ހުޅުމާލެ ދެވަނަ ފިޔަވަހީގައި ދިރިއުޅުމަށް ދޫކޮށްފައިވާ ވިނަރެސް ފްލެޓެއްގައި ލޯންޑްރީ ހިދުމަތްދޭ ބޮޑު ވިޔަފާރިއެއް ހިންގާ މައްސަލަ ފެންމަތިވުމާއެކު އެކަން ހުއްޓާލަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އިއްޔެ ނޯޓީސް ދީފި އެވެ.
އެޗްޑީސީގެ ތަރުޖަމާން މުހައްމަދު ސިރާޖު އަދަދު އަށް ވިދާޅުވީ ވިނަރެސް ފްލެޓެއްގައި ލޯންޑްރީގެ ހިދުމަތްދޭ ވިޔަފާރިއެއް ހިންގަމުންދާކަން ފާހަގަވުމުން ވެރިފަރާތަށް އެކަން ހުއްޓާލައި، ލޯންޑްރީ މެޝިންތައް ފްލެޓުން ނެގުމަށް ނޯޓިސް ދީފައިވާ ކަމަށެވެ.
މިގޮތުން ނޯޓިސް ދީފައިވާ މުއްދަތުގައި ފްލެޓް ވެރިފަރާތުން އެ ތަކެތި އެތަނުން ނުނަގައި ވިޔަފާރި ހިންގަމުންދާނަމަ އިތުރު ފިޔަވަޅުތައް އަޅާނެ ކަމަށް ސިރާޖު ވިދާޅުވި އެވެ.
ސޯޝަލް މީޑިއާގައި ދައުރުވާ ވީޑިއޯއިން ފެންނަ ގޮތުގައި ވިނަރެސް ފްލެޓުގައި ލޯންޑްރީ ވިޔަފާރީގައި ކުރަމުންދިޔައީ ގޭސްފުޅި ގުޅައިގެން ބޭނުންކުރާ ބޮޑެތި މެޝިންތަކެވެ. މިގޮތުން އެތަނުގައި އަލިފާނުގެ ހާދިސާއެއް ހިނގައިފިނަމަ، ޓަވަރުގައި ދިރިއުޅޭ މީހުންނަށް ވަރަށް ބޮޑު ނުރައްކަލެއް ކުރިމަތިވާނެ އެވެ.
ހުޅުމާލޭގައި ލޯންޑްރީގެ މިފަދަ ހިދުމަތްދޭ ވިޔަފާރިތައް ހިންގޭނީ އެޗްޑީސީގެ ހުއްދަ އޮވެގެންނެވެ. ނަމަވެސް މީހުން ދިރިއުޅޭ ތަންތަނުގަިއ މިފަދަ ބޮޑެތި ވިޔަފާރިތައް ހިންގުން މަނަލެވެ.
ޗައިނާ މެޝީނަރީ އިންޖިނިއަރިން ކޯޕަރޭޝަން (ސީއެމްއީސީ) އާ ހަވާލުކޮށްގެން ކުރިއަށް ގެންދިޔަ ވިނަރެސް މަޝްރޫއުގެ 10 ޓަވަރުގައި ތިން ކޮޓަރީގެ 1344 އެޕާޓްމަންޓް ހުރެ އެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި މަޝްރޫއުގެ މަސައްކަތް ފެށި ނަމަވެސް، އެ ވެރިކަން ބަދަލުވިއިރު، ގިނަ ޓަވަރުތަކުގެ ފައުންޑޭޝަން ވެސް ނާޅަ އެވެ. މަޝްރޫއުގެ ބޮޑުބައި ފަށައި، ނިންމާފައިވަނީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުންނެވެ.
