ނިމުނު މާޗު މަހުގެ ކަރަންޓު ބިލުތައް ބޮޑުވެގެން ގިނަ ބަޔަކު ޝަކުވާ ކުރަމުންދާތީ، އެ މަހުގެ ބިލުތައް ވެސް ތައްޔާރުކުރީ އާންމު އެހެން މަސްމަހުގައި ވެސް އަމަލުކުރަމުންދާ އުސޫލުން ކަމަށް ފެނަކައިން މިއަދު ބުނެފި އެވެ.
ފެނަކައިން ނެރުނު ނޫސް ބަޔާނެއްގައި މިހެން ބުނީ، ދައުލަތުގެ ޔުޓިލިޓީ ކުންފުނިތައް ކަމުގައިވާ ފެނަކަ އާއި ސްޓެލްކޯއިން ބިލުތައް އޮޅުވާލާފައިވާ ކަމަށް ތުހުމަތުކުރަމުންދާ ދަނޑިވަޅެއްގަ އެވެ. އެ ކަމާ ޝަކުވާ ކުރަމުންދާ މީހުން ބުނަނީ ރޯދަ ޑިސްކައުންޓުގެ ގެއްލުން ފޫބައްދަން ގަސްތުގައި ބިލުތައް އޮޅުވާލީ ކަމަށެވެ.
މިކަން ދޮގުކުރަމުން ފެނަކައިން ބުނީ، އެ ކުންފުނިން މިދިޔަ މަހުގެ ބިލުތަކަށް ވެސް ރީޑިން ނެގުމުގައްޔާއި ބިލުތައް ތައްޔާރުކުރުމުގައި އާންމު އުސޫލާ ހިލާފަށް ކަމެއް ނުކުރާ ކަމަށެވެ. އަދި މި އުސޫލަކީ ގާނޫނުތަކާއި ގަވާއިދުތަކުން ކަނޑައެޅި އާންމުކޮށް ފެންނަން އޮންނަ އުސޫލެއް ކަމަށް އެ ކުންފުނިން ބުންޏެވެ.
"މި އުސޫލާ ހިލާފަށް، މި ކުންފުނިން ހިދުމަތް ދެމުންދާ އެއްވެސް ފަރާތެއް ބިލެއް ތައްޔާރުކޮށް، ބިލަށް އުނިއިތުރު ގެނެސްފައި ނުވާނެ ކަމުގެ ޔަގީންކަން އަރުވަން،" ފެނަކައިން ބުންޏެވެ.
ފެނަކައިން ވަނީ ރީޑިންގައި މައްސަލައެއް އުޅޭ ނަމަ، ރީޑިން ޗެކުކުރަން އެ ކުންފުނީގެ އެހީތެރިކަން ލިބޭނެ ކަމަށް ބުނެފަ އެވެ.
ނޫސް ބަޔާން ނިންމާލަމުން ފެނަކައިން ވަނީ މާޗު، އޭޕްރިލް، މެއި މަސް ހިމެނޭ ދުވަސްވަރަކީ އެންމެ ގިނައިން ކަރަންޓު ބޭނުންކުރާ ދުވަސްވަރު ކަން ހަނދާންކޮށްދީ، ކަރަންޓު ބޭނުންކުރުމުގައި ސަމާލުވާން އިލްތިމާސްކޮށްފަ އެވެ.
މާޗު އަދި އޭޕްރިލް މަހަކީ ރާއްޖެއަށް އެންމެ ހޫނު ގަދަ ދުވަސްވަރެވެ. މި ދެ މަހުގައި ވެސް ފިނިހޫނުމިން ހުންނަނީ 32 ޑިގްރީގަ އެވެ. ނަމަވެސް ވައިގެތެތްކަން އިތުރުކަމުން، އިހުސާސްވާ ފިނިހޫނުމިން ހުންނަނީ 40 ޑިގްރީގަ އެެވެ.
ކަރަންޓު ހިދުމަތްދޭ ކުންފުނިތަކުން ބުނަނީ މި ދުވަސްވަރު ކަރަންޓު ބިލުތައް ބޮޑު ވަނީ ގޭބިސީތަކުގައި ކަރަންޓު ބޭނުންކުރާ މިންވަރު އިތުރުވާތީ އެވެ. މި ދުވަސްވަރު އެންމެ ބޮޑަށް ކަރަންޓު ބޭނުންކުރަނީ ގޭތެރެ އާއި ކޮޓަރިތައް ފިނިކުރަން ބޭނުންކުރާ އެއާ ކޮންޑިޝަނާ (އޭސީ) ތަކެވެ.
އޭސީތަކަކީ ބޭރު ހޫނުވާ ވަރަކަށް އެތެރެ ފިނިކުރަން ގިނައިން ކަރަންޓު ބޭނުންކުރާ އާލާތެކެވެ. މިހެންކަމުން ހޫނު ގަދަ ވަގުތުތަކުގައި އޭސީ ޖައްސާފައި ހުންނައިރު ގިނައިން ކަރަންޓު ބޭނުންކުރެ އެވެ.
