އިދިކޮޅު، މޯލްޑިވިއަން ޑިމޮކްރެޓިކް ޕާޓީގެ ވަގުތީ ޗެއާ ޕާސަން، އަބްދުލްޣަފޫރު މޫސާގެ އިތުބާރު ނެތްކަމުގެ މައްސަލައާމެދު ގޮތެއް ނިންމުމަށް ހޯމް ދުވަހު އެ ޕާޓީގެ ގައުމީ މަޖިލީހުގެ ޖަލްސާއެއް ބާއްވަން ތާވަލުކޮށްފި އެވެ.
ދާދި ދެންމެއަކު އެމްޑީޕީގެ ގައުމީ މަޖިލިސް މެންބަރުންނަށް ޕާޓީން ފޮނުވި މެސެޖެއްގައި ބުނީ، ގައުމީ މަޖިލީހުގެ ޖަލްސާއެއް ހޯމަ ދުވަހަށް ތާވަލުކޮށްފައިވާ ކަމަށެވެ. ނަމަވެސް، އެ ޖަލްސާ ބާއްވާނެ ތަނަކާއި ވަގުތެއް އަންގައިފައެއް ނުވެ އެވެ.
"ގައުމީ މަޖިލީހުގެ 55 މެންބަރުންގެ ސޮއި ކުރައްވައި ހުށަހަޅުއްވާފައިވާ. ވަގުތީ ޗެއާޕާސަން ވަކި ކުރުމުގެ މައްސަލައަށް ގޮތެއް ނިންމުމަށް 4/13 (ހޯމަ) ދުވަހު ގައުމީ މަޖިލީހުގެ ޖަލްސާއެއް އޮންނާނެ ވާހަކަ ދެންނެވީމެވެ. ގަޑި އާއި ތަން ފަހުން އަންގާނެ ވާހަކަ ދަންނަވަމެވެ،" އެ މެސެޖުގައި ބުންޏެވެ.
އެމްޑީޕީގެ ގައުމީ މަޖިލީހުގައި ތިއްބަވަނީ 123 މެންބަރުންނެވެ. ޣަފޫރުގެ އިތުބާރު ނެތްކަމުގެ ޖަލްސާ ބޭއްވޭނީ މަދުވެގެން 31 މެންބަރުން އެ ޖަލްސާއަށް ހާޒިރުވެގެންނެވެ. އެ ޕާޓީގެ ގައުމީ މަޖިލީހުގެ ޖަލްސާތަކަށް އާންމުކޮށް ހާޒިރުވަނީ 45 ވަރަކަށް މެންބަރުންނެވެ.
ޣަފޫރުގެ އިތުބާރު ނެތްކަމަށް ފާސްވާނީ އެމްޑީޕީގެ ގައުމީ މަޖިލީހުގެ 61 މެންބަރުންގެ ވޯޓުންނެވެ.
އެމްޑީޕީގެ ވަގުތީ ޗެއާޕާސަންގެ މަގާމުގައި ހުންނެވި، ޣަފޫރުގެ އިތުބާރު ނެތްކަމުގެ މައްސަލައެއް ގައުމީ މަޖިލީހުގެ 55 މެންބަރުންގެ ސޮއިއާއެކު ހުށަހެޅީ މިއަދު އެވެ. އެ މައްސަލަ އެމްޑީޕީގެ ގައުމީ މަޖިލީހަށް ހުށަހެޅީ ކުރީގެ ރައީސް، މުހައްމަދު ނަޝީދު އާއި އެ ޕާޓީގެ ކުރީގެ ޗެއާޕާސަން ފައްޔާޒް އިސްމާއިލް ލީޑު ކުރައްވާ ފެކްޝަނުންނެވެ.
އެ މައްސަލަ ހުށަހެޅުމަށް، ފައްޔާޒް އިސްމާއިލް އާއި ކުރީގެ ފިނޭންސް މިނިސްޓަރު، އިބްރާހިމް އަމީރު އާއި ކުރީގެ ޑިފެންސް މިނިސްޓަރު، މާރިޔާ ދީދީގެ އިތުރުން ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު، އަކްރަމް ކަމާލުއްދީން ސޮއިކުރައްވާފައިވެ އެވެ.
އޭގެ އިތުރުން، މީގެ ކުރިން، ކުރީގެ ރައީސް، އިބްރާހިމް މުހައްމަދު ސޯލިހުގެ ފެކްޝަންއަށް ނިސްބަތްވެވަޑައިގެންނެވި، އައްޑޫ މީދޫ ދާއިރާގެ ކުރީގެ މެންބަރު، ރޮޒައިނާ އާދަމް އާއި އެކަމަނާގެ ފިރިކަލުން، ކިނބިދޫ ދާއިރާގެ ކުރީގެ މެންބަރު، މުހައްމަދު ނާޝިޒު ވެސް ޣަފޫރުގެ އިތުބާރު ނެތްކަމުގެ މައްސަލައިގައި ސޮއިކުރައްވާފައިވެ އެވެ.
ޣަފޫރުގެ އިތުބާރު ނެތްކަމުގެ މައްސަލައެއް އެމްޑީޕީގެ ގައުމީ މަޖިލީހަށް ހުށަހެޅުމުގެ މަސައްކަތް ފެށީ، ހޮނިހިރު ދުވަހު ބޭއްވި ލޯކަލް ކައުންސިލްތަކުގެ އިންތިހާބާއި ފެންނަ ނުފެންނަ ވޯޓުން ލިބުނު ކާމިޔާބީ ފާހަގަ ކުރަން ބޭއްވި ޖަލްސާގައި ވާހަކަ ދެއްކެވުމުގެ ފުރުސަތު ނަޝީދަށް ނުދޭން ނިންމުމުންނެވެ.
ޖަލްސާގައި ވާހަކަ ދެއްކެވުމުގެ ފުރުސަތު ނަޝީދަށް ނުދޭން ނިންމުމުން މަސްލަހު ގެއްލި، އެތެރޭގެ ސިޔާސީ ކޯޅުން އާންމުންނާ ހަމައަސް ތިލަވި އެވެ. އަދި އެއް ފެކްޝަނުން އަނެއް ފެކްޝަނުގެ މައްޗަށް ބޮޑެތި ތުހުމަތުތަކެއް އަމާޒުކުރަމުންދިޔަ އެވެ.
އެ ހޫނުގަނޑުގެ ތެރޭގައި، އެމްޑީޕީގެ ލީގަލް ޑައިރެކްޓަރުގެ މަގާމުގައި ހުންނެވި އަހުމަދު މައުރޫފް އާއި އެ ޕާޓީގެ ޗެއާޕާސަންގެ ނައިބު (އިދާރީ) ގެ މަގާމުގައި ހުންނެވި އިބްރާހިމް ވަހީދު މަގާމުން ވަކިކުރި އެވެ.
ނަޝީދާއި ފައްޔާޒުގެ ފެކްޝަނުގެ އިތުރުން މައިގަނޑު ފެކްޝަނަކަށް ދެން އުޅެނީ ކުރީގެ ރައީސް އިބްރާހިމް މުހައްމަދު ސޯލިހުގެ ފެކްޝަނާއި ޕާޓީގެ ރައީސް އަބްދުﷲ ޝާހިދުގެ ފެކްޝަނެވެ.
އޭގެ އިތުރުން މަޖިލިސް މެންބަރު އަހުމަދު ޝަމްހީދުގެ ފެކްޝަނަކާއި ކުރީގެ ނައިބު ރައީސް ފައިސަލް ނަސީމުގެ ފެކްޝަނެއް ވެސް އެމްޑީޕީގައި މިވަގުތު ހަރަކާތްތެރިވެ އެވެ.
