ޓޫރިޒަމް ދާއިރާގެ ވަޒީފާ ދޭ ފަރާތްތަކާއި ވަޒީފާ ހޯދާ ފަރާތްތައް ގުޅުވާލަދިނުމަށް އެއް ފުރާޅެއްގެ ދަށުން ގިނަ ހިދުމަތްތަކެއް ދޭ ޑިޖިޓަލް ޕްލެޓްފޯމެއް ކަމަށްވާ "ރުކުރި" މިއަދު ލޯންޗުކޮށްފި އެވެ.
އައިލެންޑް ރެކްރޫޓްސްގެ ފަރާތުން ރުކުރި ލޯންޗުކުރީ ފަތުރުވެރިކަމުގެ ދާއިރާ އިތުރަށް ފުޅާވެ، ހަރުދަނާވަމުންދާ ވަރަކަށް، ހުރިހާ ކަމެއް އެއް ފުރާޅެއްގެ ދަށުން ފެންނަން އޮންނަ، ދެފުށް ފެންނަ، އަދި އަވަސް ނިޒާމެއް ބޭނުންވެފައިވާތީ ކަމަށް އެ ކުންފުނިން ބުންޏެވެ.
"2023 ވަނަ އަހަރު އުފެއްދި ރުކުރި އަކީ ހާއްސަކޮށް ފަތުރުވެރިކަމުގެ ދާއިރާއަށް އައިލެންޑް ރެކްރޫޓްސް އިން އަމާޒުކޮށްގެން ފަރުމާކޮށްފައިވާ ޕްލެޓްފޯމެއް. މިއީ ވަޒީފާ ދޭ ފަރާތްތަކަށާއި ވަޒީފާ ހޯދާ ފަރާތްތަކަށް ކަންކަން ސާފުކޮށް، އަވަސްކަމާއެކު ކުރިއަށްގެންދެވޭނެ ޒަމާނީ ނިޒާމެއް،" ރުކުރިން ބުންޏެވެ.
އައިލެންޑް ރެކްރޫޓްސްގެ ކޯ-ފައުންޑާ އަލީ ފާއިޒް ވިދާޅުވީ އެއް ފުރާޅެއްގެ ދަށުން މި ފުރުސަތުތައް ފަހިކޮށްދިނުމުން، ދިވެހި މަސައްކަތްތެރިން ބާރުވެރިކުރުވައި، ވަޒީފާ ދޭ ފަރާތްތަކަށް އެންމެ އެކަށީގެންވާ މީހާ ހޯދުމަށް މަގުފަހިވެގެންދާނެ ކަމަށެވެ.
ރުކުރި މެދުވެރިކޮށް ލަގްޒަރީ ރިސޯޓުތަކުގެ އިސް މަގާމުތަކުން ފެށިގެން، ގެސްޓްހައުސް، ރެސްޓޯރަންޓް އަދި ފަތުރުވެރިކަމުގެ އެކި ހިދުމަތްތަކުގެ ވަޒީފާތައް ފެނެ އެވެ.
ރުކުރި ޑިޖިޓަލް ޕްލެޓްފޯމް ލޯންޗުކުރުމުގެ ތެރެއިން
ވަޒީފާ ހޯދާ މީހާއަށް ރުކުރި މެދުވެރިކޮށް އެއް ތަނަކުން ހުރިހާ އެޕްލިކޭޝަނެއް ބެލެހެއްޓި، ވަޒީފާ ދޭ ފަރާތްތަކަށް ވެސް އުނދަގުލެއް ނެތި ކެންޑިޑޭޓުންގެ މައުލޫމާތު ބެލެ އެވެ.
"ވަޒީފާ ހޯދާ ފަރާތްތަކަށް ރުކުރިއަކީ އެމީހުންގެ މުޅި ކެރިއަރު އެއްތަނަކުން މެނޭޖްކުރެވޭ ޕްލެޓްފޯމެއް. ތަފާތު އެކި ޕްލެޓްފޯމްތަކުގައި ވަގުތު ހޭދަކުރުމުގެ ބަދަލުގައި، އެއް ތަނަކުން ވަޒީފާ ހޯދައި، ކުރިމަތިލައި، އަދި އެޕްލިކޭޝަނަށް ވާނުވާ ބަލައިލެވޭނެ،" އެ ކުންފުނިން ބުންޏެވެ.
މީގެއިތުރުން ރިސޯޓްތަކަށް ބޭނުންވާ ފްރީލާންސް ނުވަތަ ކުރު މުއްދަތުގެ މަސައްކަތްތަކަށް މީހުން ހޯދުމަށް ވެސް ރުކުރީގައި ވަކި ހާއްސަ ބައެއް ވަނީ ހިމަނާފަ އެވެ.
އިތުބާރު ހިފޭ ވަޒީފާގެ މާހައުލެއް ބިނާކުރުމަށްޓަކައި، ރުކުރި މެދުވެރިކޮށް ވަޒީފާ ހޯދާ ފަރާތްތަކުގެ މަސައްކަތުގެ ތަޖުރިބާ ޔަގީން ކުރެވޭ ގޮތް ހަދާފައިވާއިރު، ރެފަރެންސް ޗެކްކުރުމާއި ޕްރޮފައިލް ވެރިފައި ކުރެވޭ ނިޒާމުވެސް ވަނީ ހަމަޖައްސާފަ އެވެ.
އައިލެންޑް ރެކްރޫޓްސްގެ މި މަސައްކަތަކީ ރާއްޖޭގެ ޓޫރިޒަމް ދާއިރާ އިތުރަށް ހަރުދަނާކޮށް، ވަޒީފާގެ ބާޒާރު ޒަމާނީ ފެންވަރަކަށް ބަދަލު ކުރުން ކަމަށް އެ ކުންފުނިން ބުންޏެވެ.
