ދަރިވަރުންނަށް ބޭނުންވާ އެންމެ ފަހުގެ މައުލޫމާތާއި ހުނަރުތައް ފޯރުކޮށްދީ، ވަޒީފާގެ މައިދާނަށް ފުރިހަމައަށް ތައްޔާރުވެފައިވާ ހުނަރުވެރި ޖީލެއް ބިނާކުރުމަށް ޔުނިވާސަލް ފައުންޑޭޝަނާއި ވިލާ ކޮލެޖު ގުޅިގެން ކުރިއަށްގެންދާ "ޑިސްކަވާ ހޮސްޕިޓާލިޓީ" ޕްރޮގްރާމް މި އަހަރުވެސް ކުރިއަށް ގެންދަން އެއްބަސްވުން އާކޮށްފި އެވެ.
މި އެއްބަސްވުމުގައި ޔުނިވާސަލް ފައުންޑޭޝަންގެ ފަރާތުން ސޮއިކުރެއްވީ އެ ފައުންޑޭޝަންގެ ރައީސް އިޔާޒް ވަހީދު އެވެ. ވިލާ ކޮލެޖުގެ ފަރާތުން ސޮއިކުރެއްވީ އެ ކޮލެޖުގެ ވައިސް ރެކްޓާ ޑރ. އަލީ ނަޖީބު އެވެ.
އެއްބަސްވުމުގެ ދަށުން މެއި 10، ގެ ނިޔަލަށް ކުރިމަތިލާން ހުޅުވާލީ އޮޕަރޭޝަންސް ދާއިރާއިން ސެޓްފިކެޓް 3 ކޯސް އަދި ކައްކަން ދަސްކޮށްދޭ ކަލިނަރީ ދާއިރާއިން ސެޓްފިކެޓް 3 ކޯހަށް ކަމަށްވާއިރު، ކޯހުގެ ކިޔެވުން ފެށުމަށް ހަމަޖެހިފައިވަނީ ޖޫން 1، ގަ އެވެ.
މިއީ ތިއަރީ ބައިތަކާއި އަމަލީ ތަމްރީނުތައް ހިމެނޭ ގޮތަށް ފަރުމާކޮށްފައިވާ ޕްރޮގްރާމެކެވެ. އެގޮތުން ތިއަރީ ބައިތައް ވިލާ ކޮލެޖުގައި ކުރިއަށްދާއިރު، ތިން މަސް ދުވަހުގެ އަމަލީ ތަމްރީނުތައް ކުރިއަށްދާނީ ވާސާ ހޮސްޕިޓާލިޓީގެ ދަށުން ހިންގާ ރިސޯޓުތަކުގަ އެވެ. އެއީ ކުރިން ޔުނިވާސަލް ރިސޯޓްސްގެ ނަމުގައި ހިންގި ކުންފުންޏެވެ.
މި ޕްރޮގްރާމްގެ ހުރިހާ ހަރަދެއް ބަލަހައްޓަނީ ޔުނިވާސަލް ފައުންޑޭޝަނުންނެވެ. އަދި އަމަލީ ތަމްރީނު ހޯދާ މުއްދަތުގައި ވާސާ ހޮސްޕިޓާލިޓީގެ ފަރާތުން ކޮންމެ ދަރިވަރަކަށްވެސް އެލަވަންސެއް ދިނުމަށް ވަނީ ހަމަޖެހިފަ އެވެ.
މިހާތަނަށް މި ޕްރޮގްރާމްގެ ދަށުން 200 އަށްވުރެ ގިނަ ދަރިވަރުން ވަނީ ތަމްރީނު ފުރިހަމަކޮށްފަ އެވެ. އެއީ އޮޕަރޭޝަންސް ދާއިރާއިން ހަތް ބެޗެއް އަދި ކަލިނަރީ ދާއިރާއިން ދެ ބެޗެވެ.
2017 ވަނަ އަހަރު ފެށި މި ޕްރޮގްރާމަކީ ފަތުރުވެރިކަމުގެ ދާއިރާއަށް ބޭނުންވާ ހުނަރުވެރި ދިވެހި ޒުވާނުން ބިނާކުރުމަށް ޔުނިވާސަލް ފައުންޑޭޝަނުން ކުރިއަށްގެންދާ މުހިންމު މަސައްކަތެކެވެ.
