ހުޅުމާލޭގެ ދެވަނަ ފިޔަވަހީގެ ޗެނެލް ޕާކް ސަރަހައްދުގައި ލަގްޒަރީ ހައުސިން މަޝްރޫއެއް ހިންގަން، ޗައިނާގެ ނަންޓޮންގް ޒިންހުއާ ކޮންސްޓްރަކްޝަން ގްރޫޕާ ހަވާލުކުރި ބިމުގެ މައްސަލަ އެންޓި ކޮރަޕްޝަން ކޮމިޝަނުން ބަލަނިކޮށް އެ ބިން ހަވާލުކޮށްފި އެވެ.
މި މައްސަލަ ބަލަމުން ދަނިކޮށް، އެޗްޑީސީން އޭސީސީއަށް ފޮނުވި ސިޓީއެއް އަދަދު ނޫހަށް ލިބިފައިވެ އެވެ. އެ ސިޓީގައި ވަނީ މަޝްރޫއު ހުއްޓާލުމަކީ ކުންފުންޏަށާއި އިންވެސްޓަރުންނަށް ބޮޑު ގެއްލުމެއް ވާނެ ކަމެއް ކަމަށް ބުނެފައެވެ.
މަސްދަރުތަކުން މައުލޫމާތު ދިން ގޮތުގައި، މި މަޝްރޫއުގެ ބިން އެ ކުންފުންޏާ ހަވާލުކުރީ މިދިޔަ ހޮނިހިރު ދުވަހު ބޭއްވި ލޯކަލް ކައުންސިލް އިންތިހާބަށް އެންމެ ދެ ދުވަހަށް ވެފައި ވަނިކޮށެވެ.
މިކަމާ ގުޅޭގޮތުން އެޗްޑީސީގެ މެނޭޖިން ޑިރެކްޓަރު ޒުހައިރުގެ ބަހެއް ހޯދުމަށް ކުރި މަސައްކަތް ވަނީ ކާމިޔާބުވާ ގޮތް ނުވެފައެވެ.
އެޗްޑީސީން ލަގްޒަރީ ހައުސިން މަޝްރޫއު އިއުލާނުކުރީ ނަންޓޮންގުން އެކަމަށް އެދި މެއިލްއެއް ފޮނުވިތާ ދެ ދުވަސް ތެރޭ
މި މަޝްރޫއު އިއުލާނުކުރީ މިކަމުގެ މައުލޫމާތު ކުރިން ލިބި، ހުރިހާ ލިޔެކިޔުމެއް ތައްޔާރުކޮށްގެން ތިބި "ވަކި ބަޔަކަށް" މަގުފަހިކޮށްދިނުމަށް ކޮށްފައިވާ ކަމެއް ކަމަށް ބެލުމުގެ ޖާގަ ބޮޑު ކަމަށް އޭރު ތުހުމަތުކުރެވުނު. މިހާރު މި ނޫހަށް ލިބިފައިވާ ލިޔެކިޔުންތަކުން އެކަން ކަށަވަރުވެފަ.
މި މަޝްރޫއަށް އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުމަށް އެޗްޑީސީން އިއުލާން ކުރުމުގެ މާ ކުރިންވެސް ނަންޓޮންގް ކުންފުނިން އޮތީ ހުރިހާ ތައްޔާރީތަކެއް ވެފައެވެ. އެގޮތުން، މި މަޝްރޫއުގެ ލިޔެކިޔުންތަކުގައި ޕަބްލިކް ނޮޓަރީން ސޮއިކޮށްފައިވަނީ އިއުލާން ކުރުމުގެ 11 ދުވަސް ކުރިން، ޑިސެމްބަރު މަހުގެ 7 ވަނަ ދުވަހުއެވެ. އޭގެ ފަހުން، ޑިސެމްބަރު 16 ގައި އެ ކުންފުނިން އެޗްޑީސީއަށް މެއިލްއެއް ފޮނުވައި މަޝްރޫއަށް ޝައުގުވެރިކަން ފާޅުކުރުމާއެކު، އެޗްޑީސީން ރަސްމީކޮށް ފުރުސަތު ހުޅުވާލީ ޑިސެމްބަރު 18 ގައެވެ.
މި މަޝްރޫއަށް ކުރިމަތިލުމަށް އެޗްޑީސީން ދީފައިވަނީ އެންމެ 6 ދުވަހުގެ ކުރު މުއްދަތެކެވެ. ޑިސެމްބަރު 24 ގައި ސުންގަޑި ހަމަވިއިރު، ޖުމްލަ 9 ކުންފުންޏަކުން ކުރިމަތިލި ނަމަވެސް، 6 ކުންފުންޏެއް ޝަރުތު ހަމަނުވާ ކަމަށް ނިންމީ ކުރު މުއްދަތުގެ ތެރޭގައި ލިޔެކިޔުންތައް ހަމަނުކުރެވޭ ކަމަށް ބުނެއެވެ.
ވިޔަފާރިވެރިން ފާހަގަކުރާ ގޮތުގައި، މިފަދަ ބިޔަ މަޝްރޫއަކަށް ފަންނީ ދިރާސާތަކާއި ފައިނޭންޝަލް މޮޑެލްތައް 6 ދުވަހުން ތައްޔާރުކުރުމަކީ އާންމު އިންވެސްޓަރަކަށް ކުރެވޭނެ ކަމެއް ނޫނެވެ. ނަމަވެސް، ބިޑުތައް ހުޅުވިތާ 24 ގަޑިއިރު ނުވަނީސް ޑިސެމްބަރު 25 ގައި ބޭއްވި ބޯޑު ބައްދަލުވުމުން ވަނީ މި މަޝްރޫއު ނަންޓޮންގް ކުންފުންޏަށް ދޭން ނިންމާފައެވެ.
މި މަޝްރޫއުގެ ދަށުން ޗެނެލް ޕާކް ސަރަހައްދު ހިމެނޭހެން 1.3 މިލިއަން އަކަފޫޓުގެ ބޮޑު ސަރަހައްދެއް ދިނުމަށް ވަނީ ހަމަޖެހިފައެވެ. ނަންޓޮންގް އިން އަމިއްލައަށް ފައިނޭންސް ކުރާ މި މަޝްރޫއު ހިންގުމަށް އެޗްޑީސީ އާއެކު އުފައްދާ ޖޮއިންޓް ވެންޗާގެ 70 ޕަސެންޓު ހިއްސާ އޮންނާނީ އެ ކުންފުންޏަށެވެ. މީގެ އިތުރުން، އެޗްޑީސީގެ ބޯޑުން ވަނީ ތިން މަސްދުވަހުގެ ފްރޭމްވޯކް އެގްރީމެންޓެއް ހެދުމަށާއި، މި މުއްދަތުގައި މަޝްރޫއުގެ ޑިޒައިނާއި ސީއޭސްއާރު ހަރަދުގެ ތަފުސީލުތައް ނިންމުމަށް ފާސްކޮށްފައެވެ.
