ސާފް 20 އަހަރުން ދަށުގެ ފުޓްބޯޅަ މުބާރާތުގައި ވާދަކުރާއިރު، ނޭޕާލުން މައިގަނޑު ގޮތެއްގައި ވިސްނައިގެން މަސައްކަތްކުރާނެ އެއް ކަމަކީ ކުރިން ހެދިފައި ހުރި ގޯސްތައް ރަނގަޅު ކުރުމަށް ކަމަށް ނޭޕާލްގެ 20 އަހަރުން ދަށުގެ ޓީމުގެ ކޯޗު، އުރްޖަން ޝްރެސްތާ ބުނެފި އެވެ.
ވިހި އަހަރުން ދަށުގެ ސާފް ޗެމްޕިއަންޝިޕް، މިއަދުން ފެށިގެން އަންނަ މަހުގެ ތިން ވަނަ ދުވަހުގެ ނިޔަލަށް ސާފްގެ ހަތް ގައުމުގެ މެދުގައި ގަލޮޅު ދަނޑުގައި ކުރިއަށްދާނެ އެވެ. މިއަދު ގްރޫޕް އޭގެ މެޗުތައް ކުޅޭއިރު، ހަވީރު އޮތީ ބޫޓާން އާއި ނޭޕާލް ބައްދަލުކުރާ މެެޗެވެ. އަދި، މިރޭ ރާއްޖޭން ސްރީ ލަންކާއާ ކުޅޭނެ އެވެ.
ނޭޕާލުން ވަނީ ސާފް އުމުރުފުރާ މުބާރާތްތައް 2015 ގައި ފެށިފަހުން ގިނަ ކާމިޔާބީތަކެއް ހޯދައިފަ އެވެ. އެކަމަކު، އެ ޓީމަށް ކާމިޔާބު ލިބެން ދިޔަ ފަހަރުތަކެއްގައި، ގެއްލިފައި ހުރި ބޮޑެތި ފުރުސަތުތައް ވެސް ގިނަ އެވެ. އެއީ، މި ފަހަރު އެ ޓީމުން ވަރަށް ވިސްނާނެ ކަމެކެވެ.
"ސާފްގެ އުމުރުފުރާ މުބާރާތްތަކުގައި ނޭޕާލްގެ ކާމިޔާބީތައް އެބައޮތް. ހަަމަ އެގޮތަށް ފައިނަލަށް ދިޔަ ގިނަ ފަހަރުތަކެއްގައި އެބަހުރި، ގްރޫޕް ސްޓޭޖުގައި މޮޅުވި ޓީމުތައް އަތުން ފައިނަލުގައި ބަލިވެފައި. އެހެންވީމަ، މި ކަންކަމަށް ބަލައިގެން ނޭޕާލުން ވިސްނުންތެރިކަމާ އެކު ކުރިން ހެދިފައި ހުރި ގޯސްތައް ރަނގަޅުުކުރަން މަސައްކަތް ކުރާނެ،" އިއްޔެ ބޭއްވި ނޫސްވެރިންގެ ބައްދަލުވުމުގައި، ނޭޕާލްގެ ކޯޗު، އުރްޖަން ބުންޏެވެ.
ސާފްގެ ފުޓްބޯޅަ ޑިވެލޮޕްވަމުން އަންނައިރު، ހުރިހާ ޓީމަކުން ވެސް ޔޫތު ފުޓްބޯޅަ ރަނގަޅު ކުރަން ކުރާ މަސައްކަތުގެ ސަބަބުން ހުރިހާ ޓީމެއް ވެސް ފެންނަނީ ވަރަށް ވަރުގަދަވަމުން އަންނަ ގޮތަށް ކަމަށް އުރްޖަން ވަނީ ބުނެފަ އެވެ.
"އެއް ޓީމު ވަރަށް މޮޅޭ، ނޫނީ އަނެއް ޓީމު ދަށެކޭ ބުނެވޭކަށެއް ނެތް. ކޯޗު ދޭ އިރުޝާދާ އެއްގޮތަށް ވިސްނުންތެރިކަމާ އެކު ކުޅޭ ޓީމެއް ކާމިޔާބުވާނެ،" އުރަޖަން ބުންޏެވެ.
އޭނާ ބުނީ، ސާފް 20 އަހަރުން ދަށުގެ މުބާރާތަށް ނޭޕާލް ޓީމުގެ ތައްޔާރީތައް ދިޔައީ ވަރަށް ރަނގަޅަށް ކަމަށެެވެ. ސަަބަބަކީ، ނޭޕާލްގެ ފުޓްބޯޅައިގެ ނޭޝަނަލް ލީގު މިހާރު ކުރިއަށްދާތީވެ، މި މުބާރާތަށް (ސާފް 20 އަހަރުން ދަޑުގެ މުބާރާތަށް) ކުުޅުންތެރިން ނަގަައި ޓީމު އެކުލަވާލަން ފަސޭހަވެގެން ދިޔަ ކަމަށެެވެ.
"ފިޓްނަސް ވެސް ވަރަށް ރަނގަޅަށް ހުރީ، އެހެންވީމަ ތައްޔާރީތައް ވަރަށް ރަނގަޅު،" އުރްޖަން ބުންޏެވެ.
ސްކޮޑު އެކުލަވާލުމުގެ މަސައްކަތުގައި، ނެޝަަަނަލް ލީގުން ވަރަށް ރަނގަޅަށް ސްކައުޓްކޮށްގެން، ކުޅުންތެރިންތައް ކުޅެނީ ކޮން މަގާމުތަކަކަށްތޯ ބަލައިގެން ކޮބައިތޯ ކުޅުންތެރިންގެ ސްޓްރަންތަކީ ވެސް ދެނެގެނަވުނުކަން އުރްޖަން ފާހަގަކުރި އެވެ.
"ކުޅުންތެރިން ކައިރިން އަހަރެމެން ބޭނުންވާ ކަންކަން ވެސް ދެނެގަނެގެން ޓީމު އެކުލަވާލަން ފަސޭހަވި، ދެން، ނޭޕާލް (ސީނިއާ) ގައުމީ ޓީމާ އެކުގައި ވެސް މެޗުތަކެއް ކުޅެން ލިބުނު، އެއީ، ނެޝަނަލް ޓީމު ވެސް ތައްޔާރުވަނީ ހޮންގް ކޮންގާ އެކު މެޗެއް ކުޅެން، މިއީ ވެސް އެޑްވާންޓޭޖެއް ގޮތުގައި ދެކެނީ،" އުރްޖަން ބުންޏެވެ.
ރާއްޖޭގައި ދިރިއުޅެމުން އަންނަ ނޭޕާލް މީހުންގެ ފަރާތުން ސާފް 20 އަހަރުން ދަށުގެ މުބާރާތާ ގުޅޭ މައުލޫމާތު ހޯދަން ގިނަ މެސެޖުތަކެއް ލިބެމުން އަންނަ ކަމަށާއި އުންމީދަކީ ގިނަ އަދަދެއްގެ ސަޕޯޓަރުން އައިސް ޓީމަށް ސަޕޯޓް ދޭނެ ކަމަށް ކަމުގައި ޓީމުން ވަނީ ބުނެފަ އެވެ.
ބޫޓާނާއި ނޭޕާލް ކުޅޭ މެޗު ފަށާނީ މިއަދު 15:45 ގަ އެވެ.
