އިންޑިއާގެ ރިޒާވް ބޭންކް (އާރުބީއައި) އިން ނަގާފައިވާ 400 މިލިއަން ޑޮލަރުގެ ކަރަންސީ ސްވޮޕް ފެސިލިޓީގެ މުއްދަތު ތިން ވަނަ ފަހަރަށް އިތުރު ކުރުމަށް ސަރުކާރުން އެދުނަސް، ގަވާއިދު ތަން ނުދޭތީ ހުރަސްތަކެއް އެބަހުރި ކަމަށް އެ ގައުމުގެ ނޫސްތަކުން ރިޕޯޓުކޮށްފި އެވެ.
އިންޑިއާ ސަރުކާރު މެދުވެރިވެގެން އާރުބީއައިއިން އޮކްޓޫބަރު، 2024 ގައި ނެގި މި ފެސިލިޓީ ވަނީ މިދިޔަ އަހަރުގެ އޭޕްރިލް އަދި އޮކްޓޫބަރުގައި ރޯލްއޯވާކޮށްދީފަ އެވެ. ނަމަވެސް، ސާކް ކަރަންސީ ސްވޮޕް ފްރޭމްވާކްގެ އުސޫލުތަކާއި ޝަރުތުތައް ހުރި ގޮތުން މި ފަހަރުގެ ހުށަހެޅުމާ މެދު ގޮތެއް ނިންމަން ވަނީ އުނދަގޫވެފަ އެވެ.
އިންޑިއާގެ ނޫހެއް ކަމުގައިވާ އިކޮނޮމިކް ޓައިމްސްއިން ރިޕޯޓުކޮށްފައިވާ ގޮތުގައި، ފައިސާ ނެގުމަށް ފަހު ދެމެދުގައި ބަހައްޓަން ޖެހޭ މުއްދަތު (ކޫލިން އޮފް ޕީރިއަޑް) އާއި ފެސިލިޓީގެ މުއްދަތު އިތުރުކުރެވޭ (ރޯލްއޯވާ) ލިމިޓެއް އޮންނާތީ ދިވެހި ސަރުކާރުގެ ހުށަހެޅުމަށް އިޖާބަދޭން ގޮންޖެހުންތައް އެބަހުއްޓެވެ.
މިކަމާ ގުޅޭ ގޮތުން ސުވާލުކުރުމުން، ރައީސް މުހައްމަދު މުއިއްޒު އާއި ފިނޭންސް މިނިސްޓަރު މޫސާ ޒަމީރު ވެސް ވަނީ ރޯލްއޯވާކޮށްދޭން އެދިފައިވާކަން ކަށަވަރުކޮށްދެއްވާފަ އެވެ.
މިހެން ނަމަވެސް، އެ ހުށަހެޅުމަށް އިޖާބަދޭން އިންޑިއާ ސަރުކާރަށް ހުރި ހުރަސްތަކުގެ ވާހަކަ ދެ ބޭފުޅުން ކުރެ އެކަކު ވެސް ނުދައްކަވަ އެވެ. އޭގެ ބަދަލުގައި މުއިއްޒު އާއި ޒަމީރު ވެސް ދެއްކެވީ ދެ ގައުމުގެ ގާތް ގުޅުމުގެ ވާހަކަ އާއި މަދަދުގާރެއްގެ ހައިސިއްޔަތުން އިންޑިއާއިން ރާއްޖެއަށް ވެދީފައިވާ ދީލަތި އެހީތަކުގެ ވާހަކަ އެވެ.
ކަރަންސީ ސްވޮޕް ދައްކަން ޖެހުމުގެ ފުރުސަތު އޮތްއިރު، މި 400 މިލިއަން ޑޮލަރު ރޯލްއޯވާ ނުކުރެވިއްޖެ ނަމަ ދަރަނި އަދާކުރުމުގެ ޒިންމާ އިތުރަށް ބޮޑުވެ، ރިޒާވަށް ވަރަށް ޕްރެޝަރު ކުރާނެ އެވެ. ސަބަބަކީ، މި މަހުގެ ކުރީކޮޅު ސުކޫކު ދައްކަން ރިޒާވުން ފައިސާ ނަގާފައިވާތީ އެވެ.
ސަރުކާރުން ބުނީ ސުކޫކުގެ ޕްރިންސިޕަލްއަށް ދައްކަން ޖެހޭ 500 މިލިއަން ޑޮލަރާއި، ކޫޕަން ޕޭމަންޓުގެ ގޮތުގައި 24.6 މިލިއަން ޑޮލަރު ދެއްކީ ރިޒާވާއި ސޮވްރިން ޑިވެލޮޕްމަންޓް ފަންޑުން ފައިސާ ނަގައިގެން ކަމަށެވެ.
މި ބޮޑު ހަރަދުގެ ކުރިން، މިދިޔަ މަސް ނިމުނުއިރު، ބޭނުންކުރެވޭ ރިޒާވުގައި 411 މިލިއަން ޑޮލަރު ހުއްޓެވެ. އެކަމަކު މި ފައިސާ ދެއްކި ގޮތުގެ ތަފުސީލުތައް ސަރުކާރުން އާންމުނުކުރާތީ ރިޒާވާއި ސޮވްރިން ފަންޑުގައި ބާކީ ހުރި އަދަދެއް ނޭނގެ އެވެ.
މި ހާލަތުގައި ކަންކަން ހުރިއިރު، ސޮވްޕް ފެސިލިޓީގެ މުއްދަތު އިތުރުނުކުރެވިއްޖެ ނަމަ، އިގުތިސޯދަށް ކުރިމަތިވެދާނެ ނޭދެވޭ އަސަރުތައް ބޮޑު ވާނެ އެވެ. އެންމެ ބޮޑު ނުރައްކަލަކީ ޑޮލަރު ސަޕްލައި މިހާރަށް ވުރެ ވެސް ތާށިވުމެވެ. މިއީ އިރާނު ހަނގުރާމައާ ގުޅިގެން ޓޫރިޒަމަށް އައިސްފައިވާ ހީނަރުކަމާއި ތެލުގެ އަގު އުފުލިފައިވާ ދަނޑިވަޅެއްގައި ނެގޭނެ ޝޮކެއް ނޫނެވެ.
