ސިޓިޒަންސް ކޮމްޕްލެއިންޓްސް ބިއުރޯގެ ނަމުގައި އާ އިދާރާއެއް އުފައްދައި، ދިވެހިރާއްޖޭގެ ސަރަހައްދުތަކާ ބެހޭ އޮފީހެއް ރައީސް މުހައްމަދު މުއިއްޒު މިއަދު އުފައްދަވައިފި އެވެ.
ރައީސް އޮފީހުން ނެރުނު ބަޔާނެއްގައި ބުނީ މިއަދު އުފެއްދި ސިޓިޒަންސް ކޮމްޕްލެއިންޓްސް ބިއުރޯގެ މައިގަނޑު މަސްއޫލިއްޔަތަކީ އެކި ޕްލެޓްފޯމްތަކުގެ ޒަރިއްޔާއިން ރައްޔިތުން ހުށަހަޅާ ޝަކުވާ މެނޭޖްކޮށް ޖަވާބުދިނުން ކަމަށެވެ.
އެ ބިއުރޯއަށް ޝަކުވާ ހުށަހެޅުމަށް 24 ގަޑިއިރު ހިދުމަތް ދޭ ކޯލް ސެންޓަރެއް ގާއިމް ކުރާނެ ކަމަށް ރައީސް އޮފީހުން ބުންޏެވެ. އެކަމަކު އެ އިދާރާގެ މަސައްކަތް ފެށޭނީ މިއަހަރުގެ މެދު ތެރޭގައި ކަމަށް ރައީސް އޮފީހުން ބުންޏެވެ.
ރައީސް އޮފީހުން ބުނީ ދިވެހިރާއްޖޭގެ ސަރަހައްދުތަކާ ބެހޭ އޮފީހަކީ ރާއްޖޭގެ ސަރަހައްދުތައް ބަލަހައްޓައި، ސަރަހައްދުތަކާ ބެހޭ ކަންކަމާއި މައްސަލަތައް ބެލުމަށް އުފެއްދި އޮފީހެއް ކަމަށެވެ.
"ދިވެހިރާއްޖޭގެ ސަރަހައްދުތަކާބެހޭ އޮފީހުން ކުރަމުންގެންދާނެ މަސައްކަތްތަކުގެ ތެރޭގައި، ދިވެހިރާއްޖޭގެ ސަރަހައްދުގެ ބައުންޑަރީއާ ގުޅޭގޮތުން އުފެދޭ ހިލާފުތަކާ ގުޅުންހުރި މައްސަލަތައް ހައްލުކުރުމުގައި ސަރުކާރުގެ ކަމާބެހޭ އިދާރާތަކާއި ބައިނަލްއަގުވާމީ ފަރާތްތަކާއެކު އިސްވެ ހަރަކާތްތެރިވުން [ހިމެނޭ]،" ރައީސް އޮފީހުން ބުނެފައިވެ އެވެ.
ސަރަހައްދުތަކާ ބެހޭ އޮފީހުގެ މަސައްކަތް ފެށޭނީ އޮފީހުގެ އިދާރީ ހިންގުން ހަމަޖައްސައި، މުވައްޒަފުން ލިބުމުން ކަމަށް ރައީސް އޮފީހުން ބުނެ އެވެ.
