ރަނގަޅު ވަސީލަތްތަކެއް ގާއިމްކޮށްގެން މަސައްކަތްތަކެއް ދެމެހެއްޓެނިވި ގޮތެއްގައި ކުރެވިއްޖަނަމަ، މިި ސަރަހައްދުގައި ރާއްޖެ އަކި ފުޓްސަލްގެ އެންމެ ގަދަ އެއް ބާރަށް ހެދޭނެ ކަމަށް ގައުމީ ފުޓްސަލް ޓީމުގެ ތަރި، އިޝާން އިބްރާހިމް (ސައްޓު) ބުނެފި އެވެ.
ދެކުނު އޭޝިއާގެ ގައުމުތަކަށް ބާއްވާ ފުރަތަމަ ފުޓްސަލް މުބާރާތް މިއަދު ނިމިގެންދާއިރު، ރާއްޖޭން އެންމެ ފަހު މެޗުގައި، ސްރީ ލަންކާއާ ދެކޮޅަށް ނުކުންނާނެ އެވެ. އެ މެޗާ ހަމައަށް ދިއުމުގެ ކުރިން ވެސް ރާއްޖޭގެ ގައުމީ ފިރިހެން ފުޓްސަލް ޓީމުން ވަނީ މުބާރާތުގެ ޗެމްޕިއަންކަން ޔަގީންކޮށްފަ އެވެ. ފުރަތަަމަ ފަސް މެޗުން ރާއްޖޭން ވަނީ އިދިކޮޅަށް ނުކުތް ކޮންމެ ޓީމެއް ބަލިކޮށްފަ އެވެ. އެ ގޮތުން، އެންމެ ފަހު މެޗުގައި ވަނީ ބޫޓާން އަތުން ފަހަތުން އަރައި، 3-1 އިން މޮޅުވެފަ އެވެ.
ސާފްގެ ފުރަތަމަ ފުޓްސަލް ތަށި ރާއްޖެ އަށް ހޯދައިދޭން އެހީތެރިވުމަށް ފަހު، "އަދަދު ސްޕޯޓްސް" އަށް ދިން އިންޓަވިއުއެއްގައި ސައްޓު ބުނީ، މި ކާމިޔާބީއާ އެކު، ރާއްޖޭގެ ފުޓްސަލްގެ ދެން އޮތް ޖީލުން ކުރިއަށް ދިއުމަށް ވަރަށް ބޮޑު އުންމީދުތަކެއް ކުރާނެ ކަމަށެެވެ.
އަސްލު ފުޓްސަލް އިން ސާފްގެ ފުރަތަމަ ތަށި ވީމަ ވަރަށް ބައިވަރު ކުދިން، މިހާރު ވެސް ރާއްޖޭގައި ބައިވަރު ކުދިން އުޅޭ ފުޓްސަލް ކުޅޭ. އެ ހުރިހާ ކުދިންނަށް އިންސްޕިރޭޝަނަކަށް ވާނެ ކަމަށް އަޅުގަނޑު ގަބޫލުކުރަން،" އޭޝިއަން ކަޕް ކޮލިފައިންގައި ވެސް ގައުމީ ފުޓްސަލް ޓީމަށް ގިނަ މެޗުތަކެއް ކުޅެދީފައިވާ ސައްޓު ބުންޏެވެ.
"ދެން، އޭގެ އިތުރުން، އަޅުގަނޑުމެންގެ މީގެ ތެރޭގައި އިންވޯލްވާ ހުރިހާ ޕާޓީސްތަކެއް ވެގެން، އަސްލު މީތި ކުރިއަރުވަން މަސައްކަތް ކުރަންވީ، އެންމެ ފުރަތަމަ ކަމަކަށް އަޅުގަނޑުމެން ބޭނުންވޭ މި ކަހަލަ ޕިޗެއް. ފެސިލިޓީސްތައް އަސްލު ގާއިމްކޮށްގެން، އަޅުގަނޑުމެން ކުރިއަށްއޮތްތާގައި، އިމްޕްރޫވްކުރަން ފަށައިފިއްޔާ، މިއަށް ވުރެން ދިވެހި ޓީމު، މި ސަރަހައްދުގައި އެންމެ ގަދަ، އެއް ބާރަށް ވެގެންދާނެ ފުޓްސަލްގައި،" .
ރާއްޖޭން މި ފަހަރުގެ ސާފް ފުޓްސަލް ޗެމްޕިއަންޝިޕްގައި، ކުުޅުނު ފުރަތަމަ ތިން މެޗުން ވެސް މޮޅުވީ ފަރަގު ބޮޑުކޮށެެވެ. އެ ގޮތުން، ފުރަތަމަ މެޗުގައި ޕާކިސްތާން އަތުން 7-1 އިން މޮޅުވިއިރު، ދެ ވަނަ މެޗުގައި ބަންގްލަދޭޝް އަތުން 6-1 އިން މޮޅުވި އެވެ. އަދި، ތިން ވަނަ މެޗުގައި، 5-0 އިން އިންޑިއާ ބަލިކޮށް، ވާދަކުރާ ހުރިހާ ޓީމަކަށް ބޮޑު މެސެޖެއް ދިނެވެ.
ރާއްޖޭން އެންމެ ފަހުން ކުޅުނު ދެ މެޗުގައި، ނޭޕާލާއި ބޫޓާނުން ޑިފެންސިވްކޮށް ކުޅެން ނުކުމެ، ރާއްޖެ އަށް އުނދަގޫތަކެއް ކުރިމަތިކުރި ނަމަވެސް އެ ދެ މެޗުން ވެސް ރާއްޖޭން ކުރިހޯދި އެވެ. ނޭޕާލް އަތުން 2-1 އިން އަދި، ބޫޓާންގެ މައްޗަށް 3-1 އިންނެވެ.
ސައްޓު ބުނީ، މިއީ އެންމެ ފުރަތަމަ ދުވަހުން ފެށިގެން، ކޯޗުންނާއި ކުޅުންތެރިން އެކުވެ ކުރި މަސައްކަތުގެ ނަތީޖާ ކަމަށެވެ.
"ހާއްސަކޮށް ހަމަ އަޅުގަނޑު ފާހަގަކުރަން، އެފްއޭއެމް އިން ފެށިގެން ވަކިވަކި ޕްލޭޔަރުންނާ ހަމައަށް. ޗައިނާ ކޭމްޕްގައި އަޅުގަނޑުމެންނާއި ބައިވެރިވި، މީގެ ތެރޭގައި ނެތް ތިން ކުޅުންތެރިންގެ ނަން ވެސް އަޅުގަނޑު މި ވަގުތު ފާހަގަކުރަން ބޭނުން، ޝަންޓޭ، ވައްޖޭ، ޕަފް، މި ހުރި ހުރިހާ ކުޅުންތެރިންގެ މަސައްކަތް މިއީ، އެ މީހުން އަނބިދަރިންނާއި ކުދިންނާއި ހުރިހާ އެންމެން ދޫކޮށްލައިފައި، ދެ މަސް ދުވަހު މުޅި އެއްކޮށް ދެ މަސް ދުވަހު، އެއްކޮށް ކުރި މަސައްކަތުން ދެން ހަމަ ކާމިޔާބުވީ،" ސައްޓު ބުންޏެވެ.
ގައުމީ ފުޓްސަލް ޓީމުން ޑިސެމްބަރު މަހު އެއް ވަނަ ދުވަހު ޕްރެކްޓިސް ފަށައި، ދެ ދުވަހެއް ފަހުން، ގައުމީ ކޯޗު، އުޒްބެކިސްތާންގެ ފާރޫކް ޒަކީރޯވްއާ އެކު ޓްރެއިނިންތައް ކުރިއަށްގެންދަން ފެށި އެވެ. އަދި، މާލޭގައި ޕްރެކްޓިސްތައް މަހެއްހާ ދުވަހު ކުރިއަށްގެންދިއުމަށް ފަހު، މުބާރާތަށް ތައިލެންޑަށް އައުމުގެ ކުރިން، ޗައިނާގެ ރަނގަޅު ޓްރެއިނިން ފެސިލިޓީއެއްގައި 10 ދުވަހުގެ ކޭމްޕެއް ޖެހި އެވެ. އަދި، ޗައިނާ ގައުމީ ޓީމާ ދެކޮޅަށް ތިން މެޗެއް ކުޅުނެވެ.
ގިނަ ކުުޅުންތެރިންތަކެކޭ އެއްގޮތަށް ސައްޓު ވެސް ވަނީ ޗައިނާ ކޭމްޕްގެ މުހިންމުކަމާ ބެހޭގޮތުން ވާހަކަ ދައްކައިފަ އެވެ.
"ފާހަގަކުރަން އަޅުގަނޑުމެންނަށް މި ލިބުނު ޗައިނާ ކޭމްޕްގެ ސަބަބުން އަޅުގަނޑުމެންގެ ގޭމަށް ވަރަށް އިމްޕްރޫވްމަންޓެއް އައި، ކޭމްޕް ތެރޭގައި، މި ގޭމް ސެޓު ކުރިއިރު، އަޅުގަނޑުމެން ކުޅެން ބޭނުންވާ އެއްޗާއި ސެޓްޕީސްތަކާ ކޯޗު ޕްލޭންކުރި ހުރިހާ އެއްޗެއް މުބާރާތްތެރޭގައި އެ ފެނިގެންދިޔައީ، އަޅުގަނޑުމެން ގިނަ ގޯލުތަކުން ވެސް ސެޓްޕީސްތަކުން ވެސް އައި. އެއީ، އަސްލު މީގެ ނަތީޖާ އަކީ،" ސައްޓު ބުންޏެވެ.
ރާއްޖޭން ސާފް ފުޓްސަލް ޗެމްޕިއަންޝިޕްގައި ކުޅޭ ފަހު މެޗުގައި މިއަދު ލަންކާއާ ދެކޮޅަށް ނުކުންނާނީ ރާއްޖެ ގަޑިން 12 ޖަހާއިރު އެވެ.
