ހުސްވެފައިވާ ހައި ކޯޓުގެ އިސްފަނޑިޔާރަކަށް ތިން ބޭފުޅަކު ކުރިމަތިލައްވައިފި އެވެ.
އަދަދު އަށް އެނގިފައިވާ ގޮތުގައި ހައި ކޯޓުގެ އިސް ފަނޑިޔާރަކަށް ކުރިމަތިލާން ހުޅުވާލި ފުރުސަތުގައި އެ މަގާމަށް ކުރިމަތިލެއްވީ ފަނޑިޔާރު މުހައްމަދު ޝަނީޒު އަބްދުﷲ އާއި ފަނޑިޔާރު އަބްދުއްރައޫފް އިބްރާހިމް އަދި ފަނޑިޔާރު އަބްދުﷲ ޖަމީލު މޫސާ އެވެ.
މަގާމަށް ކުރިމަތިލެއްވި ބޭފުޅުންގެ ތެރެއިން ރައޫފްއަކީ މިދިޔަ ފެބްރުއަރީ މަހު ހައި ކޯޓަށް އައްޔަންކުރި ފަނޑިޔާރެކެވެ. އޭނާ ވަނީ ވެރިކަން ކުރާ ޕީއެންސީގެ ޓިކެޓުގައި މިދިޔަ މަޖިލިސް އިންތިހާބުގައި ކެޔޮދޫ ދާއިރާއަށް ވާދަކުރައްވާ ނާކާމިޔާބީއާ ކުރިމަތިލައްވާފަ އެވެ.
ޝަރުޢީ އަދި ގާނޫނީ ދާއިރާގައި 23 އަހަރު ޚިދުމަތް ކޮށްދެއްވާފައިވާ ރައޫފް ވަނީ 2011 އިން ފެށިގެން 2022 ގެ ނިޔަލަށް ހައި ކޯޓުގެ ފަނޑިޔާރުކަން ކޮށްފަ އެވެ.
އިސްފަނޑިޔާރަކަށް ކުރިމަތިލެއްވި މުހައްމަދު ޝަނީޒު އަބްދުﷲ އަކީ 2023 ގައި ހައިކޯޓަށް އައްޔަންކުރެއްވި ފަނޑިޔާރެކެވެ. ގާނޫނީ ދާއިރާގައި ނުވަ އަހަރު ހިދުމަތް ކުރައްވާފައިވާ ޝަނީޒު ވަނީ ގދ. ގައްދޫގެ އިސް މެޖިސްޓްރޭޓްގެ މަގާމުވެސް ފުރުއްވާފަ އެވެ.
މީގެއިތުރުން އިސްފަނޑިޔާރަކަށް ކުރިމަތިލެއްވި އަބްދުﷲ ޖަމީލް މޫސާ މިދިޔަ އަހަރުގެ އޮގަސްޓް މަހު އެވެ. ފަނޑިޔާރުކަމުގައި 15 އަހަރަށްވުރެ ގިނަ ދުވަހު ހިދުމަތް ކުރައްވާފައިވާ އަބްދުﷲ ޖަމީލް މޫސާ ވަނީ ލ. ދަނބިދޫ އަދި ސިވިލް ކޯޓުގެ ފަނޑިޔާރުކަން ވެސް ކޮށްފައިވެ އެވެ.
މިދިޔަ އަހަރުގެ ނޮވެމްބަރު 19، އިން ފެށިގެން ހައި ކޯޓުގެ ހިންގުމާ ވަގުތީގޮތުން ހަވާލުވެ ހުންނެވީ އަބްދުﷲ ޖަމީލް މޫސާ އެވެ.
