ސަރުކާރާއި ރައްޔިތުންގެ މަޖިލީހުގެ ކޮންޓްރޯލް އޮތް ޕީއެންސީގެ ސެކެޓްރީ ޖެނެރަލް ކަމަށް އައްޔަނުކުރި މޫސާ ފަތުހީ ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ މެންބަރުކަމުން މިއަދު އިސްތިއުފާ ދެއްވައިފި އެވެ.
ޕީސީބީން މިއަދު ސޯޝަލް މީޑިއާގައި އާކުރި ޕޯސްޓެއްގައި ބުނީ، ބޯޑު މެންބަރުކަމުން ވަކިވުމަށް އެދި މޫސާ ފަތުހީ ހުށަހެޅުއްވި އިސްތިއުފާގެ ސިޓީ ގަބޫލުކޮށްފައިވާ ކަމަށެވެ. ފަތުހީއަކީ ޕީސީބީގެ ބޯޑުގައި ހިމެނިވަޑައިގަންނަވާ މެންބަރުންގެ ތެރެއިން ގާނޫނީ ދާއިރާ ތަމްސީލުކުރައްވާ މެންބަރެވެ.
އޭނާއަކީ ލޯކަލް ގަވަމެންޓް މިނިސްޓްރީގެ ސްޓޭޓު މިނިސްޓަރު ވެސްމެ އެވެ. ނަމަވެސް، މިނިސްޓްރީތަކަށް ގެނައި ބަދަލާއެކު، މިހާރު އޭނާ ވަޒީފާ އަދާކުރަމުން ގެންދަވަނީ ކޮން މިނިސްޓްރީއެއްގައި ކަމެއް ނޭނގެ އެވެ.
މޫސާ ފަތުހީ މަގާމުން އިސްތިއުފާދެއްވާފައި މި ވަނީ، ވެރިކަން ކުރާ ޕީއެންސީގެ ސެކްރެޓަރީ ޖެނެރަލްގެ މަގާމަށް އޭނާ މިއަދު އައްޔަނުކުރުމަށްފަހު އެވެ. އޭނާ އެ މަގާމު ހުސްވީ، އެ މަގާމުގައި ހުރި މުއާޒު ހަލީމް އެ މަގާމުން އިސްތިއުފާދެއްވުމާ ގުޅިގެންނެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑަކީ ދައުލަތުގެ ވިޔަފާރި ތަންތަން ޕްރައިވަޓައިޒް ކުރުމާއި، ކޯޕަރަޓައިޒް ކުރުމާއި އަދި މޮނިޓަރކޮށް އިވެލުއޭޓް ކުރުމުގެ ގާނޫނުގެ ދަށުން އުފައްދާފައިވާ ބޯޑެކެވެ.
މި ބޯޑުގެ މައިގަނޑު މަސްއޫލިއްޔަތަކީ ސަރުކާރު ހިއްސާވާ ކުންފުނިތަކުގެ ބޯޑުތަކަށް މެންބަރުން އައްޔަނުކުރުމާއި، އެ ކުންފުނިތަކުގެ ހިންގުން ހަރުދަނާ އުސޫލުތަކެއްގެ މަތިން ކުރިއަށްދޭތޯ ބެލުމެވެ. ހަތް މެންބަރުންގެ މައްޗަށް އެކުލެވޭ މި ބޯޑަށް މެންބަރުން އައްޔަނުކުރައްވަނީ ރައީސުލްޖުމްހޫރިއްޔާ އެވެ.
ފަތުހީ އިސްތިއުފާ ދެއްވުމާ ގުޅިގެން މިހާރު ބޯޑުގައި ހިމެނިވަޑައިގަންނަވަނީ ހަ މެންބަރުންނެވެ. ގާނޫނު ބުނާގޮތުން ބޯޑުގެ މެންބަރަކު އިސްތިއުފާ ދެއްވައިފިނަމަ، ވީ އެންމެ އަވަސް ފުރުސަތެއްގައި އެ މަގާމަށް އާ މީހަކު އައްޔަނު ކުރަން ޖެހެ އެވެ.
