ސްވިމިން އެސޯސިއޭޝަން އޮފް މޯލްޑިވްސްގެ ރައީސްގެ މަގާމަށް ހަތަރު ވަނަ ދައުރަކަށް އިންތިހާބުވުމަށް ފަހު، އެންމެ އިސްކަމެއްދީގެން ކުރަން ބޭނުންވަނީ ސްވިމިން ޕޫލްގެ މަސައްކަތް ނިންމާލުމަށް ކަމަށް ސްވިމިން އެސޯސިއޭޝަންގެ ރައީސް މުހައްމަދު އަބްދުއްސައްތާރު (ޗަމްޕީ) ވިދާޅުވެއްޖެ އެވެ.
ހުޅުމާލޭގައި ގާއިމްކުރާ ސްވިމިން ޕޫލްގެ ބިން ހަމަޖެހިފައިވާއިރު، އެ ޕޫލުގެ މަސައްކަތް މިހާރު އަންނަނީ ކުރަމުންނެވެ. ސައްތާރު ވިދާޅުވީ، ދެން ސްވިމިން އެސޯސިއޭޝަންގެ އިންތިހާބީ ޖަލްސާއެއް ބޭއްވޭއިރު، ސްވިމިން ޕޫލެއް އޮންނާނެ ކަމަށެެވެ.
"މިހާރު ވަރަށް ބުރަކޮށް އެކަމުގައި މަސައްކަތް ކުރަމުން އެ ދަނީ، އަޅުގަނޑުމެންގެ އެ ޕޫލު ނިމިގެންދާއިރުގައި ދެން ޖަލްސާއެއް އެ ތާގައި ބޭއްވިގެން ދެވިއްޖިއްޔާ އެއީ ލިބޭނެ ވަރަށް ބޮޑު ކުރިއެރުމެއް ކަމަށް އަޅުގަނޑު ހަމަ ދެކެން،" ސައްތާރު ވިދާޅުވި އެވެ.
"އަހަރެއްގެ ތެރޭގައި މި ބޭނުންވަނީ އެކަން (ޕޫލް) ނިންމާލަން. ނިމިގެންދާއިރު އަޅުގަނޑުމެންނަށް 50 މީޓަރުގެ ޕޫލަކާއި 25 މީޓަރުގެ ހަ ލޭނު ޕޫލެއް ވިތު ޑައިވިން ފެސިލިޓީސް އޮންނާނެ. އޭރަށް އަޅުގަނޑުމެން ޑައިވިން ވެސް އިންޓްރޮޑިއުސް ކުރާނަން،"
ސައްތާރު ވިދާޅުވީ، ޕޫލްގެ މަސައްކަތަށް ސްވިމިން އެސޯސިއޭޝަންގެ މެމްބަރުންގެ ހިޔާލާއި ލަފާ ހޯދަން ބޭނުންވާ ކަމަށާއި އެހެންކަމުން، އެ ތަނަށް ގޮސް، މަސައްކަތް ބަލާލަން ބޭނުންވާ މެމްބަރުންނަށް އެ ފުރުސަތު ވެސް އޮންނާނެ ކަމަށެވެ.
ސްވިމިންގެ ބައިނަލްއަގުވާމީ ޖަމިއްޔާގެ ނަން، އިންޓަނޭޝަނަލް އެކުއަޓިކްސް އަށް ބަދަލުކޮށްފައިވާއިރު، ސައްތާރު ވިދާޅުވީ، އެ ގޮތަށް ގިނަ ގައުމުތަކުން ވެސް އެކުއަޓިކްސް ހިމެނޭ ގޮތަށް ނަން ބަދަލުކުރަމުން އަންނަ ކަމަށެވެ. އަދި ބައިނަލްއަގުވާމީ ބައެއް ބައްދަލުވުންތަކަށްދާއިރު، ރާއްޖޭގެ ސްވިމިން އެސޯސިއޭޝަނަށް، މޯލްޑިވްސް އެކުއަޓިކްސްގެ ނަމުން ވެސް މުހާތަބު ކުރާކަން ސައްތާރު ފާހަގަކުރެއްވި އެވެ.
"އެހެންވީމަ އަޅުގަނޑުމެންގެ ވެސް ސްވިމިން އެސޯސިއޭޝަންގެ ނަން މެމްބަރުންގެ ލަފަޔާ އެކު ބަދަލުކުރަން އެބަޖެހޭ. ބަދަލާ އެކު ކިޔާނީ މޯލްޑިވްސް އެކުއަޓިކްސް. ބޭރުގައި ޖަލްސާތަކުގައި ވެސް ޖަހާފައި ހުންނަނީ މޯލްޑިވްސް އެކުއަޓިކްސް، އެއީ އެ ބަދަލު ގެންނަން ޖެހޭ ކަމަށް ބޭރުގެ ޖަމިއްޔާތަކަށް ވެސް ފެންނާތީ،" ސައްތާރު ވިދާޅުވި އެވެ.
މީގެ އިތުރުން، އިންޓަނޭޝަނަލް އެކުއަޓިކްސް އިން އެދޭ ބައެއް ކަހަލަ ބަދަލުތައް، ސްވިމިން އެސޯސިއޭޝަންގެ ގަވާއިދަށް ވެސް ގެންނަން ޖެހޭ ކަމަށާއި، އާ ހިންގާ ކޮމިޓީގެ ދައުރު ފެށުމާ އެކު، މެމްބަރުންނާ އެކު ދުރާލާ އެ މަސައްކަތް ވެސް ފެށިގެންދާނެ ކަމަށް ސައްތާރު ވިދާޅުވި އެވެ. އަދި މީގެ އެންމެ މުހިންމު ކަމަކީ، ވަގުތު އޮއްވައި، މި ކަންކަމުގެ މައުލޫމާތު ހުރިހާ މެމްބަރުންނަށް ފޯރުކޮށްދީގެން، މި މަސައްކަތް ފުރިހަމަ ކުރުން ކަމަށް ސައްތާރު ހާމަކުރެއްވި އެވެ.
