އެކި ފަރާތްތަކުގެ އެހީތެރިކަމާ އެކު، ހުޅުމާލޭގައި ގާއިމްކުރާ ދުނިޔޭގެ ފެންވަރުގެ ސްވިމިން ޕޫލުގެ މަސައްކަތް އަވަހަށް ނިންމުމަށްޓަކައި މޯލްޑިވްސް އެކުއަޓިކްސް (ސްވިމިން އެސޯސިއޭޝަން އޮފް މޯލްޑިވްސް) އިން 71 މިލިއަން ރުފިޔާގެ ލޯނެއް ނަގަން ނިންމައިފި އެވެ.
މިއީ، ކުޅިވަރު އެސޯސިއޭޝަނަކުން މިހާތަނަށް ބެންކެއް މެދުވެރިކޮށް ނަގާ އެންމެ ބޮޑު ލޯނެވެ.
އެ ގޮތުން، މޯލްޑިވްސް އެކުއަޓިކްސް އިން ރޭ ބޭއްވި އަހަރީ އާންމު ޖަލްސާގައި މި އަހަރަށް ފާސްކުރި ބަޖެޓުގައި ވަނީ ލޯނުގެ ގޮތުގައި ލިބޭ ފައިސާ ކަަމަށް 71،745،000 ރުފިޔާ ހިމަނައި، މި އަހަރަށް 97،249،198 ރުފިޔާގެ ބަޖެޓެއް ފާސްކޮށްފަ އެވެ.
އެންމެ ބޮޑު އަމާޒަކީ ސްވިމިން ޕޫލްގެ މަސައްކަތް ނިންމުން
ސްވިމިން އެސޯސިއޭޝަން އޮފް މޯލްޑިވްސްގެ ރައީސްގެ މަގާމަށް ހަތަރު ވަނަ ދައުރަކަށް އިންތިހާބުވުމަށް ފަހު، އެންމެ އިސްކަމެއްދީގެން ކުރަން ބޭނުންވަނީ ސްވިމިން ޕޫލްގެ މަސައްކަތް ނިންމާލުމަށް ކަމަށް ސްވިމިން އެސޯސިއޭޝަންގެ ރައީސް މުހައްމަދު އަބްދުއްސައްތާރު (ޗަމްޕީ) ވަނީ ވިދާޅުވެފައި
ޗަމްޕާ އާއިލާގެ ފަރާތުން ބޮޑު ހޭދައެއްކޮށް، ފެތުމުގެ ދުނިޔޭގެ ޖަމިއްޔާ، ވޯލްޑް އެކުއަޓިކްސް އާއި ސްޕޯޓްސް މިނިސްޓްރީގެ ވެސް އެހީއާ އެކު ގާއިމްކުރާ އޮލިމްޕިކް ސައިޒުގެ ސްވިމިން ޕޫލުގެ މަސައްކަތް މިދިޔަ އަހަރުގެ ނިޔަލަށް ނިންމާލެވޭތޯ މަސައްކަތްކުރި އެވެ.
އެކަމަކު، އެކި ސަބަބުތަކާ ހުރެ އެ މަސައްކަތް ދިގުލައި ގޮސްފައިވާއިރު، އަވަސް ދުވެއްޔެއްގައި ކަންކަން ކުރިއަށްގެންގޮސް ނިންމާލުމަށްޓަކައި، ސްވިމިން އެސޯސިއޭޝަން، މޯލްޑިވްސް އެކުއަޓިކްސް އިން ނިންމާފައިވަނީ، ބެންކް އޮފް މޯލްޑިވްސް (ބީއެމްއެލް) މެދުވެރިކޮށް، 71 މިލިއަން ރުފިޔާގެ ލޯނެއް ނެގުމަށެެވެ.
"އަދަދު ސްޕޯޓްސް" އަށް ސްވިމިން އެސޯސިއޭޝަންގެ ރައީސް، މުހައްމަދު އަބްދުއްސައްތާރު (ޗަމްޕީ)، މިއަދު ދިން އިންޓަވިއުގައި ވިދާޅުވީ، އެސޯސިއޭޝަނުން ވަރަށް ބޮޑު އަހައްމިއްޔަތު ކަމެއް ދީގެން ކުރަމުން އަންނަ ސްވިމިން ޕޫލުގެ މަސައްކަތް އަވަހަށް ނިމިގެން ދިއުމަކީ އެންމެންނަށް ވެސް މީގެ އެންމެ ފައިދާ ބޮޑު ގޮތް ކަމަށެވެ.
އެންމެ ފުރަތަމަ ސްވިމިން އެސޯސިއޭޝަނުން ނިންމާފައި އޮތީ ކޮންޓްރެކްޓާ ފައިނޭންސިން މޮޑެލް ބޭނުންކޮށްގެން މި ޕްރޮޖެކްޓަށް ބޭނުންވާ ފައިސާ ހޯދުމަށެވެ. އެކަމަކު، އެ ކަމަކީ ވެސް އޭގެ ޒާތުގައި ބަލާއިރު، ލޯނެއް ގޮތަށް އޮންނަ ކަމެއް ކަމަށްވާއިރު، މީގެ އަވަހަށް މަސައްކަތްތައް ކުރިއަށްގެންދެވޭނެ ގޮތަށް ބަލާފައި، އެސޯސިއޭޝަންގެ ހިންގާ ކޮމިޓީން ގާނޫނީ ލަފާ ވެސް ހޯދުމަށް ފަހު ލޯނަކަށް ދިއުމަށް ނިންމީ ކަމަށް ސައްތާރު ވިދާޅުވި އެވެ.
"އަޅުގަނޑުމެން ބޭނުންވީ، މި މަސައްކަތް އަވަހަށް ކުރިއަށްގެންގޮސް، ސްވިމިން އިން މި ބޭނުންވާ ކަންކަން ފެށިގެންދާނެ ގޮތަކަށް ކަންކަން ރޭވުމަށް، އެކަމަށްޓަކައި މި ލޯން މި ނެގީ، ގްރޭސް ޕީރިއަޑެއް ވެސް އިންނާނެ، ދެން، ރިޕޭމެންޓް ވެސް އިންނާނެ 10 އަހަރު. ވަރަށް ރަނގަޅަށް މުއާމަލާތު ކުރެވިގެން ކަންކަން މި ދަނީ، އުންމީދަކީ، މި އަހަރުގެ ސެޕްޓެމްބަރު ތެރޭ ނިންމާލުން (ޕޫލްގެ ބޮޑު މަސައްކަތްތައް)،" ސައްތާރު ވިދާޅުވި އެވެ.
ސްވިމިން ޕޫލް ވެގެންދާނީ ރާއްޖޭގެ ކުޅިވަރުގައި ގާއިމުކުރާ އެންމެ ފުރިހަމަ އެއް ވަސީލަތަށް
އެކި ފަރާތްތަކުގެ އެހީތެރިކަމާ އެކު، ހުޅުމާލޭގައި ގާއިމްކުރާ ސްވިމިން ޕޫލް ވެގެންދާނީ ރާއްޖޭގެ ކުޅިވަރުގައި ގާއިމުކުރާ އެންމެ ފުރިހަމަ އެއް ވަސީލަތަށް ކަމަށް ސްވިމިން އެސޯސިއޭޝަން އޮފް މޯލްޑިވްސްގެ ނައިބު ރައީސް، އިސްމާއިލް އަލީ ވަނީ ވިދާޅުވެފައި.
މޯލްޑިވްސް އެކުއަޓިކްސްގެ ނައިބު ރައީސް، އިސްމާއިލް އަލީ، ވިދާޅުވީ، މިއީ، ރާއްޖޭގެ ކުޅިވަރު އެސޯސިއޭޝަނަކުން މި ގޮތަށް ނަގާ އެންމެ ބޮޑު ލޯނު ކަމަށެވެ. އެހެން ކަމަަށްވުމާ އެކު، ގާނޫނީ ގޮތުން މި ކަމުގައި ބަލަން ޖެހޭ ހުރިހާ ކަމެއް ކަށަވަރުކުރުމަށް، ސްވިމިން އެސޯސިއޭޝަންގެ ހިންގާ ކޮމިޓީން ހުރިހާ މަސައްކަތެއް ފުރިހަަމަ ކޮށްފައިވާނެ ކަމުގެ ޔަގީންކަން އިސްމާއިލް ވަނީ ދެއްވައިފަ އެވެ.
"(މޯލްޑިވްސް އެކުއަޓިކްސްގެ) ހިންގާ ކޮމިޓީ އަށް މި ކަމުގެ ހުރިހާ މައުލޫމާތެއް ފޯރުކޮށްދެވި، ގާނޫނީ ގޮތުން ބަލަންޖެހޭ ކަންކަން ވެސް ފުރިހަމަ ކުރެވިގެން މި ކަން މި ދަނީ، ބޭނުންވަނީ، ސްވިމިން ޕޫލްގެ މަސައްކަތް ދެން އިތުރަށް ލަސްނުވެ، ކުރިއަށްގެންގޮސް ނިންމާލުމަށް،" އިސްމާއިލް ވިދާޅުވި އެވެ.
އޮލިމްޕިކް ސައިޒުގެ ސްވިމިން ޕޫލެއް ގާއިމްކުރަނީ ހުޅުމާލޭ ފޭސް އެކެއްގަ އެވެ. އެއީ، ހަތަރު ބުރީގެ އިމާރާތެކެވެ. ސްވިމިންގެ މި ފެސިލިޓީގައި އޮލިމްޕިކް ސައިޒުގެ ސްވިމިން ޕޫލެއްގެ އިތުރުން، ވޯލްޑް އެކުއަޓިކްސް ސަޓިފައިޑް ޑައިވިން ޕޫލެއް ހިމެނޭއިރު، 1200 އަށް ވުރެ ގިނަ މީހުންނަށް ކުޅިބެލޭނެ ސިޑިބަރި އާއި ބޭނުންވާ އެހެން ވަސީލަތްތައް ހިމެނޭނެ އެވެ.
