ޝަރުއީ ދާއިރާގެ އިދާރީ އެންމެ އިސްވެރިޔާ, ޑިޕާޓުމެންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) ގެ ޗީފް އެޑްމިނިސްޓަރުގެ މަގާމުގައި ހުންނެވި އަމްޖަދު މުސްތަފާ މިއަދު އިސްތިއުފާދެއްވައިފި އެވެ.
އަދަދު އަށް ކަށަވަރު ކުރެވިފައިވާ ގޮތުގައި އަމްޖަދުގެ އިސްތިއުފާގެ ސިޓީ މިހާރު ވަނީ ކަމާބެހޭ ފަރާތްތަކަށް ހުށަހަޅުއްވާފަ އެވެ.
އޭނާގެ އިސްތިއުފާގެ ސިޓީގައި ބަޔާންކުރައްވާފައި ވަނީ، މަގާމުން ވަކިވެވަޑައިގަންނަވަނީ އަމިއްލަ ސަބަބުތަކަކާ ހުރެ ކަމަށެވެ. ނަމަވެސް އެއީ ކޮން ސަބަބުތަކެއް ކަމެއް އޭނާގެ ސިޓީގައި ތަފްސީލުކޮށްދެއްވާފައި ނެތެވެ.
އަމްޖަދުގެ މި ނިންމެވުމާ ގުޅޭގޮތުން ޑީޖޭއޭއިންނާއި ޖޭއެސްސީން ރަސްމީކޮށް އަދި ވަކި އެއްޗެއް ނުބުނެ އެވެ.
ޑީޖޭއޭގެ ޗީފް އެޑްމިނިސްޓްރޭޓާގެ މަގާމަށް އަމްޖަދު އައްޔަންކުރެއްވީ ޖުޑީޝަލް ސާވިސް ކޮމިޝަނުންނެވެ. އޭނާ އެ މަގާމާ ހަވާލުވެވަޑައިގަތީ ފެބްރުއަރީ 19، 2025 ގަ އެވެ. އަމްޖަދު މީގެ ކުރިން ވަނީ ވަޒީފާއާ ބެހޭ ޓްރައިބިއުނަލްގެ ރައީސްކަމާއި މޯލްޑިވްސް ޓޫރިޒަމް ޑިވެލޮޕްމެންޓް ކޯޕަރޭޝަންގެ ބޯޑު ޑިރެކްޓަރުކަމާއި އިލެކްޝަންސް ކޮމިޝަންގެ ނައިބު ރައީސްގެ މަގާމު ފުރުއްވައިފަ އެވެ.
ޑިޕާޓުމެންޓް އޮފް ޖުޑީޝަލް އެޑްމިނިސްޓްރޭޝަނަކީ އުއްތަމަ ފަނޑިޔާރާއި ސުޕްރީމް ކޯޓުގެ ލަފާގެ މަތިން، ރާއްޖޭގެ ކޯޓުތަކުގެ އިދާރީ ކަންކަން ބަލަހައްޓާ މައި އިދާރާ އެވެ.
ޑީޖޭއޭގެ ޗީފް އެޑްމިނިސްޓްރޭޓަރުގެ މަގާމުން އަމްޖަދު އިސްތިއުފާދެެއްވިއިރު، ޖޭއެސްސީގެ ދަށުގައި ޑީޖޭއޭ އޮތް އޮތުން ނިމުމަކަށް ގެނެސް އަލުން އެކުލަވައިލުމުގެ ވިސްނުން ގެންގުޅުއްވާ ކަމަށް ރައީސުލްޖުމްހޫރިއްޔާ މުހައްމަދު މުއިއްޒު ވަނީ މިއަދު އޮތް ނޫސްވެރިންގެ ބައްދަލުވުމުގައި ވިދާޅުވެފަ އެވެ.
