އެކްސިޑެންޓެއްގެ ސަބަބުން ދާއިމީ ނުކުޅެދުންތެރިކަމެއް ލިބޭ މީހުންނަށާއި އެކްސިޑެންޓުތަކުގެ ޝިކާރައަކަށްވެ ގެއްލޭ ފުރާނަތަކަށް ބަދަލު ނަގައިދެވޭ ގޮތަށް ކޮމްޕްރެހެންސިވް މޮޓޯ އިންޝުއަރެންސް ޕޮލިސީއެއް ތައާރަފުކޮށް އެފަދަ އުސޫލެއް ގާއިމުކުރަންޖެހޭ ގޮތަށް އެއްގަމު ދަތުރުދަތުރުގެ ގާނޫނަށް އިސްލާހެއް ހުށަހަޅައިފި އެވެ.
އެއްގަމު ދަތުރުފަތުރުގެ ގާނޫނަށް އިސްލާހެއް ހުށަހަޅުއްވީ ގަލޮޅު އުތުރު ދާއިރާގެ މަޖިލިސް މެންބަރު، މުހައްމަދު އިބްރާހިމް (ކުޑޫ) އެވެ.
އެއްގަމު ދަތުރުފަތުރު ކުރުމުގެ ބިލަށް އިސްލާހު ހުށަހެޅުމުގެ މަގުސަދަކީ އެއްގަމު ދަތުރުފަތުރުކުރާ އުޅަނދުތައް މިހާރުވެސް ތާޑް ޕާޓީ އިންޝުއަރެންސް ކުރަން ލާޒިމުކޮށްފައިވީ ނަމަވެސް، ކޮމްޕްރެހެންސިވް މޮޓޯ އިންޝުއަރެންސެއް ނެތުމުގެ ސަބަބުން އުޅަނދަށް ނުވަތަ އުޅަނދު ދުއްވާ މީހާއަށް ލިބޭ ގެއްލުމަށް ލިބޭ ގެއްލުމަށް ބަދަލު ލިބުމަށް ހުރަސްއެޅޭތީ އެކަމަށް ހައްލެއް ހޯދުމަށް ކަމަށް ކުޑޫ ވިދާޅުވި އެވެ.
"އެއްގަމު ދަތުރުފަތުރު ކުރުމުގެ ގާނޫނުގެ ދަށުން މިހާރު ރާއްޖޭގައި ހަމައެކަނި މަޖުބޫރު ކުރެވިފައި ވަނީ ތާޑް ޕާޓީ އިންޝުއަރެންސް، އެކްސިޑެންޓެއްގެ ސަބަބުން ދާއިމީ ނުކުޅެދުންތެރިކަމެއް ނުވަތަ ދާއިމަށް ބޭސްކުރަންޖެހޭ ކަމެއް، ގެއްލުމެއް ލިބޭ ހާލަތްތަކުގައި އެފަދަ ގެއްލުމަކަށް އެކަށޭނަ ބަދަލު އިންޝުއަރެންސްގެ ޒަރިއްޔާއިން ހޯދޭނެ ނިޒާމެއް މި ވަގުތު ގާއިމު ކުރެވިފައެއް ނުވޭ،" ކުޑޫ ވިދާޅުވި އެވެ.
ކުޑޫ ހުށަހަޅުއްވާފައިވާ އިސްލާހުގައި ކޮމްޕްރެހެންސިވް މޮޓޯ އިންޝުއަރެންސް މާނަކޮށްފައި ވަނީ ފަސްކަމެއް އޭގައި ހިމެނޭ ގޮތަށެވެ. އެއީ:
- އެކްސިޑެންޓެއްގެ ސަބަބުން ތިންވަނަ ފަރާތެއް މަރުވުމުން، ނުވަތަ ތިންވަނަ ފަރާތަކަށް ޖިސްމާނީ ހާނީއްކައެއްވުމުން، ނުވަތަ ތިންވަނަ ފަރާތުގެ މުދަލަށް ލިބޭ ގެއްލުމަށް ޒިންމާވުން
- އަމިއްލަ އުޅަނދަކަށް އެކްސިޑެންޓެއްގެ ސަބަބުން ލިބޭ ސީދާ ގެއްލުމަށް އަދި، އުޅަނދު ފުރޮޅައިލުމުގެ ސަބަބުން ނުވަތަ އެކްސިޑެންޓެއްގެ އަސަރުކުރުމުން ލިބޭ ގެއްލުމަކަށް ޒިންމާވުން
- އަލިފާނުގެ ސަބަބުން، ނުވަތަ ވަގަށްނެގުމުގެ ސަބަބުން ނުވަތަ ގެއްލުންދިނުމުގެ ސަބަބުން ނުވަތަ ގެއްލުންދިނުމުގެ ގަސްދުގައި ކުރާ ކަންކަމުގެ ސަބަބުން ލިބޭ ގެއްލުމަށް ޒިންމާވުން
- މި ގާނޫނުގެ ދަށުން ހަދާ ގަވާއިދުގައި ބަޔާންކުރާ މިފަދަ އެންމެހައި ކަންކަން
އެ އިސްލާހު ގާނޫނަކަށްވުމާއެކު، އެ ގާނޫނުގެ ދަށުން މޮޓޯ އިންޝުއަރެންސްއާ ބެހޭ ގަވާއިދެއް ހަދައި އެ ގާނޫނަށް އަމަލުކުރަން ފަށާތާ ތިން މަސްދުވަސް ތެރޭގައި މޯލްޑިވްސް މަނިޓަރީ އޮތޯރިޓީން އާންމުކުރަންވާނެ ކަމަށް ވެސް އެ އިސްލާހުަގައި ބަޔާންކޮށްފައިވެ އެވެ.
