ނޭޕްލްސް، އިޓަލީ (އޭޕްރީލް 9) - ހުސްވެފައިވާ އިޓަލީ ގައުމީ ފުޓްބޯޅަ ޓީމުގެ ކޯޗުގެ މަގާމަށް ދާން ނަޕޯލީގައި ހުރި އެންޓޯނިއޯ ކޮންޓޭ ބޭނުންނަމަ އޭނާ އަށް އެ ފުރުސަތު އޮންނާނެ ކަމަށް ނަޕޯލީގެ ރައީސް، އައުރެލިއޯ ޑި ލޯރެންޓިސް ވިދާޅުވެއްޖެ އެވެ.
އިޓަލީ ގައުމީ ޓީމުގެ ކޯޗުގެ ވަޒިފާ ހުސްވީ، އެ މަގާމުގައި ހުރި ކުރީގެ މިޑްފީލްޑަރު، ޖެނާރޯ ގަޓޫސޯ އަމިއްލަ އަށް މަގާމުން އިސްތިއުފާ ދިނުމުންނެވެ. ގަޓޫސޯ، އިޓަލީގެ ކޯޗުކަމުން އިސްތިއުފާ ދިނީ، އަންނަ ޖޫން މަހު، އެމެރިކާ، މެކްސިކޯ އަދި ކެނަޑާގައި ކުރިއަށްދާ ފީފާ ވޯލްޑް ކަޕަށް އިޓަލީ ކޮލިފައިނުވުމުންނެވެ. މިއީ، އިޓަލީ އަށް ވޯލްޑް ކަޕްގެ ޖާގަ ނުލިބި ދިޔަ ޖެހިޖެހިގެން ތިން ވަނަ މުބާރާތެވެ. އިޓަލީން އެންމެ ފަހުން ވޯލްޑް ކަޕެއްގައި ކުުޅުނީ 2014 ވަނަ އަހަރު އެވެ.
ކޮންޓޭ ވަނީ 2014 އިން 2016 އަށް އިޓަލީގެ ކޯޗުކަން ކޮށްފަ އެވެ. އަދި، ކޮންޓޭގެ ކޯޗުކަމުގައި އިޓަލީން ވަނީ 2016 ވަނަ އަހަރުގެ ޔޫރޯގެ ކުއާޓާ ފައިނަލަށް ދަތުރުކޮށްފަ އެވެ.
އިޓާލިއަން ލީގުގައި މިލާން އަތުން ނަޕޯލީ މޮޅުވި މެޗަށް ފަހު، އިޓަލީއާ ގުޅޭގޮތުން އަމާޒުވި ސުވާލުތަކަށް ޖަވާބުދެމުން ކޮންޓޭ ބުނީ މީޑިއާ އިން މިދިޔަ އަހަރު އޭނާ ޔުވެންޓަސް އަށް ގެންދަން ވެސް ވާހަކަ ދެއްކި ކަމަށާއި މި ފަހަރު އިޓަލީ އަށް ގެންދާ ވާހަަކަ މީޑިއާ އަށް އައުމުން ހައިރާންނުވާ ކަމަށެވެ.
ކޮންޓޭގެ އެ ވާހަކަތަކާ ގުޅޭގޮތުން، މީޑިއާ އިން ޑި ލޯރެންޓިސްއާ ސުވާލުކުރުމުން ވިދާޅުވީ، އިޓަލީއާ ހަވާލުވާން ކޮންޓޭ ނިންމައިފިނަމަ އެ ފުރުސަތު ދޭނެ ކަމަށެވެ. އެކަމަކު، މި ވަގުތު އިޓަލީގެ ފުޓްބޯޅަ ފެޑެރޭޝަނާއި ގައުމީ ޓީމާ ގުޅޭ އެހެނިހެން ކަންކަން އޮތްގޮތުން، ކޮންޓޭ ގައުމީ ޓީމާ ހަވާލުވާން ދާނެތޯ އެއީ ވެސް ސުވާލެއް ކަަމަށް ޑި ލޯރެންޓިސް ވަނީ ވިދާޅުވެފަ އެވެ.
"ވަރަށް ޑިސްއޯގަނައިޒްކޮށް އޮތްތަނަކަށް ކޮންޓޭ ދާނެހެން ހީވޭތަ؟." ޑި ލޯރެންޓިސް ވިދާޅުވި އެވެ.
އިޓަލީއާ ހަވާލުވާނެ ކަމަށް މީޑިއާގައި އަޑުފެތުރޭ ކޯޗުންގެ ތެރޭގައި، އެ ޓީމަށް 2021 ވަނަ އަހަރު ބޭއްވި، 2020 ވަނަ އަހަރުގެ ޔޫރޯ ކާމިޔާބުކޮށްދިން ރޮބާޓޯ މަންޗިނީ އާއި މި ވަގުތު އޭސީ މިލާނުގައި ހުރި މަސިމޯ އަލެގްރީ ހިމެނެ އެވެ.
