"ދެނެގަތުން ކޮންމެހެން މުހިންމު ކަންކަމުގެ ތެރޭގައި ކުށްފާފަތަކަކީ ގެއްލުންހުރި ކަމެއްކަން އެނގުން ހަމަކޮންމެހެންވެސް ހިމެނިގެންވެއެވެ. އެއިން ހިތަށް ކުރާ ގެއްލުމުގެ މިސާލަކީ ހަށިތަކަށް ވިހައިގެ އަސަރުން ލިބޭ އެކި ދަރަޖައިގެ ގެއްލުންފަދަ އެއްޗެކެވެ.
އޭގެ ސަބަބަކީ ފާފަތަކާއި ކުށްތަކަށް ނުވާ ހަމަ އެއްވެސް ބައްޔެއް ބަދުނަސީބެއް ދުނިޔޭގައި ވިޔަސް އާޚިރަތުގައި ވިޔަސް ލިބިދާނެހެއްޔެވެ؟ އުފާތަކާއި އަރާމުތަކުގެ ގޯތި ސުވަރުގެއިން އަހަރެމެންގެ މައިންބަފައިން ނެރެ، ރިހުންތަކާއި ހިތާމަތަކާއި މުސީބާތްތަކުގެ ގޯއްޗަށް ގެންދިޔައީ ކުށާއިފާފަ ފިޔަވައި އެހެން ކޮން އެއްޗެއްހެއްޔެވެ؟
އިބްލީސް މަލަކޫތީ ޢާލަމުން ބޭރުކުރެވި ލައުނަތް ލެއްވި، އޭގެ ސިފަ ބަދަލުކުރެވި، އޭގެ ސޫރައަކީ އެންމެ ހަޑި އެންމެ ހުތުރު އެތިކަމުގައި ލެއްވުނު ސަބަބަކީ އެހެން ކޮން ކަމެއްހެއްޔެވެ؟ ...ބިމުގެ އެންމެހާ އަހުލުވެރިން ގަރަގުކުރެވި ފަރުބަދަތަކުގެ ކުންނާ ހަމައަށް ފެންބޮޑުވެގެންދިޔަ ސަބަބަކީ ކޮން ކަމެއްހެއްޔެވެ؟
އާދުބާގައިގެ މީހުންނަށް އައި ތޫފާނުން ހޮއިހެދިފައިވާ ރުކުބުޑުތަކެއްހެން އެބައިމީހުން މޫނުވަތަށް ބިންމަތީގެ އެތަން މިތަނަށް ހޭނެތިގެން އުކިފައިތިބީ ކުށްފާފަ ފިޔަވައި އެހެން ކޮންކަމަކާ ލައިގެންހެއްޔެވެ؟ އެބަޔަކުގެ ހިތްތަކާއި ގޮހޮރުތައް ބުރިވެގެން މަރުވެގެންދިޔަ ބިރުވެރި އަޑުގެ ކޯފާއިން ސަމޫދު ބާގައިގެ މީހުން ހަލާކުވެގެންދިޔައީވެސް ކުށާއި ފާފައިގެ ސަބަބުން ނޫން އެހެން ކޮންކަމަކުންހެއްޔެވެ؟
ކުށްފާފައިގެ ސަބަބުން ދުނިޔޭގައި ލިބޭ އުގޫބާތްތަކުގެ ތެރޭގައި، ތައުފީގު މިންވަރުކުރެއްވުން ކުޑަވެގެންދިއުމާއި ބުއްދި ގޯސްވުމާއި ހައްގުގޮތް ނުފެނުމާއި ހިތް ފަސާދަވުމާއި މީސްތަކުންގެ ކުރިމަތީ ތިމާގެ އަގުވެއްޓުމާއި ވަގުތު ގެއްލުމާއި އަނެކުންގެ ނަފުރަތު ލިބުމާއި ކަލާނގެއާ ގުޅުން ކެނޑުމާއި ދުއާ އިޖާބަވުން ހުއްޓިގެންދިއުމާއި ހިތްގާވުމާއި ރިޒްގާއި އުމުރުން ބަރަކާތް ކެނޑުމާއި އެނގުމުން މަހުރޫމުވުން ހިމެނެއެވެ.
ނިކަމެތިކަމުގެ ފޭރާންލެވި، އަދާވާތްތެރިންގެ އިހާނާތްތެރިކަން ލިބި، މެޔަށް ތާށިކަން ވެރިވެ، ތިމާގެ ހިތްފަސާދަކޮށް ވަގުތު ހަރާބުކުރުމުގައި ތިމާގެ ބައިވެރިންކަމުގައިވި ނުބައިއެކުވެރިންގެ ޒަރީއާއިން ޚުދު ތިމާ އިމްތިހާނުކުރެވިގެންދިއުން ވެސް ހިމެނިގެންވެއެވެ.
ހާސްކަން އިތުރުވެ ކަންބޮޑުވުން ދިގުވެ ދިރިއުޅުން ދަތިވެގެންދެއެވެ. ފާފައާއި ގަފުލަތުގެ ސަބަބުން ހާސްކަމާއި ކަންބޮޑުވުންތައް އުފަންވެ އިތުރުވެގެންދަނީ ފެނުގެ ސަބަބުން ކުއްލިއަކަށް ހެދިގަންނަ ގޮވާމުގެ މިސާލުގައެވެ. ގަދަ އަލިފާނުން ބަޑިޖަހާފައި ތަކެތި އަނދާ ހުލިވާ މިސާލުގައެވެ."
ކޮމާކޯޅީގައި ބަޔާންވެ އެދިޔައީ އަޅުގަނޑުގެ އަމިއްލަ ބަސްތަކެއް ނޫނެވެ. ބޮޑު އިލްމުވެރިއެއްކަމަށްވާ އަލްޢައްލާމާ އިބްނުލްޤައްޔިމް ރަޙިމަހުﷲ ވިދާޅުވެފައިވާ ބަސްފުޅުތަކެކެވެ. އޭގައި އެހުރީ ހަމަ ތެދެވެ. ކުށްފާފައަކީ އޭގެ ސަބަބުން ދުނިޔޭގައި އެތައް ގެއްލުމާއި ބަދުނަސީބާއި ކުރިމަތިލާންޖެހޭ ކަމެކެވެ. ކިއެއްހެއްޔެވެ؟ ދުނިޔޭގައިވެސް ޖެހޭ ހުރިހާ މުސީބާތަކާއި ލިބޭހާ ނާކާމިޔާބެއްގެ އަސްލަކީ ކުށާއި ފާފަތެކެވެ.
އެހެންވީމާ، ނާކާމިޔާބާއި ބަދުނަސީބުގައި ތައުބާވުމަށްވުރެ ބުއްދިވެރި އެހެން ކަމަކަށް އިރުޝާދެއް ނުދެވޭނެއެވެ. އަދި ތައުބާވުމަށްވުރެ ހިކުމަތްތެރި އެހެން ކަމެއް އެއްވެސް އިންސާނަކަށް ނުމެކުރެވޭނެއެވެ. އެކަމަކު ތައުބާވުމަކީ ވަކި ގޮތަކަށް ކުރަންޖެހޭ ކަމެކެވެ. ތައުބާވުމަކީ އިސްލާމްދީނުގައި އެކަމަށް ޝަރުތުތަކަކާއި ރުކުންތަކެއް ކަނޑައެޅިފައި ހުރި ކަމެކެވެ.
ކީރިތި ޤުރުއާނާއި ސުންނަތް ދިރާސާކުރެއްވުމަށްފަހު ބޮޑެތި އިލްމުވެރިން ތައުބާވުމުގައި ވަކި ޝަރުތުތަކެއް ފުރިހަމަވުން ލާޒިމްކަމުގައި ވިދާޅުވެފައިވެއެވެ. އިހުލާސްތެރިކަމެވެ. ތެދުވެރިކަމާއެކު ތައުބާވުމެވެ. ތައުބާވާން އެދޭ ފާފަތައް ކުރުން ހުއްޓާލުމެވެ. އެ ފާފަތައް ކުރެވުނުކަމަށް ދެރަވެ ހިތާމަކުރުމެވެ. އެކަންކަން އަލުން ނުކުރުމަށް އަޒުމް ކަނޑައެޅުމެވެ. މީހެއްގެ ނުވަތަ ރައްޔިތުންގެ ހައްގުތަކަކަށް އަރައިގަނެވިފައިވާ ނަމަ ރައްޔިތުންގެ ކިބައިން މާފަށް އެދި ހިތްހަލާލު ހޯދުމެވެ. އަދި ނޭވާހޮޅިއަށް އެޅުމުގެ ކުރިޔަށް ތައުބާވުމެވެ.
ކިތަންމެ ގިނަ ނަމާދެއް ކުރިޔަސް ކިތަންމެ ގިނަ ރޯދައެއް ހިފިޔަސް އަދި އަހަރު ދެކޮޅު އުމުރާ ކުރިޔަސް، މީސްތަކުންގެ ހައްގުތަކަށް އަރައިގަނެ ހިތުހުރިހާ ގޮތަކަށް ފާފަތައް ކުރަމުން ތިމާއަށް ލިބިފައިވާ އާރާއި ބާރަކީ ފާފަތައް އިންތިޒާމުކުރުމުގެ ވަސީލަތްތަކެއްގެ ގޮތުގައި ހަދާނަމަ، އެމީހަކީ ދެދުނިޔޭގައި ބަނގުރޫޓުވެފައި ދުނިޔެއާއި އާޚިރަތުގައިމެ އަބާއްޖަވެރިއެކެވެ. މިއީކީ އަޅުގަނޑުގެ އަމިއްލަ ބަހެއް ނޫނެވެ.
މާތް ނަބިއްޔާ ހަދީސްކުރައްވާފައިވެއެވެ. "ހަމަކަށަވަރުން ތިމަންކަލޭގެފާނުގެ އުންމަތުން ބަނގުރޫޓުވެފައިވާ މީހާ، ޤިޔާމަތް ދުވަހުގައި އަންނާނީ ނަމާދާއި ރޯދައާއި ޒަކާތާ ހިފައިގެންނެވެ. އެކަމަކު އޭނާ އަންނައިރު، އޭނާ ވަނީ އެމީހާއަށް އެއްޗެހި ގޮވައި، މިމީހާއަށް ބަދުބަސްބުނެ މިހިރަ މީހާގެ މުދާ ކައި، އަނެއް މީހާގެ ލޭ އޮހޮރުވައި، ދެން ހުރި މީހާއާ މާރާމާރީ ހިންގާފައެވެ. ދެން އޭނާގެ ހެޔޮ ކަންކަމުން ނަގާފައި އެމީސް މީހުންނަށް ދެވެއެވެ. އެހެން ގޮސް އޭނާގެ ހެޔޮ ކަންކަން ހުސްވުމުން އެމީސްމީހުންގެ ނުބައިފާފަތަކުން ނަގާފައި މީނާގެ ބޮލުގައި އެޅުވެއެވެ. ދެން އޭނާ ނަރަކައަށް އެއްލާލެވެއެވެ."
ހިތުހުރިހާ ނުބައިކަމެއް ކޮށްފައި، ވައްކަމާއި ފަސާދައަށް ހުރިހާ ކަމެއް ހިންގާފައި، އާރާއި ބާރުވެރިކަން އެއީ ފާފަތަކުގެ ވަސީލަތެއްގެ ގޮތުގައި ހަދާފައި، ކިތަންމެ ގިނަ ނަމާދަކާއި، ރޯދައަކާއި އެނޫންވެސް އަޅުވެރި ގޮތްތައް މީސްތަކުންގެ ލޯމައްޗަށް ދެއްކިޔަސް، ހަގީގީ ތައުބާއަކުން ތައުބާ ނުވާނަމަ، އެމީހެއްގެ ނިމުން ޤިޔާމަތްދުވަހުގައި ހުންނާނީ މިހަދީސް ބަސްފުޅުގައި ވާރިދުވެފައިވާ ގޮތުގެ މަތީންނެވެ.
އަދި އޭގެ ކުރިއަށް ދުނިޔޭގައި ފާފަވެރިންނާ ފޮށޭނެ އެންމެހާ ބަލާ މުސީބާތްތަކާއި ބަދުނަސީބުތަކާއި ނާކާމިޔާބުތައް އެއީ އެންމެންގެ ކުރިމަތީގައި ހިނގަމުންދާނޭ ހަމަ އެކަކަށްވެސް އެކަންކަން ނުހުއްޓުވޭނެ ގޮތުން ދުނިޔަވީ އުގޫބާތްތަކުގެ ގޮތުގައި ފާފަވެރިންނަށް ލައިގަންނަމުންދާނޭ ކަންކަމެވެ.
އިބްރާހީމް ސޫރަތުގެ ސާޅީސް ދެވަނަ އާޔަތުގައިވެއެވެ. "އަނިޔާވެރިން ކުރާ ކަންތަކާމެދު، ﷲ ޣާފިލުވެ ވޮޑިގެންވާކަމަށް ކަލޭގެފާނު ހީފުޅުނުކުރައްވާ ހުށިކަމެވެ! އެކަލާނގެ އެއުރެން ފަސްކުރައްވާކަން ކަށަވަރީ ލޯތައް ހުޅުވޭ ދުވަހަކަށެވެ."
