އަދަދު ނޫހުގެ އޮފީހަށް ފުލުހުން ވަދެ އެ ތަން ބަލައި ފާސްކުރުމާ ގުޅިގެން، އިދިކޮޅު އެމްޑީޕީގެ ރައީސް އަދި ކުރީގެ ފޮރިން މިނިސްޓަރު އަބްދުﷲ ޝާހިދު އެ އަމަލު ކުށްވެރިކުރައްވައިފި އެވެ. ޝާހިދު މިކަން ކުށްވެރިކުރެއްވީ މީސްމީޑިއާގައި ކުރެއްވި ޕޯސްޓެއްގަ އެވެ.
އަބްދުﷲ ޝާހިދު ވިދާޅުވީ މިނިވަން ނޫސްވެރިކަމަށް ބިރުދެއްކުމަށް ސަރުކާރުން ކުރަމުންދާ މިފަދަ މަސައްކަތްތަކަކީ ނޫސްވެރިކަމުގެ މިނިވަންކަމަށާއި، މައުލޫމާތު ހޯދައި ލިބިގަތުމަށް ރައްޔިތުންނަށް އޮތް ހައްގަށް ދެވޭ ސީދާ ހަމަލާއެއް ކަމަށެވެ. އަދި މިއީ މިނިވަން މީޑިއާތައް ނައްތާލުމަށް ސަރުކާރުން ހިންގާ ވަރަށް ނުރައްކާތެރި އަމަލެއްގެ ގޮތުގައި އެމަނިކުފާނު ސިފަކުރެއްވި އެވެ.
ޝާހިދު ވިދާޅުވީ، ނޫސްވެރިކަމުގެ މިނިވަންކަމަކީ ޑިމޮކްރަސީގެ އެންމެ ވަރުގަދަ އެއް ތަނބު ކަމަށެވެ. އެއީ ވެރިކަމުގައި ތިބޭ ބަޔަކު ބޭނުންވުމުން ދީފައި، ބޭނުން ނުވުމުން އަތުލެވޭނެ ފަދަ އިނާޔަތެއް ނޫން ކަމަށްވެސް އެމަނިކުފާނު ފާހަގަކުރެއްވި އެވެ. މިނިވަން މުއައްސަސާތަކާއި ނޫސްވެރިންނަށް ބިރުދެއްކުމުގެ ސަގާފަތެއް ގާއިމުކުރުމަކީ ގައުމުގެ ޑިމޮކްރަސީ ފަހަތަށް ގެންދާނެ ކަމެއް ކަމަށް ޝާހިދުގެ ޕޯސްޓުގައި ވެ އެވެ.
އަދަދު ނޫހުގެ އޮފީހަށް ފުލުހުން ވަދެފައިވަނީ ކޯޓު އަމުރެއްގެ ދަށުން އެ ނޫހުގެ ބައެއް ވަސީލަތްތައް ބަލައި ފާސްކުރުމަށެވެ. މި އަމަލަކީ ނޫސްވެރިންގެ މަސައްކަތަށް ހުރަސްއަޅައި، ސަރުކާރަށް ފާޑުކިޔާ ފަރާތްތަކުގެ އަޑު ކަނޑުވާލުމަށް ކުރާ ކަމެއްގެ ގޮތުގައި ގިނަ ބަޔަކު ދަނީ ތުހުމަތުކުރަމުންނެވެ. ހާއްސަކޮށް ސަރުކާރުގެ އިސްވެރިންނާ ގުޅޭ ކޮރަޕްޝަނުގެ ތުހުމަތުތަކާއި އެ ނޫހުން ގެނެސްދޭ ރިޕޯޓުތަކާ ގުޅިގެން މިފަދަ ފިޔަވަޅެއް އެޅުމަކީ ކަންބޮޑުވާންޖެހޭ ކަމެއް ކަމަށް އިދިކޮޅު ފަރާތްތަކުން ބުނެ އެވެ.
