ބޭރުގެ އިންވެސްޓަރުންނަށް ވިއްކާފައިވާ 500 މިލިއަން ޑޮލަރުގެ ސުކޫކު ދައްކާ ހަލާސްކުރުމުގެ ކުރިން، ބޭނުންކުރެވޭ ޑޮލަރު ރިޒާވުގައި 411 މިލިއަން ޑޮލަރު ހުރި ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ތަފާސްހިސާބުތަކުން ދައްކައިފި އެވެ.
އެމްއެމްއޭއިން އާންމުކޮށްފައިވާ މިދިޔަ މަހުގެ ރިޒާވު އަދަދުތަކުން ގޮތުގައި އެ މަސް ނިމުނުއިރު ޖުމްލަ ރިޒާވުގައި 1.3 ބިލިއަން ޑޮލަރު ހުއްޓެވެ. މި ރިޒާވުން ކުރު މުއްދަތުގެ ދަރަނީގެ ގޮތުގައި ކަނޑަން ޖެހޭ އެއް ބިލިއަނަށް ވުރެ ގިނަ ޑޮލަރު ކެނޑުމުން، ބާކީވަނީ 330 މިލިއަން ޑޮލަރެވެ.
މަރުކަޒީ ބޭންކުން ބޭނުންކުރެވޭ ރިޒާވު މިހާރު ހިސާބުކުރަނީ އިންޑިއާއިން ނަގާފައިވާ 400 މިލިއަން ޑޮލަރުގެ ކަރަންސީ ސްވޮޕުން ބޭންކުތަކުގައި އިންވެސްޓުކޮށްފަ ހުރި އަދަދު ހިމަނައިގެންނެވެ. މިދިޔަ މަސް ނިމުނުއިރު އެ އިންވެސްޓުމަންޓު ހުރީ 81 މިލިއަން ޑޮލަރުގަ އެވެ.
މި އަދަދުތަކުން ހިސާބުކުރާއިރު، މިދިޔަ މަސް ނިމުނުއިރު ބޭނުންކުރެވޭ ރިޒާވުގައި 411 މިލިއަން ޑޮލަރު ހުއްޓެވެ. މީގެ ކުރިން ޔޫސަބަލް ރިޒާވުގައި މިހާ ގިނަ ފައިސާ ހުރި ކަމަކަށް ރެކޯޑުތަކުން ނުދައްކަ އެވެ. އެހެންކަމުން، މިއީ ތާރީހުގައި ޔޫސަބަލް ރިޒާވު އެންމެ މަތިވީ ފަހަރެވެ.
ބޭނުންކުރެވޭ ރިޒާވު 2026
- ޖެނުއަރީ - 301 މިލިއަން ޑޮލަރު
- ފެބްރުއަރީ - 337 މިލިއަން ޑޮލަރު
- މާޗު - 411 މިލިއަން ޑޮލަރު
އެކަމަކު، ރިޒާވުގައި ހުރި ފައިސާ ސުކޫކު ދައްކަން ބޭނުންކުރުމަށް ފަހު، މިހާރު ހުރި އަދަދެއް ނޭނގެ އެވެ.
ފިނޭންސް މިނިސްޓްރީން ހާމަކޮށްފައިވާ ގޮތުގައި، ސުކޫކު ދެއްކީ ރިޒާވާއި ސޮވްރިން ޑިވެލޮޕްމަންޓް ފަންޑުން ފައިސާ ނަގައިގެންނެވެ. ނަމަވެސް މިއަދާ ހަމައަށް އެ ތަފުސީލުތައް ހާމަނުކުރާތީ ރިޒާވާއި ސޮވްރިން ޑިވެލޮޕްމަންޓް ފަންޑުގައި މިހާރު ހުރި އަދަދެއް ހިސާބުކުރެވޭނެ ގޮތެއް ނެތެވެ.
މިދިޔަ މަސް ނިމުނުއިރު، ރިޒާވުގެ ހާލަތު ކިތަންމެ ރަނގަޅަސް ސްވްޕޮ ދައްކާ ނިމުނުތަނާ، އިންޑިއާގެ ކަރަންސީ ސްވޮޕުގެ މުއްދަތު އިތުރުކުރަން ހުރި ގޮންޖެހުންތަކާއެކީ ރިޒާވަށް ހުރި ޕްރެޝަރު ވަނީ އަނެއްކާ ވެސް އިތުރުވެފަ އެވެ.
ސަރުކާރުން އަންނަނީ އިންޑިއާ ސަރުކާރާ މަަޝްވަރާކޮށްގެން މި ސްވޮޕު އަންބުރާ ދައްކަން ޖެހޭ މުއްދަތު އިތުރުކުރަން މަސައްކަތް ކުރަމުންނެވެ. މި ގޮތަށް ދިވެހި ސަރުކާރުން އެދުނަސް، އިންޑިއާގެ ގަވާއިދުތައް ހުރި ގޮތުން، މީގެ ކުރިން ދެ ފަހަރެއްގެ މަތިން ރޯލްއޯވާ ކޮށްދީފައިވާ ސްވޮޕު އިތުރަށް ރޯލުކޮށްދޭން ހުރަސްތަކެއް އެބަހުރި ކަމަށް އެ ގައުމުގެ ނޫސްތަކުން ވަނީ ރިޕޯޓުކޮށްފަ އެވެ.
