ކުރިއަށް އޮތް ލޯކަލް ކައުންސިލް އިންތިހުބުގައި އަމިއްލަ ގޮތުން ވާދަކުރާ ކެންޑިޑޭޓުން ހޯދަންޖެހޭ ތާއިދު ސޮއި، "އީ-ފާސް" މެދުވެރިކޮށް ކަށަވަރު ކުރަންޖެހޭ ގޮތަށް އޮތުމަކީ ކެންޑިޑޭޓުންގެ އިންތިހާބީ ހައްގަށް އުނިކަން އަންނަ ކަމެއް ކަމަށް ބުނެ ކުރީގެ ރައީސް އަބްދުﷲ ޔާމީންގެ ވެރިކަމުގައި ހޯމް މިނިސްޓަރަކަށް ހުންނެވި، އަދި 2023 ގެ ރިޔާސީ އިންތިހާބުގައި އަމިއްލަ ގޮތުން ވާދަ ކުރެއްވި އުމަރު ނަސީރު ކަންބޮޑުވުން ފާޅުކުރައްވައިފިއެވެ.
އިލެކްޝަންސް ކޮމިޝަން (އީސީ) ގެ ރައީސް މުޙައްމަދު ޒާހިދަށް މިއަދު ފޮނުއްވި ސިޓީއެއްގައި އުމަރު ވިދާޅުވީ، އަމިއްލަ ގޮތުން ވާދަކުރާ ކެންޑިޑޭޓުން ހޯދަންޖެހޭ 50 ސޮއި، އެ ސޮއި ދޭ ފަރާތުން އަމިއްލައަށް އީ-ފާސް މެދުވެރިކޮށް ލޮގިންވެ "ވެރިފައި" ކުރަންޖެހޭ ގޮތަށް ހަމަޖެއްސުމަކީ ބަލައިގަނެވޭނެ ކަމެއް ނޫން ކަމަށެވެ.
އުމަރު ފާހަގަކުރެއްވި ގޮތުގައި ރާއްޖޭގެ އާބާދީގެ ތެރެއިން އީ-ފާސް މެދުވެރިކޮށް ހިދުމަތް ހޯދަން ދަންނަނީ އެންމެ 10 ޕަސެންޓު މީހުންނެވެ. އަދި ބާކީ 90 ޕަސެންޓު މީހުންނަކީ އެފަދަ ޓެކްނޮލޮޖީއަށް އަހުލުވެރި ބައެއް ނޫން ކަމަށާއި، މި ނިޒާމުގެ ސަބަބުން އާންމުންގެ އެހީތެރިކަން ހޯދުމުގައި އަމިއްލަ ކެންޑިޑޭޓުންނަށް ބޮޑެތި ގޮންޖެހުންތަކާ ކުރިމަތިވެ އިންތިޚާބީ ހައްގަށް ހުރަސް އެޅޭ ކަމަށް އޭނާ ވިދާޅުވިއެވެ.
މީގެ އިތުރުން، އިންތިހާބަށް ބޭނުންވާ އޮފިޝަލުން ހޯދުމުގައިވެސް އީ-ފާސް މެދުވެރިކޮށް ނަން ހުށަހަޅަންޖެހޭތީ، އިލެކްޝަންސް ކޮމިޝަނަށްވެސް އޮފިޝަލުން ހޯދުމުގައި ދަތިތަކާ ކުރިމަތިވެފައިވާ ކަމަށް އުމަރު ވިދާޅުވިއެވެ.
އަންނަ ރިޔާސީ އިންތިހާބުގައިވެސް ވާދަކުރައްވާނެކަން އިއުލާނު ކުރައްވާފައިވާ އުމަރު ނަސީރު ވަނީ، މިހާރު ކަނޑައަޅާފައިވާ އުސޫލު ބާތިލްކޮށްދިނުމަށް އީސީގެ ރައީސްގެ ކިބައިން އެދިވަޑައިގެންފައެވެ.
ތާއިދު ފޯމު ފުރަން އީފާސް ބޭނުންކުރަން ޖެހޭތީ ޔާމީން ވެސް ވަނީ ކަންބޮޑުވުން ފާޅުކުރައްވައިފަ އެވެ.
