ގުވަހާޓީ، އިންޑިއާ (އޭޕްރީލް 11) - އުމުރުން 15 އަހަރުގެ ވައިބަވް ސޫރްޔަވަންޝީ ދެއްކި ތަފާތު ކުޅުމާ އެކު، ރާޖަސްތާން ރޯޔަލްސް އިން ރޭ އިންޑިއަން ޕްރިމިއާ ލީގު (އައިޕީއެލް)ގެ އެންމެ ފަހުގެ ޗެމްޕިއަން، ރޯޔަލް ޗެެލެންޖާސް ބެންގަލޫރު (އާރްސީބީ) ހަ ވިކެޓުން ބަލިކޮށްފި އެވެ.
ދުނިޔޭގެ އެންމެ ފޯރިގަދަ ފްރެންޗައިސް ކްރިކެޓް ލީގުގެ މި އަހަރުގެ ސީޒަނުގައި މިހާތަނަށް ރާޖަސްތާނުން ކުޅުނު ހަތަރު މެޗުން ވެސް މޮޅުވިއިރު، އެ ޓީމުން އެންމެ ފާހަގަކޮށްލެވޭ ކުޅުމެއް ދައްކަމުން އަންނަނީ ސޫރްޔަވަންޝީ އެވެ. އޭނާ ވަނީ މިހާތަނަށް ކުޅުނު ހަތަރު މެޗުން 200 ލަނޑު ހަމަކޮށްފަ އެވެ. ރޭގެ މެޗުގައި، އޭނާ 15 ބޯޅައިން 50 ލަނޑު ހަދާފައިވާއިރު، ނުބައިވީ، 26 ބޯޅައިން 78 ލަނޑު ހަދާފައިވަނިކޮށެވެ.
ބަރްސަޕާރާ ކްރިކެޓް ސްޓޭޑިއަމްގައި ރޭ ކުޅުނު މެޗުގައި ރާޖަސްތާނުން ޓޮސް ދިމާވުމުން ނިންމީ ހޮވާށެވެ. މި ފަަހަރުގެ ސީޒަނުގައި ފުރަތަމަ ދެ މެޗުން މޮޅުވި، ބެންގަލޫރުން ރޭ ފުރަތަމަ ކުޅެން އަރައި، 20 އޯވަރު ތެރޭ 8 ކުޅުންތެރިން ނުބައިވެގެން 201 ލަނޑު ހެދި އެވެ. ޕްރެޝަރު ވަގުތެއްގައި އަރައި، ބެންގަލޫރަށް އެންމެ ރަނގަޅު ކުޅުމެއް ދައްކައިދިނީ، މި ސީޒަނުގައި ރަނގަޅު ފޯމެއްގައި ކުޅެމުން އަންނަ ޓީމުގެ ކެޕްޓަން، ރަޖަތު ޕަތީދާރު އެވެ. އޭނާ ނުބައިވީ 40 ބޯޅައިން 63 ލަނޑު ހަދާފައިވަނިކޮށެވެ.
މި އިނިންސްގައި ރާޖަސްތާނުން ތަފާތު ދެއްކީ، ތިން ބޯލަރުން ކަމަށްވާ ޖޯފްރާ އާޗާ، ބްރިޖޭޝް ޝަރްމާ އާއި ރަވީ ބިޝްނޯއި އެވެ. މީގެއިން ކޮންމެ ކުޅުންތެރިއަކު، ދެ ވިކެޓް ނެގި އެވެ.
ޖަވާބުގައި ކުޅެން އަރައި، ރާޖަސްތާނުން ވަނީ، 18 އޯވަރުގެ ތެރޭގައި ހަތަރު ކުޅުންތެރިން ނުބައިވިއިރު، 202 ލަނޑު ހަދައި މެޗުން މޮޅުވެފަ އެވެ. ޔަޝަޝްވީ ޖޭސްވާލް، އަށް ބޯޅައިން 13 ލަނޑަށް ނުބައިވި މި މެޗުގައި، ރާޖަސްތާން މޮޅުކޮށްދޭން ސޫރްޔަވަންޝީގެ އިތުރުން ތަފާތު ދެއްކީ، ދްރޫވް ޖުރެލް އެވެ. ޖުރެލް ވަނީ، ނުބައިނުވެ، 43 ބޯޅައިން 81 ލަނޑު ހަދައިފަ އެވެ.
މި މޮޅާ އެކު، ރާޖަސްތާން އެއް ވަނައިގައި އޮތީ ހަތަރު މެޗުން އަށް ޕޮއިންޓް ހޯދައިގެންނެވެ. ދެ ވަނައިގައި އޮތް ޕަންޖާބް ކިންގްސް އަށް ތިން މެޗުން ވަނީ ފަސް ޕޮއިންޓް ލިބިފަ އެވެ. ބެންގަލޫރާއި ދިއްލީ ކެޕިޓަލްސް އަދި ލަކްނައު ސުޕަ ޖަޔަންޓްސް އަށް ވަނީ ތިން މެޗުން ހަތަރު ޕޮއިންޓް ލިބިފަ އެވެ.
