ރަބަތު، މޮރޮކޯ (ޖެނުއަރީ 29) - މި މަހު ނިމިގެންދިޔަ އެފްރިކަން ކަޕްގެ ފައިނަލްގައި ހިނގައިދިޔަ ކަންތައްތަކާ ގުޅިގެން، އެފްރިކާގެ މައި ފުޓްބޯޅަ އިދާރާ، ކާފްގެ ޑިސިޕްލިނަރީ ކޮމިޓީން މައްސަލަ ބަލައި، ކުޅުންތެރިންނާއި ކޯޗުން ސަސްޕެންޑްކުރުމުގެ އިތުރުން ފެޑެރޭޝަން ވެސް ޖޫރިމަނާކޮށްފި އެވެ.
މި މަހު 18 ވަނަ ދުވަހު ކުޅުނު ފައިނަލުގައި، މޮރޮކޯ އަށް 50 އަހަރު ތެރޭ ފުރަތަމަ ތަށި ހޯދަން ރަނުގެ ފުރުސަތެއް ލިބުނެވެ. އިތުރު ވަގުތުގެ ތެރޭގައި މޮރޮކޯ އަށް ލިބުނު ޕެނަލްޓީއެއް ޖަހަން 24 ވަރަކަށް މިނިޓް މަޑުކުރަން ޖެހުނެވެ. އެއީ، ސެނެގާލް ސަޕޯޓަރުންގެ ހަމަނުޖެހުންތަކާ ހެދި އާއި ދަނޑުގެ ސެކިއުރިޓީ ހާލަތު ކޮންޓްރޯލްގެ ދަށަށް ގެނައުމުގެ އިތުރުން، ހިތްހަމަނުޖެހިގެން ދަނޑުން ފޭބި ސެނެގާލްގެ ކުޅުންތެރިންނާއި ކޯޗު މަލިކް ތިއޯ އަލުން މެޗު ކުޅެން އެއްބަސްވުމަށް ނެގި ވަގުތެވެ.
ހާލަތު ހަމަޖައްސައި، މެޗުފެ ފުރިހަަމަ ވަގުތުގައި ކުޅެން ލިބުނު އެންމެ ފަހު ބޯޅައިގައި މޮރޮކޯގެ ބްރަހިމް ޑިއާޒް ޖެހި ޕެނަންކާ ޕެނަލްޓީ ދިޔައީ، ސެނެގާލް ކީޕަރު އެޑޮއާޑް މެންޑީ އަތަށެވެ. މި ފަހަރުގެ އެފްރިކަން ކަޕްގެ އެންމެ ގިނަ ގޯލު (5 ލަނޑު) ޖެހި ބްރަހިމް އަށް އެންމެ މުހިންމު ފުރުސަތުގެ ބޭނުން ނުހިފުނެވެ. އަދި، އިތުރު ވަގުތުގެ ފުރަތަމަ ހާފުގައި ޕާޕޭ ގޭއި ޖެހި ގޯލުން ފަސް އަހަރު ތެރޭ ދެ ވަނަ ފަހަރަށް ސެނެގާލަށް އެފްރިކާގެ ޗެމްޕިއަންކަން ލިބުނީ އެވެ.
އެކަމަކު، ސެނެގާލުން ޗެމްޕިއަންކަން ހޯދިއިރު، އެ މެޗުގައި ކަންތައްތައް ދިޔަ ގޮތުގެ މައްސަލަ ބަލަން ކާފް އިން ނިންމީ އެވެ. އަދި، އެންމެ ފުރަތަަމަ ކަމެއްގެ ގޮތުން، ސެނެގާލްގެ ކޯޗު ތިއޯ ސަސްޕެންޑް ކުރަން ވަނީ ނިންމައިފަ އެވެ.
މައްސަލަ ބަލައި ނިންމިއިރު، ތިއޯ ވަނީ ފަސް މެޗަށް ސަސްޕެންޑްކޮށްފަ އެވެ. އަދި، ތިއޯ އަށް ވަނީ 100،000 ޑޮލަރުގެ ޖޫރިމަނާއެއް ދައްކަން ޖެހިފަ އެވެ. ސެނެގާލްގެ ފޯވާޑް، އިލިމަން އެންޑިއާއޭ އަށް ވަނީ ދެ މެޗުގެ ސަސްޕެންޝަނެއް އަތުވެފަ އެވެ. އެއީ، ރެފްރީއާ ދިމާކުރުމުގެ ގޮތުން، ބޭއަދަބީގެ މުއާމަލާތު ކޮށްފައިވާތީ އެވެ. މީގެ އިތުރުން، ކުޅުންތެރިން ދަނޑުން ފޭބި މައްސަލައިގައި ސެނެގާލް ފުޓްބޯޅަ ފެޑެރޭޝަން، 615،000 ޑޮލަރުން ވަނީ ޖޫރިމަނާކޮށްފަ އެވެ.
މޮރޮކޯ ޓީމުގެ އިސްމާއިލް ސައިބާރީ އަށް ތިން މެޗުގެ ސަސްޕެންޝަނަކާއި 100،000 ޑޮލަރުގެ ޖޫރިމަނާއެއް ދައްކަން ޖެހުނުއިރު، އެ ޓީމުގެ ތަރި، އަޝްރަފް ހަކީމީ ވަނީ ދެ މެޗަށް ސަސްޕެންޑްކޮށްފަ އެވެ. މީގެ ތެރެއިން އެއް މެޗުގެ ސަސްޕެންޝަނަށް އަމަލުކުރަން ޖެހޭނީ 12 މަސް ދުވަސް ފަހުންނެވެ.
މެޗު ފުރިހަމަ ނުކޮށް ސެނެގާލް ކުޅުންތެރިން ދަނޑުން ފޭބުމުން، މެޗު އަލުން ކުޅެން އެޕީލްކޮށް، މޮރޮކޯ އިން ލީ ޕްރޮޕޯސަލް ވަނީ އަނބުރާ ފޮނުވާލައިފަ އެވެ. ކާފްގެ ޑިސިޕްލިނަރީ ކޮމީޓީން ބުނީ އަޅާފައިވާ ފިޔަވަޅުތަކަކީ، އެ ބައްރުގެ މެޗުތަކުގައި ތަންފީޒުކުރާނެ ކަންކަން ކަމަށާއި އެހެންކަމުން އޭގެ ސަބަބުން، މި އަހަރު އޮތް ފީފާ ވޯލްޑް ކަޕްގައި މީގެއިން އެއްވެސް ފަރާތަކަށް އަސަރެއް ނުކުރާނެ ކަމަށެވެ.
