ޔޫތު އެމްޕަވާމަންޓް، ސްޕޯޓްސް އެންޑް ފިޓްނަސް މިނިސްޓަރު، އަބްދުﷲ ރާފިއު (ރާއްޕެ)ގެ އެޑްވައިޒަރަކަށް މަޝްހޫރު ފުޓްބޯޅަ ކޯޗު އަދި ކުޅިވަރު އެޑްމިނިސްޓްރޭޓަރު، މައުރޫފު އަހުމަދު (މާއްޓޭ) އައްޔަނުކޮށްފި އެވެ.
މިނިސްޓަރުގެ އެޑްވައިޒަރުގެ މަގާމަށް ހަމަޖެއްސި މާއްޓޭ މަސައްކަތް ކުރުމަށް ހަަމަޖެހިފައިވަނީ، ރާއްޖޭގެ ޑީސެންޓްރަލައިޒޭޝަން (ލާމަރުކަޒުކޮށް) ކަންކަމުގައި މިނިސްޓަރަށް ލަފާ އެރުވުމުގެ ގޮތުންނެވެ.
މާއްޓޭ އަންނަނީ، ކުޅިވަރުގެ އެކި އިވެންޓްތަކުގައި މިހާރު ބައިވެރިވަމުންނެވެ. އެ ގޮތުން، ދާދި ފަހުން، އިންޑިއާގެ ޝިމްލާގައި ބޭއްވި ސައުތު އޭޝިއަން ޔޫތު ޓޭބަލް ޓެނިސް މުބާރާތުން ކާމިޔާބީ ހޯދައިގެން އައި ރާއްޖޭގެ ޒުވާން ގައުމީ ޓީޓީ ކުޅުންތެރިންނަށް މަރުހަބާ ކިޔުމަށް ބޭއްވި އިވެންޓްގައި ވެސް މާއްޓޭ ބައިވެރިވި އެވެ.
އެފްއޭއެމްގެ ޓެކްނިކަލް ޑައިރެކްޓަރުގެ މަގާމު ވެސް މީގެ ކުރިން އަދާކުރި މާއްޓޭ، ވަނީ މިދިޔަ ސަރުކާރުގައި ސްޕޯޓްސް ކޯޕަރޭޝަނުގެ މެނޭޖިން ޑިރެކްޓަރުގެ މަގާމު ވެސް ފުރުއްވައިފަ އެވެ. އަދި، އެފްއޭއެމް ހިންގުމަށް، 2024 ވަނަ އަހަރުގެ އޮގަސްޓް މަހުން ފެށިގެން، މިދިޔަ އަހަރުގެ ޖުލައި މަހުގެ ނިޔަލަށް، ފީފާގެ އެންގުމަށް ކަންކަން ކުރި، ނޯމަލައިޒިން ކޮމިޓީން އެކުލަވާލި ޓެކްނިކަލް ކޮމިޓީގައި ވެސް މާއްޓޭ މަސައްކަތްކުރެއްވި އެވެ.
އެފްއޭއެމްގެ މިހާރުގެ ލީޑަޝިޕުން އެކުލަވާލި އެވޯޑްސް ކޮމިޓީގެ ޗެއާޕާސަން އަކީ ވެސް މާއްޓޭ އެވެ.
މާއްޓޭ ވަނީ ސްޕެއިނުގެ ޔޯހަން ކްރައިފް އިންސްޓިޓިއުޓުން ސްޕޯޓްސް މާކެޓިން އެންޑް ސްޕޮންސާޝިޕް އިން މާސްޓާސް އަދި ސްޕޯޓްސް ސްޕޮންސާޝިޕުން ޕޯސްޓްގްރެޖުއޭޓް ޑިޕްލޮމާއެއް ހާސިލްކޮށްފަ އެވެ.
ވިކްޓަރީ ސްޕޯޓްސް ކްލަބްގައި ކޯޗިންގައި ތަފާތު މަސައްކަތްތަކެއް ކޮށްފައިވާ މާއްޓޭ ވަނީ ރާއްޖޭގެ 23 އަހަރުން ދަށުގެ ގައުމީ ޓީމުގެ ކޯޗުކަން ވެސް ކޮށްފަ އެވެ. އަދި، ގައުމީ ފުޓްބޯޅަ ޓީމުން 1991 ވަނަ އަހަރުގެ ސާފް ގޭމްސްގެ ރިހި މެޑަލް ހޯދިއިރު ޓީމުގެ ގޯލުކީޕަރަކަށް ކުޅުނު މާއްޓޭ އަކީ ވިކްޓަރީން 1985 ވަނަ އަހަރު ގައުމީ ފުޓްބޯޅަ މުބާރާތް މިލްކުކުރިއިރު، އެ ޓީމުގެ މުހިއްމު ކުޅުންތެރިއެއް ވެސް މެ އެވެ. އަދި، އޭގެ ފަހުން ކޯޗިން ކެރިއަރު ފަށައި މާއްޓޭ ވަނީ ކޯޗެއްގެ ގޮތުގައި ވިކްޓަރީ އަށް 2002 ވަނަ އަހަރުގެ ގައުމީ ތަށި މިލްކުކޮށްދީ، ތާރީހުން ހާއްސަ ޖާގައެއް ހޯދައިފަ އެވެ.
ސްޕޯޓްސް މިިނިސްޓްރީން ވަނީ ޑެޕިއުޓީ ކޮމިޝަނާ އޮފް ސްޕޯޓްސްގެ މަގާމަށް ގައުމީ ފުޓްބޯޅަ ޓީމުން 2008 ވަނަ އަހަރުގެ ސާފް ޗެމްޕިއަންޝިޕް ކާމިޔާބުކުރިއިރު، ޓީމުގެ މެނޭޖަރު، މުހައްމަދު ހާނިމް ހަމަޖައްސައިފަ އެވެ.
