އެމްޑީޕީގެ ޗެއާޕާސަނަކަށް ކުރިމަތިލައްވާފައިވާ ކުރީގެ ރައީސް މުހައްމަދު ނަޝީދު އަދި ކުރިއަށް އޮތް ރިޔާސީ އިންތިހާބުގައި އެމްޑީޕީން ވާދަކުރައްވާނެކަން އިއުލާންކުރައްވާ އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލްއަށް ތާއީދުކުރައްވާކަން އައްޑޫ ސިޓީގެ މޭޔަރު އަލީ ނިޒާރު މިރޭ ހާމަކުރައްވައިފި އެވެ.
ނިޒާރު އެކްސް ގައި ކުރެއްވި ޕޯސްޓެއްގައި ވިދާޅުވީ އެމްޑީޕީގެ ހަރަކާތްތަކުގައި ނަޝީދު އަލުން ބައިވެރިވާން ނިންމެވުމަކީ ޕާޓީން ކުރަމުންދާ ސިޔާސީ މަސައްކަތަށް ލިބިގެންދާނެ ކުރިއެރުމެއް ކަމަށެވެ.
ފައްޔާޒްއަށް ރިޔާސީ ޓިކެޓު ހޯދައިދިނުމަށް ތާއީދުކުރައްވާނެ ކަމަށް ނަޝީދު ވިދާޅުވުމަކީ ވަރަށް ބޮޑަށް ތާއީދުކުރެވޭ އަގުހުރި ނިންމެވުމެއް ކަމަށްވެސް ނިޒާރު ވިދާޅުވި އެވެ.
"މި ނާޒުކު ދަނޑިވަޅުގައި ރައީސް ނަޝީދު އެމްޑީޕީގެ ޗެއާޕާސަންކަމުގެ މަގާމަށް ކުރިމަތިލައްވަވައި، އަދި ޕާޓީގެ ހަރަކާތްތަކުގައި އަލުން ބައިވެރިވާން ނިންމެވުމަކީ އެމްޑީޕީއިން ކުރަމުންދާ ސިޔާސީ މަސައްކަތަށް ލިބިގެންދާނެ ކުރިއެރުމެއް. ހަމައެއާއިއެކު ކުރިއަށް އޮތް ރިޔާސީ އިންތިހާބުގައި ޕާޓީގެ ކުރީގެ ޗެއާޕާސަން އުސްތާޒް ފައްޔާޒްއަށް ރިޔާސީ ޓިކެޓް ހޯދަދިނުމަށް ތާއިދު ކުރަށްވާނެ ކަމަށް ރައީސް ނަޝީދު ވިދާޅުވުމަކީ އަޅުގަނޑަށް ވަރަށްބޮޑަށް ތާއިދުކުރެވޭ އަގުހުރި ނިންމެވުމެއް،" އޭނާ ވިދާޅުވި އެވެ.
ނިޒާރު ވިދާޅުވީ ފައްޔާޒްއަކީ ރާއްޖެއަށް ބޮޑެތި ސިޔާސީ އިސްލާހު ގެންނަންޖެހޭ މި ދަނޑިވަޅުގައި ކެރިގެން އެކަން ކުރެވޭނެ ގާބިލުކަން ހުރި ސިޔާސީ ލީޑަރެއް ކަމަށެވެ.
ރާއްޖެ ހެޔޮވެރިކަމުގެ މިސްރާބަށް ކުރާ ދަތުރުގައި ގޮންޖެހުންތަށް އެބަހުރިކަން ފާހަގަކުރައްވާ ނިޒާރު ވިދާޅުވީ ހާއްސަކޮށް އެމްޑީޕީއާ އިދިކީލަ ސިޔާސީ ފިކުރުތަކަކީ ހުދުމުހުތާރު ވިސްނުންތަކެއް ކަމުން، ޕާޓީގެ ހިންގުން ހަރުދަނާކޮށް އާމިސްރާބަކަށް ދަތުރު ފަށަން ޖެހޭ ކަމަށެވެ.
ދިވެހިރާއްޖޭގެ ވެރިކަން ކުރާ ވައްޓަފާޅިއަށް ބަދަލުތަކެއް ގެނައުމަށް ވަކާލާތުކުރުމުގެ ގޮތުން، "ބޮޑު ބަދަލު" ގެ ނަމުގައި ނަޝީދު އާއި ފައްޔާޒް ވަނީ ބަދަލުތަކެއް އިއުލާންކުރައްވާފަ އެވެ.
ނަޝީދާއި ފައްޔާޒުގެ ފަރާތުން ހުށަހެޅި އެންމެ ބޮޑު ބަދަލަކީ ސަރުކާރާއި ދައުލަތުގެ ވެރިޔަކު އިންތިހާބު ކުރާ ގޮތަށް ނިޒާމު ބަދަލު ކުރުމެވެ. އެ ބޭފުޅުން ވިދާޅުވީ އެއީ ރިޔާސީ އަދި ބަރުލަމާނީ ނިޒާމެއް ވެސް ނޫން ކަމަށާއި އެއީ ރާއްޖެއަށް ފައްކާކޮށްފައިވާ މުޅިން އާ ގޮތްތަކެއް ކަމަށެވެ.
ފައްޔާޒު ވިދާޅުވީ އެބޭފުޅުން ހުށަހަޅުއްވާ ބަދަލުތަކުގައި ސަރުކާރު ހިންގާ މީހާ ވާނީ ސީދާ ރައްޔިތުންގެ ވޯޓަކުން އިންތިހާބުވާ މީހަކަށް ކަމަށެވެ. އަދި ދައުލަތުގެ ވެރިޔާ އިންތިހާބު ކުރާނީ މަޖިލީހާއި ރަށު ކައުންސިލަރުން ނަގާ ވޯޓަކުން ކަމަށް ފައްޔާޒް ވިދާޅުވި އެވެ.
