ނިއު ދިއްލީ، އިންޑިއާ (އޭޕްރީލް 5) - މިހާރު ކުރިއަށްދާ ދުނިޔޭގެ އެންމެ ފޯރިގަދަ ފްރެންޗައިސް ކްރިކެޓް ލީގު، އިންޑިއަން ޕްރިމިއާ ލީގު (އައިޕީއެލް)ގެ އާ ސީޒަނުގައި، ދިއްލީ ކެޕިޓަލްސް އާއި ރާޖަސްތާން ރޯޔަލްސް އިން ފުރަަތަމަ ދެ މެޗުން މޮޅުވެ ރަނގަޅު ފޯމު ދަމަަހައްޓައިފި އެވެ.
އެ ގޮތުން، ދިއްލީ ކެޕިޓަލްސް އިން ފުރަތަމަ މެޗުން، ލަކްނައު ސުޕަ ޖަޔަންޓްސް ބަލިކުރިއިރު، ދެ ވަނަ މެޗުން އިއްޔެ ވަނީ ހަ ވިކެޓުން މުމްބާއި އިންޑިއަންސް ބަލިކޮށްފަ އެވެ. އަދި، މި ފަހަރު ވަރުގަދަކޮށް ފެންނަ ރާޖަސްތާނުން ފުރަތަމަ މެޗުގައި އަށް ވިކެޓުން ޗެންނާއި ސުޕަ ކިންގްސް (ސީއެސްކޭ) ބަލިކުރިއިރު، ރޭ ވަނީ ހަ ލަނޑުން ގުޖުރާތު ޓައިޓަންސް ބަލިކޮށްފަ އެވެ.
ދިއްލީ ކެޕިޓަލްސް އާއި ރާޖަސްތާން ރޯޔަލްސްގެ އިތުރުން ފުރަތަމަ ދެ މެޗުން މޮޅުވި އަނެއް ޓީމަކީ، ޕަންޖާބް ކިންގްސް އެެވެ. ޕަންޖާބް ކިންގްސް އިން ވަނީ ފުރަތަމަ މެޗުތަކުން، ގުޖުރާތާއި ޗެއްނާއި ބަލިކޮށްފަ އެވެ. އެންމެ ފަހުގެ ޗެމްޕިއަން، ރޯޔަލް ޗެލެންޖާސް ބެންގަލޫރު (އާރްސީބީ) ކުޅުނު ފުރަތަމަ މެޗުން ވަނީ ސަންރައިޒާސް ހައިދަރުއާބާދު ބަލިކޮށްފަ އެވެ.
ދިއްލީ ކެޕިޓަލްސް އިން ޓޮސް ދިމާވުމުން ހޮވަން ނިންމިއިރު، މުމްބައި އިން ކުޅެން އަރައި، 20 އޯވަރު ތެރޭ ހަ ކުޅުންތެރިން ނުބައިވެ، ހެދުނީ 162 ލަނޑެވެ. އެންމެ ގިނަ ލަނޑު ހަދައިދިނީ 36 ބޯޅައިން 51 ލަނޑު ހެދި ސޫރްޔަކުމާރު ޔާދަވް (ސްކައި) އެވެ. ރޯހިތު ޝަރްމާ، 26 ބޯޅައިން 35 ލަނޑަށް ނުބައިވިއިރު، މި އިނިންސްގައި، ދިއްލީ ކެޕިޓަލްސްގެ މުކޭޝް ކުުމާރު ދެ ވިކެޓް ނެގި އެވެ.
ޖަވާބުގައި ދިއްލީ ކެޕިޓަލްސް އިން ކުޅެން އަރައި، 18.1 އޯވަރު ތެރޭ، ހަަތަރު ކުޅުންތެރިން ނުބައިވެ، 164 ލަނޑާ އެކު، މެޗުން މޮޅުވި އެވެ. އެންމެ ރަނގަޅު ކުޅުމެއް ދެއްކީ، މި ފަހަރު ރަނގަޅު ފޯމެއްގައި ހުރި، ސަމީރު ރިޒްވީ އެވެ. އޭނާ ވަނީ 51 ބޯޅައިން 90 ލަނޑު ހަދައިފަ އެވެ. އަދި، ޕަތުމް ނިސަންކާ ވަނީ 30 ބޯޅައިން 44 ލަނޑު ހަދައިފަ އެވެ.
ރާޖަސްތާން ރޯޔަލްސް އިން ޓޮސް ދިމާވުމުން ނިންމީ ކުޅެން އަރާށެވެ. އެ ގޮތުން، 20 އޯވަރު ތެރޭ، ހަ ކުޅުންތެރިން ނުބައިވެ، 210 ލަނޑު ހެދި އެވެ. އެންމެ ރަނގަޅު ކުޅުމެއް ދެއްކީ، 42 ބޯޅައިން 75 ލަނޑު ހެދި ދްރޫވް ޖުރެލް އެވެ. އެ ޓީމުގެ ޔަޝަޝްވީ ޖޭސްވާލް 36 ބޯޅައިން 55 ލަނޑަށް ނުބައިވިއިރު، 15 އަހަރުގެ ވައިބަވް ސޫރްޔަވަންޝީ ނުބައިވީ، 18 ބޯޅައިން 31 ލަނޑަށެވެ.
ޖަވާބުގައި ކުޅެން އަރައި، ގުޖުރާތަށް 20 އޯވަރު ތެރޭ ހަ ކުޅުންތެރިން ނުބައިވެގެން ހެދުނީ، 204 ލަނޑެވެ. އެންމެ ރަނގަޅު ކުޅުމެއް ދެއްކީ، 44 ބޯޅައިން 73 ލަނޑަށް ނުބައިވި ސައި ސުދަރްސަން އެވެ. މި އިނިންގްސްގައި ރާޖަސްތާންގެ ރަވީ ބިޝްނޯއި ވަނީ ހަތަރު އޯވަރަށް ހަތަރު ވިކެޓް ނަގައިފަ އެވެ.
މުބާރާތުގައި މިއަދު ދެ މެޗު ކުޅޭނެ އެވެ. އެއީ، މެންދުރު ފަހު، ސަންރައިޒާސް ހައިދަރުއާބާދާއި ލަކްނައު ސުޕަޖަޔަންޓްސް ބައްދަލުކުރާ މެޗާއި މިރޭ ރޯޔަލް ޗެލެންޖާސް ބެންގަލޫރު އާއި ޗެންނާއި ސުޕަ ކިންގްސް ބައްދަލުކުރާ މެޗެވެ.
