ބަންގުލަދޭޝްގެ ކުރީގެ ބޮޑުވަޒީރު ޝައިޚް ހަސީނާ، އަވަށްޓެރި އިންޑިއާގައި ހުންނަވައިގެން އާންމުންނާ މުހާތަބުކޮށް ވާހަކަދެއްކެވުމުގެ ފުރުސަތު ދިނުމުން، ބަންގުލަދޭޝްގެ ފޮރިން މިނިސްޓްރީން އެކަމާ ކަންބޮޑުވުން ފާޅުކޮށްފި އެވެ.
މީގެ ދޮޅު އަހަރުކުރިން، 2024 ވަނަ އަހަރުގެ އޮގަސްޓް މަހު ދަރިވަރުން އިސްވެ ތިބެ ހިންގި ވަރުގަދަ މުޒާހަރާތަކާ ގުޅިގެން މަގާމުން ދުރުކުރެވުނު ފަހުން، ހަސީނާ ދެއްވި ފުރަތަމަ ތަގުރީރާ ގުޅިގެން ބަންގުލަދޭޝް ސަރުކާރުން ނެރުނު ބަޔާނެއްގައި ބުނެފައިވަނީ، "ގިނަ ބައެއްގެ ގާތިލެއް" ކަމަށް ބުނާ ހަސީނާ އިންޑިއާގެ ވެރިރަށް ނިއުދިއްލީގައި ހުންނަވައިގެން ނަފުރަތު އުފެދޭ ގޮތަށް ވާހަކަ ދެއްކެވުމަކީ ބަންގުލަދޭޝްގެ ރައްޔިތުންނާއި ސަރުކާރަށް ކުރި މަލާމާތެއް ކަމަށެވެ.
ނިއުދިއްލީގެ ފޮރިން ކޮރެސްޕޮންޑެންޓްސް ކްލަބުގައި އިއްވި އޯޑިއޯ މެސެޖެއްގައި ހަސީނާ ވަނީ، ބަނގްލަދޭޝްގެ ވަގުތީ ސަރުކާރުގެ ވެރިޔާ މުހައްމަދު ޔޫނުސްއަކީ "ގާތިލު ފެސިސްޓެއް" ކަމަށް ސިފަކުރައްވައި، އޭނާގެ ދަށުން ބަންގުލަދޭޝްގައި މިނިވަން އިންސާފުވެރި އިންތިހާބެއް ނުބޭއްވޭނެ ކަމަށް ވިދާޅުވެފައެވެ.
ބަންގުލަދޭޝްގެ ފޮރިން މިނިސްޓްރީން ތުހުމަތުކުރާ ގޮތުގައި، ހަސީނާ ވަނީ އޭނާގެ ޕާޓީއަށް ވަފާތެރި މީހުންނާއި އާންމު ރައްޔިތުން ނުކުމެ، ކުރިއަށް އޮތް އިންތިހުބަށް ހުރަސްއެޅުމަށްޓަކައި ޓެރަރިޒަމްގެ އަމަލުތައް ހިންގުމަށް ގޮވާލާފައެވެ. އަދި އިންޑިއާއިން މިފަދަ ކަންކަމަށް ފުރުސަތު ދިނުމަކީ ދެ ގައުމުގެ ގުޅުމަށް ނޭދެވޭ އަސަރުކުރާނެ "ނުރައްކާތެރި މިސާލެއް" ކަމަށްވެސް އެ މިނިސްޓްރީން ބުނެފައިވެއެވެ.
ހަސީނާގެ 15 އަހަރުވީ ވެރިކަމުގައި އިންސާނީ ހައްގުތަކަށް އަރައިގަނެ، އިދިކޮޅު ފަރާތްތަކަށް އަނިޔާވެރިވެފައިވާ ކަމުގެ ގިނަ ތުހުމަތުތަކެއް ވަނީ ކުރެވިފައެވެ. 2024 ވަނަ އަހަރުގެ ހަމަނުޖެހުންތަކުގައި 1,400 އަށްވުރެ ގިނަ މީހުން މަރުވި މައްސަލައިގައި، ޑާކާގެ ކޯޓަކުން ވަނީ ހަސީނާގެ ގައިރު ހާޒިރުގައި އޭނާގެ މައްޗަށް މަރުގެ ހުކުމް އިއްވާފައެވެ.
ބަނގްލަދޭޝްގެ އާންމު އިންތިހާބު އަންނަ ފެބްރުއަރީ 12 ގައި ބޭއްވުމަށް ހަމަޖެހިފައިވާއިރު، ހަސީނާގެ އަވާމީ ލީގު ޕާޓީ ވަނީ އިންތިހުބުގައި ބައިވެރިވުން މަނާކޮށްފައެވެ. އިންތިހާބުގައި އެންމެ ކުރީގައި އުޅޭނެ ކަމަށް ބެލެވެނީ ބަނގްލަދޭޝް ނޭޝަނަލިސްޓް ޕާޓީ (ބީއެންޕީ) އާއި ޖަމާއަތު އިސްލާމީ އިސްވެ އޮންނަ ކޯލިޝަނެވެ.
