ބެންގަލޫރު، އިންޑިއާ (އޭޕްރީލް 6) - ދުނިޔޭގެ އެންމެ ފޯރިގަދަ ފްރެެންޗައިސް ކްރިކެޓް ލީގު، އިންޑިއަން ޕްރިމިއާ ލީގު (އައިޕީއެލް)ގެ އެންމެ ފަހުގެ ޗެމްޕިއަން، ރޯޔަލް ޗެލެންޖާސް ބެންގަލޫރު (އާރްސީބީ) އިން މުބާރާތުގެ ތާރީހުގައި ފުރަތަމަ ފަހަރަށް ޖެހިޖެހިގެން ހަތަރު ވަނަ މެޗުން ޗެއްނާއި ސުޕަ ކިންގްސް (ސީއެސްކޭ) ބަލިކޮށްފި އެވެ.
ރޭ ބެންގަލޫރުން ޗެއްނާއީ އަތުން މޮޅުވީ 43 ލަނޑުންނެވެ. މި ނަތީޖާއާ އެކު، ބެންގަލޫރުން ވަނީ 2024 ވަނަ އަހަރުގެ އައިޕީއެލްގައި ކުޅުނު ފަހު މެޗުންނާއި މިދިޔަަ އަހަރުގެ މުބާރާތުގެ ދެ މެޗާއި މި ފަހަރުގެ މުބާރާތުގެ ފުރަތަމަ މެޗުން ޗެއްނާއި ބަލިކޮށްފަ އެވެ. މި މެޗުތަކުގެ ތެރެއިން ބެންގަލޫރަށް ލިބުނު އެންމެ ބޮޑު މޮޅަކީ، ޗެއްނާއީ ދަނޑުގައި ކުޅެ، 50 ލަނޑުން ހޯދި މޮޅެވެ.
މި ފަހަރުގެ އައިޕީއެލް ފެށި މެޗުން ސަންރައިޒާސް ހައިދަރުއާބާދު އަތުން ބެންގަލޫރު ވަނީ މޮޅުވެފަ އެވެ. ބެންގަލޫރުން ކުޅުނު ދެ ވަނަ މެޗުގައި، ރޭ ޗިންނަސްވާމީ ސްޓޭޑިއަމްގައި ގުރުއަތުލުން ދިމާވި ޗެއްނާއި އިން ނިންމީ ހޮވާށެވެ. އެހެންވެ، ބެންގަލޫރުން ކުޅެން އަރައި، 20 އޯވަރުގެ ތެރޭގައި، ތިން ކުޅުންތެރިން ނުބައިވެގެން 250 ލަނޑު ހެދި އެވެ. ބެންގަލޫރުގެ ތަރި ވިރާތު ކޯލީ، 18 ބޯޅައިން 28 ލަނޑަށް ނުބައިވިއިރު، މި މެޗުގައި، ބެންގަލޫރަށް ތަފާތު ދެއްކީ، ފަހުން ކުޅެން އެރި ތިން ބެޓްސްމަނުން ކަމަށްވާ، ދޭވްދަތު ޕަަޑިއްކަލް، ރަޖަތު ޕަތީދާރު އަދި ޓިމް ޑޭވިޑް އެވެ. ޕަޑިއްކަލް ނުބައިވީ، 29 ބޯޅަ އިން 50 ލަނޑު ހަދާފައި ވަނިކޮށެވެ. ޕަތީދާރާއި ޑޭވިޑްގެ ޕާޓްނާޝިޕް ނުބައިނުވެ ނިންމާލިއިިރު، ޕަތީދާރު ވަނީ 19 ބޯޅައިން 48 ލަނޑު ހަދައިފަ އެވެ. އަދި، ޑޭވިޑް ވަނީ 25 ބޯޅައިން 70 ލަނޑު ހަދައިފަ އެވެ. ޑޭވިޑް ވަނީ އަށް ފަހަރު ހަޔަކަށް ޖަަހައި، ތިން ފަހަރު ހަތަރަކަށް ޖަހައިފަ އެވެ.
ޖަވާބުގައި ކުޅެން އަރައި، 19.4 އޯވަރުގެ ތެރޭގައި، ހުރިހާ ކުޅުންތެރިން ނުބައިވެގެން ހެދުނީ 207 ލަނޑެވެ. ޗެއްނާއި އަށް އެންމެ މޮޅު ކުޅުމެއް ދެއްކީ، ސަރްފަރާޒް ހާން އެވެ. އޭނާ ވަނީ 25 ބޯޅައިން 50 ލަނޑު ހަދައިފަ އެވެ. މި އިނިންގްސްގައި ބެންގަލޫރުގެ ބުވްނޭޝްވަރު ކުމާރު ވަނީ ހަތަރު އޯވަރަށް ތިން ވިކެޓް ނަގައިފަ އެވެ. މިއާ އެކު، އައިޕީއެލް ތާރީހުގައި އޭނާ މި ވަނީ، 200 ވިކެޓް ހަމަކޮށްފަ އެވެ.
އައިޕީއެލްގައި އިއްޔެ، ލަކްނައު ސުޕަ ޖަޔަންޓް ވަނީ ރިޝަބް ޕާންޓްގެ މޮޅު ކުޅުމާ އެކު، ފަސް ވިކެޓުން ސަންރައިޒާސް ހައިދަރުއާބާދު ބަލިކޮށްފަ އެވެ.
މި ފަހަރުގެ އައިޕީއެލްގައި ހަތަރު ޓީމަކުން ވަނީ ފުރަތަމަ ދެ މެޗުން މޮޅުވެފަ އެވެ. އެއީ، ބެންގަލޫރުގެ އިތުރުން، ރާޖަސްތާން ރޯޔަލްސް، ދިއްލީ ކެޕިޓަލްސް އަދި ޕަންޖާބް ކިންގްސް އެވެ. ނެޓް ރަން ރޭޓަށް ބަލާއިރު، ކުރި ލިބެނީ ބެންގަލޫރު އަށެވެ.
ފަސް ފަހަރު ޗެމްޕިއަންކަން ހޯދާފައިވާ ޗެއްނާއި ކުުޅުނު ތިން މެޗުން ވެސް ބަލިވިއިރު، ތިން ފަހަރު ޗެމްޕިއަންކަން ހޯދި ކަލްކަތާ ނައިޓް ރައިޑާސް (ކޭކޭއާރް) އަދި ގުޖުރާތު ޓައިޓަންސް ވަނީ ދެ މެޗުން ބަލިވެފަ އެވެ.
