ހުޅުމާލޭގައި ހުންނަ މޯލްޑިވްސް ކަރެކްޝަންސް ސާވިސަސްގެ ހެޑްކުއާޓާސް އާއި ރިމާންޑު ޖަލެއް ހެދުމަށް އެ އިދާރާއަށް ދޫކޮށްފައި އޮންނަ ބިމުގައި ގަވާއިދާ ހިލާފަށް ޕްރިޒަންސް ކޮމިޝަނަރުގެ ވެހިކަލްތައް ޕާކު ކުރާ މައްސަލައެއް ފެންމަތިވެއްޖެ އެވެ.
ނަން ނުޖެހުމަށް ޝަރުތުކޮށް އަދަދު އަށް މައުލޫމާތު ދިން ކަރެކްޝަންސްގެ ބައެއް ބޭފުޅުން ބުނީ ހުޅުމާލޭގައި ހުންނަ ހެޑްކުއާޓާސްގައި ވެސް އަދި ރިމާންޑު ޖަލު ހަދަން ދޫކޮށްފައި އޮންނަ ބިމުގައި ވެސް އެއްވެސް މީހެއްގެ އަމިއްލަ ވެހިކަލެއް ޕާކުކޮށްފައި ބޭއްވުމަކީ މަނާކަމެއް ކަމަށެވެ. ނަމަވެސް، ކޮމިޝަނަރު ޒަރީރުގެ ވެހިކަލްތައް އެ ދެ ތަނުގައި ޕާކު ކޮށްފައި ހުންނަ ކަމަށް އޭނާ ބުންޏެވެ.
"މީގެ ކުރިން ވެސް އެޗްކިއުގައި ހަތަރު ކާރު ބާއްވާފައި އޮތް، އެކަމަކު މުވައްޒަފުން ޝަކުވާ ކުރަން ފެށީމާ ނެގީ، އަޅުގަނޑުމެންގެ [ކަރެކްޝަންސްގެ] ވެހިކަލްތައް ވެސް ބަހައްޓަން ޖެހޭނެތާ އެ ތަނުގައި،" އޭނާ ބުންޏެވެ.
ޒަރީރުގެ ބައެއް ވެހިކަލްތައް ކަރެކްޝަންސްގެ ހެޑްކުއާޓާސް އާއި ރިމާންޑު ޖަލު ހެދުމަށް އެ އިދާރާއަށް ދީފައި އޮންނަ ބިމުގައި ޕާކު ކޮށްފައި ހުރި ތަން ފެންނަ ފޮޓޯތަކެއް ވެސް މި ނޫހަށް ވަނީ ލިބިފަ އެވެ. ކަރެކްޝަންސްގެ ހެޑްކުއާޓާސްގެ ތެރޭގައި އެނާޖީ އޮރެންޖު ކުލައިގެ ނިސާން މާޗު ކާރެއް ޕާކު ކޮށްފައި އޮންނަ ތަން އޭގެ ތެރެއިން އެއް ފޮޓޯއިން ފެނެ އެވެ. އެއީ ބީ ޒޯނަށް ރެޖިސްޓްރީ ކޮށްފައިވާ ކާރެކެވެ.
މި ނޫހަށް މައުލޫމާތު ދިން މީހާ ބުނީ، ހެޑްކުއާޓާސްއަށް އެ ކާރު ވެއްދީ އޭ ޒޯނަށް ރެޖިސްޓްރީ ނޫން އެހެން ޒޯނުތަކަށް ރެޖިސްޓްރީ ކޮށްފައިވާ ވެހިކަލްތައް ޓޯ ކުރަން ފެށި ދުވަސްވަރު އެވެ. އެއަށްފަހު، އެ ކާރު ބާއްވާފައި އޮންނަނީ އެ ތަނުގައި ކަމަށް އޭނާ ބުންޏެވެ.
ރިމާންޑު ޖަލެއް ހެދުމަށް ކަރެކްޝަންސްއަށް ދޫކޮށްފައިވާ ބިމުގައި ވެސް ކާރެއް ބާއްވާފައި އޮންނަ މަންޒަރު ފެންނަ ފޮޓޯތަކެއް މި ނޫހަށް ލިބިފައިވެ އެވެ. ނަމަވެސް، އެ ކާރުގައި ސަތަރި އަޅާފައި އޮތުމުގެ ސަބަބުން، އެއީ ކޮން މަރުކާއެއްގެ ކާރެއް ކަމެއް، އަދި އެ ކާރުގެ ނަންބަރެއް ނޭނގެ އެވެ.
އެކަމާ ބެހޭގޮތުން ޒަރީރުއާ ސުވާލު ކުރުމުން އޭނާ ވިދާޅުވީ އެ ދެ ކާރު އެ ތަނުގައި ޕާކު ކޮށްފައި އޮންނަނީ ހުޅުމާލެ ޖަލުގެ ޑައިރެކްޓަރު، ސުޕްރިޑެންޓް އޮފް ޕްރިޒަންސް އަހުމަދު ޖާދުالله ހުއްދަ ދެއްވައިގެން ކަމަށެވެ.
"އެއީ އަޅުގަނޑުމެން ރިޕެއާއަށް ގެނައި އެއްޗެއް އެއީ، ދެން އޭތީގައި ޖަލުގެ ޑައިރެކްޓަރުގެ ހުއްދައާ އެކީގައި ބާއްވާފައި އެ އޮތީ، ދެން އާންމުކޮށް ކޮމިޝަނަރުންގެ އެއްޗެހިތައް ބާއްވާ ކަމަށް ވަނީ، ދެން އަޅުގަނޑުގެ އެދުމަކަށް ނޫން، ޖަލުގެ ޑައިރެކްޓަރެއް ހުރޭ، އޭނާ ހުއްދަ ދިނީމާ އޭތި ބާއްވާފައި އޮތީ ވަގުތީގޮތުން ގަރާޖަކަށް ގެންދެވެންދެން،" ޒަރީރު ވިދާޅުވި އެވެ.
ޒަރީރު އެހެން ވިދާޅުވި ނަމަވެސް، އެފަދަ ހުއްދައެއް ޖާދުالله ގެ ފަރާތުން ދީފައި ނުވާކަން މި ނޫހަށް ވަނީ ކަށަވަރުވެފަ އެވެ. އަދި، އެ ކާރުތައް ބަހައްޓާފައި ހުރީ ޖާދުالله ގެ ބާރު ހިނގާ ސަރަހައްދުތަކެއްގައި ނޫންކަން ވެސް މި ނޫހަށް މައުލޫމާތު ދިން މަސްދަރުތަކުން ބުންޏެވެ.
އެކަމާ ބެހޭ ގޮތުން ވާހަކަދައްކަވަމުން ކަރެކްޝަންސްގެ ކުރީގެ އިސްވެރިއަކު މި ނޫހަށް ވިދާޅުވީ ކޮމިޝަނަރުގެ ކާރެއް ކަރެކްޝަންސްގެ ހެޑްކުއާޓާސްގައި އަދި އެ އިދާރާގެ ބިމެއްގައި ބާއްވަން، އޭނާއަށްވުރެ މާ ދަށް ވަޒީފާގައި ހުންނަ މީހަކަށް ހުއްދަ ދިނުމަކީ ބުއްދި ވެސް ގަބޫލު ނުކުރާ ކަމެއް ކަމަށެވެ.
"ޖާދުالله އަކަށް ނުވެސް ދެވޭނެއެއްނު ހުއްދައެއް، ޖާދުالله އަކީ ހުޅުމާލެ ޖަލުގެ ޑައިރެކްޓަރު، ޒަރީރުއަކީ ކޮމިޝަނަރު، އެހެންވީމާ ޖާދުالله ގެ ސުޕަވައިޒަރުގެ މަގާމުގައި ހުރި މީހެއް ތާ [ޒަރީރުއަކީ]،" އޭނާ ބުންޏެވެ.
"އެހެން ނޫނަސް، ޖާދުالله ހުއްދަ ދިނަސް އެކަމެއް ނުކުރެވޭނެ، އެއީ ދައުލަތުގެ އިދާރާއެއްގެ ތެރޭގައި އެއްވެސް އަމިއްލަ މީހެއްގެ މުދަލެއް ނުބެހެއްޓޭނެ،" އޭނާ ބުންޏެވެ.
