ދައުލަތުގެ ރަސްމީ ރިޒާވާއި ސޮވަރިން ޑިވެލޮޕްމަންޓް ފަންޑުގައި ހުރި ޑޮލަރު ބޭނުންކޮށްގެން ސުކޫކަށް ދައްކަން ޖެހޭ 524.68 މިލިއަން ޑޮލަރު ދެއްކިޔަސް އޭގެ ފައިދާ އިގުތިސޯދަށް މިވަގުތު ނުކުރާ ކަމަށް ފިނޭންސް މިނިސްޓަރު މޫސާ ޒަމީރު އިއްޔެ ވިދާޅުވެއްޖެ އެވެ.
މެދުއިރުމަތީގައި ކުރަމުންދާ ހަނގުރާމައާ ގުޅޭގޮތުން އެކުލަވާލާފައިވާ މިނިސްޓަރުންގެ ކޮމިޓީން ބޭއްވި ނޫސްވެރިންގެ ބައްދަލުވުމުގައި ޒަމީރު ވިދާޅުވީ ސުކޫކަށް ފައިސާ ދެއްކިޔަސް ހަނގުރާމައިގެ ދަނޑިވަޅުވީމަ، އިގްތިސޯދަށް އޭގެ ސަބަބުން ފައިދާ ނުކުރާ ކަމަށެވެ.
"ފައިސާ ދައްކާ ނިމުނުއިރުގައި [ސުކޫކަށް] އަންފޯޗުނަޓްލީ ހަނގުރާމައިގެ ތެރޭގައިވީމަ މީގައި އަސްލު އެންމެ ބޮޑަށް ބެނެފިޓްސް އަޅުގަނޑުމެންނަށް އިގްތިސޯދަށް ނުލިބޭކަހަލަ ގޮތަކަށް މިފެންނަނީ،" ޒަމީރު ވިދާޅުވި އެވެ.
ޒަމީރު ވިދާޅުވީ މުހައްމަދު މުއިއްޒު ވެރިކަމާ ހަވާލުވެވަޑައިގެން ރާއްޖޭގެ އިގްތިސޯދު އޮތް އަނދަވަޅުން ނެގުމަށް ކުރެއްވި އެންމެ ބޮޑު މަސައްކަތަކީ ދުރާލައި ސުކޫކު ދެއްކޭނެ މަގުފަހި ކުރުން ކަމަށްވާއިރު، އެކަން ކާމިޔާބުކަމާއެކު ސަރުކާރުން ކޮށްފައިވާ ކަމަށެވެ.
"ﷲ ގެ ރަހުމަތުން އެކަން ވެފައި މިއޮތީ ރައީސް ޑރ. މުއިއްޒު ވަރަށް ދުރާލައި ރާވައިގެން 2023 ވަނަ އަހަރުގެ ވެރިކަމާ ހަވާލުވެވަޑައިގެން ފަހުން އެއްކޮށް ރާއްޖޭގެ އިގްތިސޯދު އޭރު އޮތް އަނދަވަޅުން ނެގުމަށްޓަކައި ކުރެވުނު އެންމެ ބޮޑު މަސައްކަތަކުގެ ތެރެއިން އެންމެ ކާމިޔާބު މަސައްކަތަކަށް ރައީސް ނިންމަވާފައި އޮތީ ސުކޫކުގެ ކަންތައް،" ޒަމީރު ވިދާޅުވި އެވެ.
ހަނގުރާމައިގެ ސަބަބުން ސުކޫކު ދެއްކިޔަސް އޭގެ ފައިދާ ސަރުކާރަށް މިދަނޑިވަޅުގައި ނުކުރިޔަސް، އޭގެ ފައިދާ ހަނގުރާމަ ނިމުމުން ކުރާނެ ކަމަށް ޒަމީރު ވިދާޅުވި އެވެ. އެގޮތުން ޒަމީރު ވިދާޅުވީ މެދުރާސްތާގައި ދަރަނީގެ ނިސްބަތް ކުޑަވުމުން ލިބޭނެ ފައިދާވެސް ހުންނާނެ ކަމަށެވެ.
"އެކަމަކު އިރާދަކުރެއްވިއްޔާ ހަނގުރާމަ ނިމިގެންދާއިރުގައި ރައީސް އެ ނެންގެވި ހަރުދަނާ ފިޔަވަޅުތަކުގެ ސަބަބުން އަޅުގަނޑުމެންނަށް ވާނެ ފައިދާތައް އިރާދަކުރެއްވިއްޔާ މެދުރާސްތާގައި ދަރަނީގެ ނިސްބަތް ކުޑަވެގެން ދިއުމާއި އަދި މިގޮތުން ލިބޭނެ ފައިދާތައް ހުންނާނެ،"
މީގެއިތުރުން ޒަމީރު ވިދާޅުވީ އެއްވެސް ކްރެޑިޓް ރޭޓިން އެޖެންސީއަކުން ބަދަލެއް ނުގެނެސްގެން އުޅެނީ ހަނގުރާމައިގެ ސަބަބުންކަން ފާހަގަކުރައްވާ ޒަމީރު ވިދާޅުވީ އެކަމާ ގުޅިގެން ހުރިހާ ހިސާބުތަކާއި ފޯކާސްޓްތައް ހިއްސާކޮށް މަޝްވަރާކުރި ކަމަށެވެ.
ރިޒާވާއި އެސްޑީއެފް ބޭނުންކޮށްގެން ސުކޫކަށް 500 މިލިއަން ޑޮލަރު ދައްކައިފި
އެސްޑީއެފްގައި ހުރި ފައިސާ އާއި ރިޒާވު ބޭނުންކޮށްގެން ސުކޫކު ދެއްކި ކަމަށް ފިނޭންސުން ބުނި ނަމަވެސް އޭގެ ތަފުސީލުތަކެއް ނުދޭ.
"އެއްވެސް ކްރެޑިޓް ރޭޓިން އެޖެންސީއަކުން ބަދަލެއް ނުގެނޭ. މި އަންސާޓަނަޓީ ބޮޑުކަމުން ކަމަށް އަޅުގަނޑުމެން ގަބޫލުކުރަނީ. އެކަމަކު އަޅުގަނޑުމެން މަޝްވަރާކޮށް އަޅުގަނޑުމެންގެ ހުރިހާ ފިގާސްތަކާ އެއްޗެހިތައް އަޅުގަނޑުމެން ހުންނާނެ އެ ހުރި ހުރިހާ ބެލެންސްތަކާއި އަދި އިތުރަށް ފޯކާސްޓްކުރެވޭ ގޮތްތައް އަޅުގަނޑުމެން ހުންނާނީ މިފަރާތްތަކާ ހަވާލުކޮށްފައި،"
500 މިލިއަން ޑޮލަރާއި ސުކޫކުގެ ފައިދާއަށްވާ ރޭޓަށްވާ 24.68 މިލިއަން އެމެރިކާ ޑޮލަރާއެކު ޖުމްލަ 524.68 މިލިއަން އެމެރިކާ ޑޮލަރު ސަރުކާރުން ދައްކައި ހަލާސްކުރީ އެޕްރީލް 2، ގަ އެވެ.
ސުކޫކަށްވާ ފައިސާ އެސްޑީއެފްގައި ހުރި ފައިސާ އާއި ރިޒާވު ބޭނުންކޮށްގެން ސުކޫކު ދެއްކި ކަމަށް ފިނޭންސުން ބުނި ނަމަވެސް އޭގެ ތަފުސީލުތަކެއް ނުދެ އެވެ. މީގެ ކުރިން ފިނޭންސް މިނިސްޓަރު މޫސާ ޒަމީރު ވިދާޅުވެފައި ވަނީ ފައިސާ ދެއްކުމަށް ފަހު އޭގެ ތަފުސީލުތައް ހާމަކުރާނެ ކަމަށެވެ.
ފިނޭންސުން ވަނީ މި މަހުގެ ނިޔަލަށް އަދާކުރަން ޖެހޭ އަބޫ ދާބީ ފަންޑުގެ 100 މިލިއަން ޑޮލަރު ރޯލްއޯވާކުރުމުގެ މަސައްކަތްވެސް ނިންމާފަ އެވެ.
ރިޒާވާއި އެސްޑީއެފްގައި ހުރި ފައިސާ ބޭނުންކޮށްގެން ސުކޫކަށް އަނބުރާ ފައިސާ ދެއްކުމަކީ ސަރުކާރުގެ ޕްލޭން ކަމަށް މުއިއްޒު ހާމަކުރެއްވީ، މިދިޔަ މަހުގެ 2 ގައި، ރައީސް އޮފީހުގައި ބޭއްވެވި ނޫސްވެރިންގެ ބައްދަލުވުމުގައި އެވެ. އެ ދުވަހު ރައީސް ވިދާޅުވީ އެސްޑީއެފްގައި 320 މިލިއަން ޑޮލަރު އަދި ޔޫސަބަލް ރިޒާވުގައި ހުރި 330 މިލިއަން ޑޮލަރު އެބަހުރި ކަމަށެވެ.
މޯލްޑިވްސް މަނިޓަރީ އޮތޯރިޓީން އެންމެ ފަހުން އާންމުކޮށްފައިވާ ރިޒާވު ހިސާބުތަކުން ދައްކާ ގޮތުގައި، ފެބްރުއަރީ މަސް ނިމުނުއިރު ޖުމްލަ ރިޒާވުގައި 1.27 ބިލިއަން ޑޮލަރު އެބަހުއްޓެވެ. ބޭނުންކުރެވޭ ރިޒާވުގައި ހުރީ 337 މިލިއަން ޑޮލަރެވެ.
އެސްޑީއެފްގައި އެންމެ ފަހުން ހުރި ކަމަށް ބުނާ 350 މިލިއަން ޑޮލަރާއި ބޭނުންކުރެވޭ ރިޒާވުގައި ހުރި ފައިސާ އެއްކޮށްލުމުން ހުރި ޖުމްލަ 687 މިލިއަން ޑޮލަރަށް އަރަ އެވެ.
