މި މަހުގެ 23 އިން އޭޕްރީލް 3 އަށް މާލޭގައި ކުރިއަށްދާ ސާފް 20 އަހަރުން ދަށުގެ މުބާރާތަށް ބަންގްލަދޭޝް އިން އިނގިރޭސި ކޯޗެއް ކަމަށްވާ މާކް ކޮކްސް ހަމަޖައްސައިފި އެވެ.
ސާފްގެ އުމުރުފުރާ މުބާރާތުގައި ބަންގްލަދޭޝްގެ ހެޑް ކޯޗެއްގެ ގޮތުގައި ފެނިގެންދާނެ ފަރާތެއް ކަނޑައެޅުމުގައި ގިނަ ހިޔާލުތަފާތުވުންތަކެއް އުފެދިފައިވަނިކޮށް ބަންގްލަދޭޝް ފުޓްބޯޅަ ފެޑެރޭޝަން (ބީއެފްއެފް) އިން މިރޭ އިއުލާނުކުރީ ކޮކްސް އަކީ އެ ޓީމުގެ ހެޑް ކޯޗު ކަމަށެވެ. އަދި، ވަރަށް އަވަހަށް ޓީމުގެ ފަރިތަަކުރުންތަކުގައި މަސައްކަތް ފަށާނެ ކަމަށެވެ.
މީގެ ކުރިން، ބަންގްލަދޭޝް ފުޓްބޯޅަ ފެޑެރޭޝަންގެ ނައިބު ރައީސް، ފަހަދު ކަރީމް ވަނީ، ކޮކްސް އަށް އެއް މަސް ދުވަހުގެ ކޮންޓްރެކްޓެއްގައި ގެންނަން ނިންމާފައިވާ ކަމަށް އިއުލާނުކޮށްފަ އެވެ. އޭގެ ފަހުން، ބަންގްލަދޭޝް ފުޓްބޯޅަ ފެޑެރޭޝަނުގެ އަނެއް ނައިބު ރައީސް އަދި ޑިވެލޮޕްމަންޓް ކޮމިޓީ ޗެއާމަން، ނާސިރު ޝަހުރިއާރު އަލް ޒަހޭދީ ވިދާާޅުވީ، ކޮކްސް ގެންނަނީ ކޮންސަލްޓަންޓެއްގެ ގޮތުގައި ކަމަށާއި ބެންޗުން ޓީމަށް އިރުޝާދުދޭނީ ބަންގްލަދޭޝްގެ ކޯޗު، ގޮލަމް ރައްބާނީ ޗޮޓޯން ކަމަށެވެ.
އެހެން ނަމަވެސް، ބަންގްލަދޭޝް ފުޓްބޯޅަ ފެޑެރޭޝަނުން މިހާރު ނިންމާފައި އޮތީ، ޓީމުގެ ހެޑް ކޯޗުގެ ހުރިހާ ޒިންމާއެއް ކޮކްސްގެ އަތްމައްޗަށް ދިނުމަށެވެ.
ސާފްގެ އުމުރުފުރާ މުބާރާތެއް ފުރަތަމަ ފަހަރަށް ރާއްޖޭގައި ހޯސްޓްކުރާއިރު، ރާއްޖެ ހިމެނޭ ގްރޫޕްގައި ދެން އޮތީ ނޭޕާލް، ބޫޓާން އަދި ސްރީ ލަންކާ އެވެ. އަދި، ގްރޫޕް ބީގައި ހިމެނެނީ، ބަންގްލަދޭޝް އާއި އިންޑިއާ އަދި ޕާކިސްތާން އެވެ.
ސާފް 20 އަހަރުން ދަށުގެ މުބާރާތުގައި، ލަންކާ އަށް ވެސް އިރުޝާދުދޭން ހަމަޖައްސާފައިވަނީ ބިދޭސީ ކޯޗެކެވެ. އެ ގޮތުން، ލަންކާ ޓީމާ ހަވާލުވާނީ، ގަތަރުގެ ކޯޗު އަހުމަދު އަލް-މައްނާއީ އެވެ. އަލް-މައްނާއި ވަނީ މީގެ ކުރިން ސްރީ ލަންކާގެ 23 އަަހަރުން ދަށުގެ ފުޓްބޯޅަ ޓީމާއި ސާފް ފުޓްސަލް ޗެމްޕިއަންޝިޕްގައި ލަންކާ ޓިމުތަކަށް ކޯޗުކޮށްދީފަ އެވެ.
ރާއްޖޭން ސާފް 20 އަހަރުން ދަށުގެ މުބާރާތަށް ނުކުންނާނީ، ސީނިއާ ގައުމީ ޓީމުގެ ހެޑް ކޯޗު އަދި އެފްއޭއެމް ޓެކްނިކަލް ޑިރެކްޓަރު، ހަންގޭރީގެ އިސްޓަވާން އުރްބާނީގެ އިރުޝާދުގެ ދަށުންނެވެ. އެ ގޮތުން، މިހާރު ރާއްޖޭގެ ޓީމު ތިބީ އެކުވެރިކަމުގެ ދެ މެޗު ކުޅޭ ގޮތަށް ސިންގަޕޫރުގެ ޓްރެއިނިން ކޭމްޕެއްގަ އެވެ.
