ދެހާސް ސައުވީސް ވަނަ އަހަރު ބޭއްވި ރައްޔިތުންގެ މަޖިލީހުގެ އިންތިހާބުގައި ހިންނަވަރު ދާއިރާގެ ގޮނޑި ކާމިޔާބުކުރަން ސަރުކާރު ހިންގާ ޕީއެންސީގެ ކެންޑިޑޭޓް މުހައްމަދު އަބްދުއްރަހްމާން 30 މިލިއަން ރުފިޔާ ހަރަދުކުރި ކަމަށް ކުރީގެ ރައީސް އަދި ހިންނަވަރު ދާއިރާގެ މެންބަރުކަން 25 އަހަރު ކުރެއްވި އިބްރާހިމް މުހައްމަދު ސޯލިހު ތުހުމަތު ކުރައްވައިފި އެވެ.
ކައުންސިލް އިންތިހާބުގައި އެމްޑީޕީން ހިންނަވަރުގެ މެޖޯރިޓީ ހޯދުމާ ގުޅިގެން އެ ރަށުގައި ރޭ ބޭއްވި ޖަލްސާގައި ސޯލިހު ވިދާޅުވީ ހިންނަވަރުގެ ގޮނޑި މުހައްމަދަށް ކާމިޔާބުކުރެވުނީ ރިޔާސީ އިންތިހާބުގައި އެމްޑީޕީއަށް ލިބުނު ނާކާމިޔާބީއާ ގުޅިގެން ލިބުނު މާޔޫސްކަމާއި ސަރުކާރުން ފޯރުވި ނުފޫޒުގެ އިތުރުން 30 މިލިއަން ރުފިޔާ ހަރަދު ކުރެއްވުމުން ކަމަށެވެ.
"އަޅުގަނޑަށް މައުލޫމާތު ލިބިފައި އޮތް ގޮތުން ކަމަށްވެއްޖެއްޔާ އެފަހަރުވެސް އެ ގޮނޑި ކާމިޔާބު ކުރެއްވުމަށްޓަކައި މިހާރުގެ ކެންޑިޑޭޓް 30 މިލިއަނަށްވުރެ ގިނަ ރުފިޔާ މި ދާއިރާއަށް ހަރަދު ކުރެއްވި. 30 މިލިއަން ރުފިޔާ. މި ރަށުގެ ގޮނޑީގައި އެވަރުގެ އަގެއް ހުރީމަ އެއީ އަޅުގަނޑު އެކަމާ ދޭތެރޭގައި ފަހުރުވެރިވެސްވާ ކަމެއް،" ސޯލިހު ވިދާޅުވި އެވެ.
ތިރީސް އަހަރަށް ފަހު ހިންނަވަރު ގޮނޑި އެމްޑީޕީއަށް ގެއްލިއްޖެ
ސޯލިހު ވިދާޅުވީ އެމްޑީޕީ އުފެދުނީއްސުރެ ހިންނަވަރުގެ މަޖިލިސް ގޮނޑި ކާމިޔާބުކުރަމުން ގެންދިޔައީ އެމްޑީޕީން ކަމަށެވެ. ނަމަވެސް އެކަން ފުރަތަމަ ފަހަރަށް ބަދަލުވީ ނިމިދިޔަ މަޖިލިސް އިންތިހާބުގައިކަން ސޯލިހު ފާހަގަކުރެއްވި އެވެ.
"ތާރީހަށް ބަލާއިރުގައި އަޅުގަނޑުމެންނަށް ރައްޔިތުންގެ މަޖިލީހުގެ އިންތިހާބެއް އެމްޑީޕީގެ ފިކުރާއި އެމްޑީޕީ އުފެދުނީއްސުރެ ގެއްލިފައި މިއޮތީ އެންމެ ފަހަރަކު. އެއީ ވޭތުވެދިޔަ 30 އަހަރު ދުވަހުގެ ތެރޭގައި މިރަށުގެ ގޮނޑިއެއް އަޅުގަނޑުމެންގެ ވިސްނުމާއި އަޅުގަނޑުމެންގެ ހިޔާލާއި އިދިކޮޅަށް ކާމިޔާބުވި ފުރަތަމަ ފަހަރު،"
ކުރިއަށް އޮތްތަނުގައި ހިންނަވަރު ދާއިރާގެ ގޮނޑި އަނެއްކާވެސް އަނބުރާ އެމްޑީޕީން ހޯދާނެކަމުގެ ޔަގީންކަން ސޯލިހު ވަނީ ދެއްވި އެވެ.
ހިންނަވަރު ދާއިރާގެ މެންބަރުކަން ސޯލިހު 25 އަހަރު ކުރެއްވުމަށްފަހު، އެ ދާއިރާގެ ގޮނޑިއަށް ދެން އިންތިހާބުވީ ޖީހާން މަހްމޫދު އެވެ. ނަމަވެސް ނިމިދިޔަ މަޖިލިސް އިންތިހާބުގައި އޭނާ ބަލިވީ 542 ވޯޓުގެ ބޮޑު ފަރަގަކުންނެވެ.
އިންތިހާބު ކާމިޔާބުކުރެއްވި ޕީއެންސީގެ މުހައްމަދަށް 1،478 ވޯޓު ލިބުނުއިރު، ޖީހާންއަށް ލިބުނީ 963 ވޯޓެވެ. އަމިއްލަ ގޮތުން ވާދަކުރެއްވި އަބްދުއްސަލާމް މޫސާއަށް ލިބުނީ 699 ވޯޓެވެ.
