ފާއިތުވި ތިރީސް އަހަރު ވެސް ހިންނަވަރުގެ މަޖިލިސް ގޮނޑި ފުރަމުންދިޔަ އެމްޑީޕީއަށް އެ ގޮނޑި ގެއްލިއްޖެ އެވެ.
މިހައިތަނަށް ގުނި ވޯޓުގެ ނަތީޖާއިން ދައްކާ ގޮތުގައި އެ ދާއިރާގެ މަޖިލިސް ގޮނޑި ކާމިޔާބު ކޮށްފައިވަނީ ޕީއެންސީގެ ޓިކެޓުގައި ވާދަކުރި މުހައްމަދު އަބްދުލް ރަހްމާން އެވެ. އެ ދާއިރާގެ މަޖިލިސް ގޮނޑި ނިމިދިޔަ ދައުރުގައި ފުރީ އެމްޑީޕީގެ ޖީހާން މަހުމޫދު އެވެ.
ޖީހާންގެ ކުރިން 25 އަހަރު ވަންދެން ރައްޔިތުންގެ މަޖިލީހުގައި ޅ. ހިންނަވަރު ދާއިރާ ތަމްސީލު ކުރެއްވީ ކުރީގެ ރައީސް އިބްރާހިމް މުހައްމަދު ސޯލިހު އެވެ.
މިހައިތަނަށް ގުނި ވޯޓުގެ ނަތީޖާއިން ދައްކާގޮތުން ހިންނަވަރު ދާއިރާގެ އިތުރުން ވެސް މަޖިލީހުގެ ގިނަ ގޮނޑިތަކެއް ސަރުކާރުން ވަނީ ކާމިޔާބުކޮށްފަ އެވެ.
މިއީ މިފަހުގެ ތާރީހުގައި އެމްޑީޕީއަށް މަޖިލިސް އިންތިހާބެއްގައި ލިބުނު އެންމެ ބޮޑު ނާކާމިޔާބީ އެވެ. ނިމިގެން މިދާ 19 ވަނަ މަޖިލީހުގެ ސުޕަ މެޖޯރިޓީ އޮތީ އެމްޑީޕީއަށެވެ. ނަމަވެސް 20 ވަނަ މަޖިލީހުގެ މެޖޯރިޓީ ޕީއެންސީއަށް ލިބޭނެ ކަމަށް ލަފާ ކުރެވެ އެވެ.
