އިއްޔެ ބޭއްވި ލޯކަލް ކައުންސިލްގެ އިންތިހާބުގައި ދިވެހިރާއްޖޭގެ ފަސް ސިޓީގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީ (ޑަބްލިއުޑީސީ)ގެ ރައީސުުންގެ މަގާމަށް ވެސް އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ ކެންޑިޑޭޓުން ހޮވިއްޖެ އެވެ.
ވެރިކަން ހިންގާ މާލެ ސިޓީ އާއި އައްޑޫ ސިޓީ އާއި ކުޅުދުއްފުށި ސިޓީ އަދި ޑަބްލިއުޑީސީގެ ރައީސް މަގާމު ވެސް ލިބުނީ އެމްޑީޕީގެ ކެންޑިޑޭޓުންނަށް ކަން މިހާތަނަށް ގުނި ވޯޓުގެ ނަތީޖާއިން ދައްކަ އެވެ. މި ފަސް ސިޓީގެ މޭޔަރުންގެ ގޮނޑި ވެސް ނެގީ އެމްޑީޕީންނެވެ.
ވާދަވެރި ކެމްޕޭނަކަށް ފަހު ވެރިކަން ކުރާ ޕާޓީ، ޕީޕަލްސް ނެޝަނަލް ކޮންގްރެސް (ޕީއެންސީ) ގެ ކެންޑިޑޭޓު އައިޝަތު އަލައިކާ ބަލިކޮށް މާލެ ސިޓީގެ ޑަބްލިއުޑީސީގެ ރައީސްގެ މަގާމު ނެގީ އެމްޑީޕީންނެވެ. އެ ޕާޓީގެ ކެންޑިޑޭޓު އައިޝަތު ރީޝާއަށް 52 ޕަސެންޓު ވޯޓު ލިބުނެވެ.
ރާއްޖޭގެ އެންމެ އުތުރުން އޮންނަ ކުޅުދުއްފުށީގެ އަންހެނުންގެ ތަރައްގީއަށް މަސައްކަތް ކުރީ ކޮމިޓީގެ ރައީސްކަން އެމްޑީގެ ކެންޑިޑޭޓު އައިމިނަތު އިބްރާހިމް ކާމިޔާބުކުރީ 63 ޕަސެންޓު ވޯޓުންނެވެ.
ތިނަދޫ ސިޓީގެ ޑަބްލިއުޑީސީގެ ރައީސްގެ މަގާމު އެމްޑީޕީގެ ކެންޑިޑޭޓު 49 ޕަސެންޓު ވޯޓާއެކު ކާމިޔާބުކުރީ މަރިޔަމް ޝަރޫނާ އާދިލް އެވެ.
ފުވައްމުލަކު ޑަބްލިއުޑީސީގެ ރައީސްގެ މަގާމަށް ހޮވުނީ މަރިޔަމް ޝިއުނާ އެވެ. އޭނާ ހޮވުނީ 56 ޕަސެންޓު ވޯޓުންނެވެ.
އައްޑޫ ސިޓީގެ ޑަބްލިއުޑީސީގެ ރައީސްގެ މަގާމަށް ފާތިމަތު ހިޖުރާ ހޮނުވީ ބޮޑު ތަފަތަކުންނެވެ. އިލެކްޝަންސް ކޮމިޝަނުން ހާމަކޮށްފައިވާ ނަތީޖާއަށް ބަލާއިރު 76 ޕަސެންޓު ވޯޓު އޭނާ ކާމިޔާބުކުރި އެވެ.
ވަގުތީ ނަތީޖާތައް ދައްކާ ގޮތުގައި ކައުންސިލުގެ ރައީސުންގެ ގިނަ ގޮނޑިތައް ވެސް ނެގީ އެމްޑީޕީ އާއި އަމިއްލަ ގޮތުން ވާދަކުރި ކެންޑިޑޭޓުންނެވެ. އަދި ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލަން ފެނޭތޯ ބަލަން ނެގި ފެންނަ ނުފެންނަ ވޯޓުން ވެސް ސަރުކާރު ދަނީ ބަލިވަމުންނެވެ.
ސަރުކާރުން ބޭނުންވީ ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލާށެވެ. އިދިކޮޅު އެމްޑީޕީ އިން ވަކާލާތު ކުރީ ދެ އިންތިހާބު ވަކިވަކިން ބާއްވާށެވެ.
