެވެ. ނަމަވެސް ފެނަކައިން ބުނީ ކަރަންޓު ބިލު ތައްޔާރުކުރީ އާންމު އެހެން މަސްމަހުގައި ވެސް އަމަލުކުރަމުންދާ އުސޫލުން ކަމަށެވެ.
"މި އުސޫލާ ހިލާފަށް، މި ކުންފުނިން ހިދުމަތް ދެމުންދާ އެއްވެސް ފަރާތެއް ބިލެއް ތައްޔާރުކޮށް، ބިލަށް އުނިއިތުރު ގެނެސްފައި ނުވާނެ ކަމުގެ ޔަގީންކަން އަރުވަން،" ފެނަކައިން ބުންޏެވެ.
ފެނަކައިން ވަނީ މާޗު، އޭޕްރިލް، މެއި މަސް ހިމެނޭ ދުވަސްވަރަކީ އެންމެ ގިނައިން ކަރަންޓު ބޭނުންކުރާ ދުވަސްވަރު ކަން ހަނދާންކޮށްދީ، ކަރަންޓު ބޭނުންކުރުމުގައި ސަމާލުވާން އިލްތިމާސްކޮށްފަ އެވެ.
މާޗު އަދި އޭޕްރިލް މަހަކީ ރާއްޖެއަށް އެންމެ ހޫނު ގަދަ ދުވަސްވަރެވެ. މި ދެ މަހުގައި ވެސް ފިނިހޫނުމިން ހުންނަނީ 32 ޑިގްރީގަ އެވެ. ނަމަވެސް ވައިގެތެތްކަން އިތުރުކަމުން، އިހުސާސްވާ ފިނިހޫނުމިން ހުންނަނީ 40 ޑިގްރީގަ އެެވެ.
ކަރަންޓު ހިދުމަތްދޭ ކުންފުނިތަކުން ބުނަނީ މި ދުވަސްވަރު ކަރަންޓު ބިލުތައް ބޮޑު ވަނީ ގޭބިސީތަކުގައި ކަރަންޓު ބޭނުންކުރާ މިންވަރު އިތުރުވާތީ އެވެ. މި ދުވަސްވަރު އެންމެ ބޮޑަށް ކަރަންޓު ބޭނުންކުރަނީ ގޭތެރެ އާއި ކޮޓަރިތައް ފިނިކުރަން ބޭނުންކުރާ އެއާ ކޮންޑިޝަނާ (އޭސީ) ތަކެވެ.
